ភ្នំពេញ៖បន្ទាប់ពីមានភាពមិនប្រក្រតីលើតួលេខនៃការនាំខ្សាច់ចេញទៅក្រៅប្រទេស ក្រសួងរ៉ែ និងថាមពល បានផ្អាកជាបណ្តោះអាសន្ន នូវការនាំខ្សាច់ចេញទៅក្រៅប្រទេស។ ប៉ុន្តែសង្គមស៊ីវិលស្នើឲ្យមានការត្រួតពិនិត្យលើការនាំខ្សាច់ចេញឲ្យបានហ្មត់ចត់។
លោក ឌិត ទីណា អ្នកនាំពាក្យក្រសួងរ៉ែ និងថាមពល បានបញ្ជាក់ថា ការសម្រេចចិត្តនេះដើម្បី «កុំឱ្យមានការជ្រួលច្របល់» បន្ទាប់ពីមានការបង្ហាញតួលេខខុសគ្នាយ៉ាងប្រទាំងប្រទើសក្នុងរបាយការណ៍នាំខ្សាច់ចេញពីកម្ពុជារវាងក្រសួងរ៉ែ និងថាមពល និងរបាយការណ៍របស់អង្គការសហប្រជាជាតិ UN Comtrade។
លោក ឌិត ទីណា ថ្លែងក្នុងសន្និសីទសារព័ត៌មាន ក្នុងទីក្រុងភ្នំពេញនៅព្រឹកថ្ងៃនេះថា ការផ្អាកនេះក៏នឹងធ្វើឱ្យប្រសើរនូវនីតិវិធីមួយចំនួន ដើម្បីអនុញាតឲ្យសង្គមស៊ីវិលបានចូលរួមក្នុងដំណើរត្រួតពិនិត្យការនាំខ្សាច់ចេញផងដែរ។ «យើងចង់ឱ្យមានការចូលរួមពីអង្គការ ពីអ្នកដែលចូលរួមមួយចំនួន។ ចូលរួមជាមួយគ្នាទៅ ធ្វើការជាមួយគ្នាទៅ ពីមុនអត់មានពីណាមកឈឺឆ្អាលយើងធ្វើតាមច្បាប់ តាមអ្វីដែលជានីតិវិធីរបស់យើង ប៉ុន្តែឥឡូវបើមានអ្នកចង់ឈឺឆ្អាលបន្ថែម យើងនឹងរកនីតិវិធីបន្ថែមដើម្បីឱ្យចូលមក អស់ចិត្តទាំងអស់គ្នាទៅ»។
ការសម្រេចចិត្តផ្អាកការនាំខ្សាច់ចេញរបស់រដ្ឋាភិបាលធ្វើឡើងបន្ទាប់ពីអង្គការសហប្រជាជាតិ UN Comtrade ចេញរបាយការណ៍មួយកាលពីចុងឆ្នាំ២០១៦ ស្តីពីការនាំខ្សាច់ពីកម្ពុជាទៅកាន់ប្រទេសសិង្ហបុរីបានបង្កឲ្យមានភាពចម្រូងចម្រាសយ៉ាងខ្លាំងជាមួយរបាយការណ៍របស់រដ្ឋាភិបាល។ របាយការណ៍របស់អង្គការសហប្រជាជាតិបង្ហាញថា ក្នុងរយៈពេល ៨ឆ្នាំ គឺចន្លោះពីឆ្នាំ២០០៧ ដល់ឆ្នាំ២០១៥ កម្ពុជាលក់ខ្សាច់ទៅឲ្យប្រទេសសិង្ហបុរីបានចំនួន ៧២,៨លានតោន។ ដោយឡែកបើផ្អែកតាមរបាយការណ៍របស់រដ្ឋាភិបាល កម្ពុជានាំខ្សាច់ចេញទៅកាន់ដែនដីកោះនេះ មានទំហំត្រឹមតែជាង ១៦លានតោននិងទទួលបានទឹកប្រាក់តែជាង ២លានដុល្លារប៉ុណ្ណោះក្នុងរយៈពេលប្រាំបីឆ្នាំដូចគ្នា។
តែទោះជាយ៉ាងណាលោក ឌិត ទីណា អ្នកនាំពាក្យក្រសួងរ៉ែ និងថាមពលបញ្ជាក់ថា ការផ្អាកការនាំខ្សាច់ចេញនេះមិនពាក់ពន្ធ័នឹងទិន្នន័យផ្ទុយគ្នាក្នុងរបាយការណ៍ទាំងពីរនោះទេ។ ហើយការផ្អាកនេះគឺជាការផ្អាកដែលមិនមានពេលកំណត់នោះទេ។
ប្រទេសកម្ពុជានាំខ្សាច់ចេញទៅកាន់ប្រទេសមួយចំនួន ក្នុងនោះមានប្រទេសសិង្ហបុរី កោះតៃវ៉ាន់ កូរ៉េខាងត្បូង ទៅកាន់ប្រទេសវៀតណាម និងប្រទេសថៃ ជាដើម៕
