ភ្នំពេញ ៖ លោក ជា មុន្នី ដែលត្រូវជាប្អូនបង្កើតរបស់លោក ជា វិជ្ជា បានថ្លែងថា លោកអស់ជំនឿទៅលើរដ្ឋាភិបាលបច្ចុប្បន្ន ដែលមិនអាចរកឃើញឃាតករពិតបាញ់សម្លាប់បងប្រុសរបស់លោកកាលពី ១៣ឆ្នាំ។ លោកថាមានតែរដ្ឋាភិបាលថ្មីទេ ទើបអាចរកឃើញអ្នកបាញ់សម្លាប់លោក ជា វិជ្ជា មកផ្តន្ទាទោសតាមច្បាប់បាន។ ការថ្លែងដូចនេះធ្វើទ្បើងនៅក្នុងពិធីគម្រប់ខួប ១៣ ឆ្នាំនៃមរណភាពរបស់លោក ជា វិជ្ជា ព្រឹកថ្ងៃទី ២២ ខែមករា ឆ្នាំ២០១៧ នៅមុខវត្តលង្កា រាជធានីភ្នំពេញ។
ពាក់ព័ន្ធនិងការបាញ់លោក ជា វិជ្ជា នេះ លោក ជា មុន្នី បាននិយាយថា លោកគ្មានជំនឿចិត្តថា រដ្ឋាភិបាលអាចតាមចាប់ឃាតករបាញ់សម្លាប់បងប្រុសរបស់លោកមកផ្តន្ទាទោសតាមច្បាប់នោះទ្បើយ។ ការអស់ ជំនឿចិត្តនេះ ដោយសារតែលោកយល់ថា រយៈពេល១៣ ឆ្នាំហើយដែលឃាតករបាញ់សម្លាប់លោក ជា វិជ្ជា តែរដ្ឋាភិបាលនៅតែមិនអាចរកឃើញឃាតករនៅទ្បើយ។ លោក ជា វិជ្ជា ៖«ខ្ញុំសូមជម្រាបថាឈប់ជឿហើយរដ្ឋាភិបាល១៣ឆ្នាំហើយរកអត់ឃើញសោះបង្កើតប្រកាសក្រសួង អន្តរក្រសួងរកឃាតុករអត់ឃើញ អញ្ចឹងរង់ចាំរដ្ឋាភិបាលថ្មីសង្គ្រោះជាតិសន្យាទៅឈ្នះឆ្នោតរកឃើញឃាតុករដែលគេបាញ់ជា វិជ្ជា គេបាញ់លោក កែម ទ្បី បាញ់អ្នកកាសែត បាញ់ព្រះសង្ឃ បាញ់តារ៉ាចំរៀងស្វែងរកផងសូមផ្តាំភ្ញើរដ្ឋាភិបាលរកអត់ឃើញទេ១៣ឆ្នាំហើយ»។
លោក អាត់ ធន់ បន្តទៀតថា ប្រសិនបើរដ្ឋាភិបាលនៅតែមិនអាចរកឃើញឃាតករទៀតនោះ នឹងធ្វើឱ្យពលរដ្ឋកាន់តែអស់ជំនឿទៅលើការដឹកនាំរបស់រដ្ឋាភិបាល ករណីនេះលោកថា រដ្ឋាភិបាលត្រូវពន្លឿនតាមចាប់ឃាតករឱ្យបានឆាប់តាមតែអាចធ្វើទៅបាន។ «យើងនៅបន្តជម្រុញរដ្ឋាភិ បាលឱ្យរកឃាតុករពិតដើម្បីមកផ្តន្ទាទោសតាមច្បាប់កុំឱ្យមាននិទណ្ឌភាពនៅប្រទេសកម្ពុជាដោយសារតែរឿងអ្នកដែលសកម្មភាព អ្នកការការពារសិទ្ធិកម្មករមានការភ័យខ្លាច យើងស្នើឱ្យរដ្ឋាភិបាល ក៏ដូចជាតុលាការដែលជាតំណាងការរកយុត្តិធម៌ឱ្យប្រជាពលរដ្ឋត្រូវតែរកឱ្យលឿនតាមតែអាចធ្វើទៅបាន»។
រីឯលោក យឹម សុវណ្ណ អ្នកនាំពាក្យគណបក្សសង្គ្រោះជាតិដែលបានទៅគោរពវិញ្ញាណក្ខន្ធ លោក ជា វិជ្ជា មានប្រសាសន៍ថា លោក ជា វិជ្ជា គឺជាបុគ្គលដែលមានភាពក្លាហាន ហ៊ានតស៊ូលះបង់សូម្បីតែអាយុជីវិតរបស់ខ្លួន។ លោក យឹម សុវណ្ណ បន្តថា ពលរដ្ឋត្រូវការសង្គមយុត្តិធម៌ និងសន្តិ ភាពប្រកបដោយយុត្តិធម៌ ហើយដើម្បីឱ្យសង្គមមានយុត្តិធម៌លោកថា រាជរដ្ឋាភិបាលត្រូវពង្រឹងការស៊ើបអង្កេតឱ្យបានលឿនករណីការបាញ់សម្លាប់លោកជា វិជ្ជា ក៏ដូចជាជនរងគ្រោះផ្សេងៗទៀតដែលឃាតករបាញ់សម្លាប់។ «តាំងនាមឱ្យប្រជាពលរដ្ឋកម្មករកម្មារិនីក្នុងក្រុមតំណងរាស្ត្រគណបក្សសង្គ្រោះជាតិសូមអំពាវនាវឱ្យអាជ្ញាធរមានសមត្ថកិច្ចបន្តការស៊ើបអង្កេតប្រកបដោយឯករាជ្យ អព្យាក្រឹត្យដើម្បីរកយុត្តិធម៌ជូនអ្នក នយោបាយក៏ដូចជាវីរៈជនសកម្មជននយោបាយដែលបាត់បង់ជីវិតនាពេលកន្លងមករកយុត្តិធម៌ជូនក្រុមគ្រួសាររបស់គាត់ហើយក៏ជាកត្តាមួយដែលធ្វើឱ្យមានការលុបបំបាត់ភាពគ្មានទោសពៃនិទណ្ឌភាពនៅក្នុងសង្គមខ្មែរ»។
យោងតាមសេចក្តីសម្រេចរបស់រាជរដ្ឋាភិបាលកម្ពុជា ចុះថ្ងៃទី១៥ ខែកញ្ញា ឆ្នាំ២០១៥ ស្តីពីការតែងតាំងសមាសភាពនៃគណៈកម្មការអន្តរក្រសួងស៊ើបអង្កេតពិសេសលើករណី បណ្តឹងស្តីពីករណីឃាតកម្មលើមេដឹកនាំសហជីព ជា វិជ្ជា លោក ហ៊ី វុទ្ធី និងលោក រស់ សុវណ្ណារ៉េត រាជរដ្ឋាភិបាលសម្រេចតែងតាំងមនុស្សចំនួន ១៤ រូបឱ្យចូលរួមស៊ើបអង្កេត។
សមាសភាពនៃគណៈកម្មការអន្តរក្រសួងស៊ើបអង្កេតពិសេសនេះដឹកនាំដោយ លោក ឯម សំអាន ជាប្រធាន អមដោយអនុប្រធាន២រូប និងសមាជិកចំនួន ១១រូបទៀតដោះស្រាយពីករណីនេះ។
សូមជម្រាបជូនថា លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានឃាតករបាញ់សម្លាប់នៅមុខតូបលក់កាសែតក្បែររបងខាងលិចវត្តលង្កា កំណាត់ផ្លូវប៉ាស្ទ័រ សង្កាត់បឹងកេងកងទី ០១ ខណ្ឌចំការមន ភ្នំពេញកាលពីថ្ងៃ ទី២២ ខែមករា ឆ្នាំ២០០៤៕
