ភ្នំពេញ៖ក្រុមតំណាងរាស្ដ្ររបស់គណបក្សសង្គ្រោះជាតិ ស្នើឲ្យរដ្ឋមន្ដ្រីក្រសួងចំនួន៣ស្វែងរកយុត្តិធម៌ ជូនស្ត្រីរកស៊ីផ្លូវភេទ ដែលក្រុមសន្ដិសុខខណ្ឌដូនពេញ បានដេញចាប់ រហូតនាងធ្លាក់ទឹកទន្លេលងទឹកស្លាប់ ។
តាមលិខិតរបស់អ្នកតំណាងរាស្ត្រ គណបក្សសង្គ្រោះជាតិចំនួន៦រូប ដែលបានផ្ញើទៅរដ្ឋមន្ត្រីក្រសួងទាំង៣នោះ រួមមាន៖ -ក្រសួងយុត្តិធម៌ ក្រសួងកិច្ចការនារី និងក្រសួងមហាផ្ទៃ ។
ស្ត្រីរងគ្រោះមានឈ្មោះ ប៉ែន សុគន្ធា អាយុ ៣៣ឆ្នាំស្នាក់នៅផ្ទះជួលនៅសង្កាត់ទួលសង្កែ ខណ្ឌឫស្សី កែវ និងមានស្រុកកំណើត នៅភូមិពាលញែក២ ឃុំផ្ទះព្រៃ ស្រុកសំពៅមាស ខេត្តពោធិ៍សាត់។
ស្ត្រីរងគ្រោះរូបនេះ បានលង់ទឹកស្លាប់នៅ ទន្លេចតុមុខ កាលពីយប់ថ្ងៃទី០២ ខែមករា ឆ្នាំ២០១៧ នៅពេលនាងរត់គេចពីការតាមចាប់ខ្លួនពីសំណាក់កម្លាំងប្រជាការពារខណ្ឌដូនពេញដោយនាងរត់ឡើងទូកទេសចរណ៍មួយនៅមាត់ទន្លេ បណ្តាលឲ្យលង់ទឹកទន្លេស្លាប់។
អ្នកតំណាងរាស្ត្រ ទាំង៦រូបនោះ មានលោកស្រី មួរ សុខហួរ ផងដែរ បានទាមទារនាំខ្លួន ក្រុមសន្តិសុខ ដែលបណ្ដាលឱ្យស្ត្រីរកស៊ីផ្លូវភេទនេះស្លាប់ មកប្រឈមុខនឹងកំហុសរបស់ខ្លួន។ ពួកគាត់ថា ជារឿងព្រហ្មទណ្ឌ ដែលមិនអាច សងជាសំណង ប៉ះប៉ូវផ្លូវចិត្តបានឡើយ។
ក្រោយពីរកឃើញសាកសពស្ត្រីនេះ ឃើញភ្លាមលោក ហែម អាន ប្រធានក្រុមប្រឹក្សាខណ្ឌ និងលោក សុខ ពេញវុធ អភិបាលខណ្ឌដូនពេញ បាននាំយកអំណោយមួយចំនួន ផ្ដល់ជូនគ្រួសាររបស់សពស្ត្រីរកស៊ីផ្លូវភេទម្នាក់នេះ៕
