ភ្នំពេញ៖អង្គការតម្លាភាពអន្ដរជាតិដែលមានមូលដ្ឋានៅប្រទេសអាល្លីម៉ង់ សហការជាមួយអង្គការតម្លាភាពកម្ពុជា បានចេញរបាយការណ៍ប្រចាំឆ្នាំ២០១៦ ដោយរកឃើញថា កម្ពុជាបន្ដគ្រប់គ្រងឈ្មោះថា មានស្ថានភាពអំពើពុករលួយអាក្រក់បំផុតបើធៀបនឹងប្រទេសនៃសមាគមអាស៊ាន។
តាមរបាយការណ៍របស់អង្គការនេះ កម្ពុជាជាប់ចំណាត់ថ្នាក់លេខ ១៥៦ ក្នុងចំណោមប្រទេស ១៧៦ដែលស្រង់មកធ្វើចំណាត់ថ្នាក់ អំពីស្ថានភាពអំពើពុករលួយ។ ប្រទេសណាដែលមានចំណាត់ថ្នាក់លេខរៀងខ្ពស់ជាងគេ គឺជាប្រទេសដែលត្រូវគេរកឃើញថា មានស្ថានភាពអំពើពុករលួយអាក្រក់បំផុត។ សម្រាប់កម្ពុជារបាយការណ៍ TI បញ្ជាក់ថាមានចំណាត់ថ្នាក់ដូចឆ្នាំ២០១៤-២០១៥ ដដែលមានន័យថា ស្ថានភាពអំពើពុករលួយនៅកម្ពុជាមិនបានល្អប្រសើរអ្វីឡើយ បើធៀបនឹងប្រទេសនៃសមាគមអាស៊ាន ៩ប្រទេសទៀត។
អង្គការនេះបានធ្វើការកត់សំគាល់ថា ប្រទេសដែលមានចំណាត់ថ្នាក់អំពើពុករលួយប្រហាក់ប្រហែលកម្ពុជាដែរគឺមានច្រើននៅទ្វីបអាហ្វ្រិក។ ប្រទេសអាហ្វ្រិកដែលត្រូវបានគេចាត់ទុកថា មានស្ថានភាពអំពើពុករលួយដូចប្រទេសកម្ពុជាដែរនោះគឺច្រើនតែស្ថិតនៅក្រោមការដឹកនាំដ៏យូរអង្វែងឬហៅមួយថា ការដឹកនាំបែបផ្ដាច់ការ។ ប្រទេសអាហ្វ្រិកទាំងនោះរួមមាន ស៊ីមបាវេ, ឆាត, អេរិកទ្រាល និងសាធារណៈរដ្ឋកុងហ្គូ៕
