ភ្នំពេញ៖តុលាការកំពូលនៅព្រឹកថ្ងៃទី២៥ មករា នេះ បានសម្រេចបន្ដឃុំខ្លួនអ្នកស្រី ទេព វន្នី ក្នុងពន្ធនាគារដដែល ដោយទុកលទ្ធភាពឲ្យតុលាការក្រុងភ្នំពេញបន្ដនីតិវិធីលើអ្នកស្រីបន្ដទៀត។
អ្នកស្រី ទេព វន្នី ដែលជាស្ដ្រីតំណាងសហគមន៍បឹងកក់ត្រូវបានតុលាការក្រុងភ្នំពេញចោទប្រកាន់ពីបទហិង្សាដោយចេតនាមានស្ថានទម្ងន់ទោស ប្រព្រឹត្ដនៅក្បែរវិមានឯករាជ្យ កាលពីថ្ងៃទី១៣ ខែមីនា ឆ្នាំ២០១៣ ក្បែរផ្ទះសម្ដេចនាយករដ្ឋមន្ដ្រី ហ៊ុន សែន។ អ្នកស្រីត្រូវបានតុលាការចោទប្រកាន់ចំនួនពីរបទល្មើស ករណីទី១ ពីបទហិង្សាដោយចេតនាមានស្ថានទម្ងន់ទោស និងករណីទីពីរ ជាប់ចោទពីបទប្រមាថ អ្នករាជការសាធារណៈ និងប្រឆាំងអ្នករាជការសាធារណៈមានស្ថានទម្ងន់ទោស។
អ្នកស្រី ទេព វន្នី ត្រូវបានសមត្ថកិច្ចចាប់ខ្លួនកាលពីថ្ងៃទី១៥ ខែសីហា ឆ្នាំ២០១៦ ពោលគឺភ្លាមៗបន្ទាប់ពីសមត្ថកិច្ចចូលទៅបង្ក្រាបក្រុមស្ដ្រី សហគមន៍បឹងកក់ដែលនាំគ្នាធ្វើពិធី «ថ្ងៃចន្ទពណ៌ខ្មៅ» ទាមទារឲ្យដោះលែងមន្ដ្រីសិទ្ធិមនុស្ស អាដហុក និងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត៕
