ភ្នំពេញ៖ប្រទេសកម្ពុជានិងប្រទេសឡាវ បានប្តេជ្ញាពង្រឹងកិច្ចសហការទ្វេភាគីក្នុងការប្រយុទ្ធប្រឆាំងគ្រឿងញៀនតាមបណ្តោយព្រំដែន ខណៈដែលគណៈប្រតិភូជាន់ខ្ពស់ឡាវត្រូវបញ្ចប់ដំណើរទស្សនិច្ចរយៈពេលបីថ្ងៃនៅកម្ពុជានៅថ្ងៃពុធ ទី២៥ មករា ម្សិលមិញ។
ការប្តេជ្ញាចិត្តធ្វើឡើងក្នុងជំនួបរវាងរដ្ឋមន្ត្រីការបរទេសកម្ពុជាលោក ប្រាក់ សុខុន និងសមភាគីឡាវ លោក សាលឿមសៃ កុមម៉ាសិទ្ធ ក្នុងទីក្រុងភ្នំពេញកាលពីថ្ងៃអង្គារ ម្សិលម្ង៉ៃ។ អ្នកនាំពាក្យក្រសួងការ បរទេសលោក ជុំ ស៊ុន្ធរី បញ្ជាក់ថាលោកប្រាក់ សុខុន បានប្រាប់ដល់សមភាគីរបស់ខ្លួនថា កម្ពុជាបើកយុទ្ធនាការប្រឆាំងគ្រឿងញៀនសំរាប់រយៈពេលប្រាំមួយខែដោយចាប់ផ្តើមពីខែមករានេះ។
ហើយលោក ប្រាក់ សុខុន ស្នើឲ្យភាគីឡាវពង្រឹងកិច្ចសហការប្រឆាំងគ្រឿងញៀនជាពិសេសនៅតាមបណ្តោ យព្រំដែនរួម។ កម្ពុជានិងឡាវមានព្រំដែនរួមប្រវែង៥៣៣គីឡូម៉ែត្រនៅភាគខាងជើងនិងប៉ែកឥសានប្រទេស។ លោក សាលឿមសៃ កុមម៉ាសិទ្ធ បានមកបំពេញទស្សនកិច្ចនៅកម្ពុជា ចាប់តាំងពីថ្ងៃចន្ទ័ និងត្រូវបញ្ចប់ដំណើរទស្សនកិច្ចនៅថ្ងៃពុធ ទី២៥ មករា ក្រោយពីប្រជុំពិភាក្សាពីបញ្ហាព្រំដែនជាមួយកម្ពុជារួច៕
