ហ្គាំបៀ៖ប្រធានាធិបតីថ្មីនៃប្រទេស Gambia លោក Adama Barrow ដែលបានភៀសខ្លួនទៅនៅប្រទេស Senegal បានត្រឡប់ទៅប្រទេសរបស់លោកវិញហើយ ដើម្បីដឹកនាំប្រទេសក្នុងឋានៈជាប្រធានាធិបតីជាប់ឆ្នោតដែលស្របពេលនេះ ប្រជាជនរាប់ម៉ឺននាក់ ឈរតាមដងផ្លូវ ដើម្បីសាទរមេដឹកថ្មីរបស់ខ្លួន។
តាមសេចក្ដីរាយការណ៍របស់បណ្ដាញផ្សាយព័ត៌មាន ABC លោក Adama Barrow ដែលត្រូវអមដំណើរដោយកងទ័ពសហភាពអាហ្វ្រិកខាងលិច នឹងធ្វើដំណើរចូលទៅវិមានប្រធានាធិបតី នៅទីក្រុង Banjul នៅព្រឹកថ្ងៃព្រហស្បតិ៍នេះ។
ការចូលកាន់តំណែងរបស់លោក Adama Barrow បានធ្វើឡើងបន្ទាប់ពីអតីតជនផ្ដាច់ការ Jammeh ត្រូវបានបង្ខំឱ្យនិរទេសខ្លួន ទៅនៅប្រទេស គីនេ។ លោក Adama Barrow បានឈ្នះការបោះឆ្នោតលើប្រ ធានាធិបតីលោក Jammeh កាលពីថ្ងៃទី ០១ ធ្នូ ។ លោក Jammeh បានកាន់អំណាចដោយការបង្ហូរ ឈាមនៅឆ្នាំ ១៩៩៤ ពេលនោះ លោកមានអាយុ ២៩ឆ្នាំ។
បុរសអតីតឧត្ដមសេនីយ៍រូបនេះ បានដឹកនាំប្រទេសហ្គាំបៀ ២២ឆ្នាំ ដោយការគៀបសង្កត់ធ្វើទុក្ខបុក ម្នេញសិទ្ធិមនុស្សយ៉ាងធ្ងន់ធ្ងរ។ លោកត្រូវបានប្រជាជន Gambia និងសហគមន៍អន្ដរជាតិ ហៅថា ជាជនផ្ដាច់ការ។
ចំណែកលោក Adama Barrow មានប្រវត្តិជាកងសន្ដិសុខឯកជន បន្ទាប់មកទៀតលោកភៀសខ្លួនទៅនៅប្រទេសអង់គ្លេស ហើយក្រោយមកលោកបានក្លាយជាអ្នកជំនួញអចលនទ្រព្យ។ លោក Adama Barrow ត្រូវបានប្រជាជន Gambia ចាត់ទុកជាជើងឯកប្រជាធិបតេយ្យ និងជាអ្នកសេដ្ឋកិច្ច៕
