ប៉េកាំង៖ក្រសួងការបរទេសចិនបានប្រតិកម្មភ្លាមៗចំពោះប្រធានាធិបតីថ្មីសហរដ្ឋអាមេរិកលោក ដូណាល់ត្រាំ ដែលបាននិយាយថា អាមេរិកនឹងឃាឃាំងមិនឲ្យចិនគ្រប់គ្រងតំបន់សមុទ្រចិនខាងត្បូងបាន។
ក្នុងសេចក្ដីថ្លែងការណ៍របស់អ្នកនាំពាក្យក្រសួងការបរទេសចិនលោកស្រី Hua Chunying បាននិយាយថា សហរដ្ឋអាមេរិកដែលស្ថិតនៅក្រោមការដឹកនាំរបស់លោក ដូណាល់ត្រាំ ត្រូវប្រុងប្រយ័ត្នក្នុងការធ្វើសកម្មភាពឬក៏និយាយប៉ះពាល់ លើប្រទេសចិនក្នុងករណីសមុទ្រចិនខាងត្បូង។ លោកស្រីបានបញ្ជាក់ទៀតថា រដ្ឋការថ្មីរបស់លោក ដូណាល់ត្រាំ ដែលប្ដេជ្ញាឃាឃាំងចិនមិនឲ្យចូលកាន់កាប់សមុទ្រចិនខាង ត្បូងនោះគឺជាគោលនយោបាយជ្រៀតជ្រែកដែនអធិបតេយ្យរបស់ចិននិងបញ្ហាតំបន់។
កាលពីព្រឹកមិញនេះ ក្រសួងការបរទេសអាមេរិកដែលក្រោមការដឹកនាំប្រធានាធិបតីថ្មីលោក ដូណាល់ត្រាំ បានអះអាងថា ការគ្រប់គ្រងរបស់លោក ត្រាំ គឺមិនបណ្ដោយឲ្យចិនគ្រប់គ្រងបានជាដាច់ខាត នៅតំបន់ជម្លោះសមុទ្រចិនខាងត្បូង ព្រោះតំបន់នោះជាដែនទឹកនិងផ្លូវនាវាចរអន្ដរជាតិ ហើយអាមេរិកមានសិទ្ធិគ្រប់គ្រាន់ដើម្បីចូលទៅកាន់ទីនោះ។
ជម្លោះសមុទ្រចិនខាងត្បូងមាន ហ្វីលីពិន វៀតណាម ម៉ាឡេស៊ី ព្រុយនេ ជាមួយនឹងប្រទេសចិន ហើយសហរដ្ឋអាមេរិកត្រូវបានគេមើលឃើញថា បានក្លាយជាគូជម្លោះមួយដែរ ក្នុងឋានៈជាអ្នកការពារដែន ទឹកអន្ដរជាតិ៕ ប្រភពពី Reuters
