ភ្នំពេញ៖ គណៈកម្មាការអចិន្ដ្រៃយ៍រដ្ឋសភាមកពីគណបក្សប្រជាជនកម្ពុជា នៅព្រឹកថ្ងៃចន្ទនេះ បានបើកកិច្ចប្រជុំរបស់ខ្លួនដើម្បីធ្វើសេចក្ដីសម្រេចរំលាយចោលតំណែងប្រធានសភា សម្លេងភាគតិចរបស់គណបក្សប្រឆាំង។
ការបើកកិច្ចប្រជុំគណៈកម្មាធិការអចិន្ត្រៃយ៍រដ្ឋសភា នៅពេលនេះ គឺ ធ្វើឡើងតាមសំណើរបស់ក្រុមតំណាងរាស្ត្រគណបក្សប្រជាជនកម្ពុជា បន្ទាប់ពីមានការប្រកាសដោយ សម្តេច ហ៊ុន សែន ឱ្យមានការធ្វើវិសោធនកម្មលើមាត្រា៤៨ថ្មី (បី) នៃបទបញ្ជាផ្ទៃក្នុងនៃរដ្ឋសភាឡើងវិញ។
តាមកាសែតក្នុងស្រុកមួយដែលស្និទ្ធនឹងរដ្ឋាភិបាល ការសម្រេចរំលាយចោលនៃក្រុមតំណាងមតិភាគតិច នៃរដ្ឋសភារបស់គណបក្សសង្គ្រោះជាតិនៅពេលនេះ ត្រូវបានចុះហត្ថលេខាដោយ ក្រុមតំណាងរាស្ត្រចំនួន៥៥រូប កាលពីសប្តាហ៍មុន បន្ទាប់ពីមានការប្រកាសដោយ សម្តេច ហ៊ុន សែន ឱ្យមានការធ្វើវិសោធនកម្មលើមាត្រា៤៨ថ្មី (បី) នៃបទបញ្ជាផ្ទៃក្នុងនៃរដ្ឋសភានេះឡើងវិញ ព្រោះពិបាកក្នុងការធ្វើការ រួមទាំងករណីប៉ុនប៉ងចរចាដោះលែងអ្នកទោស ដែលបំពានដល់អំណាចតុលាការជាដើម។
សូមបញ្ជាក់ថា ចំពោះការធ្វើវិសោធនកម្មរឿងនេះ ក្រោយពេលបញ្ចូលទៅក្នុងគណៈកម្មាធិការអចិន្ត្រៃយ៍ សំណើនេះនឹងបញ្ជូនទៅដល់គណៈកម្មការជំនាញ ដើម្បីត្រួតពិនិត្យជាមុន ហើយទើបបញ្ជូនទៅសភាពេញអង្គបោះឆ្នោតសម្រេច៕
