ហ្គាំប៊ី ៖ ប្រធានាធិបតីចាញ់ឆ្នោតនៃប្រទេសហ្គាំប៊ីបានសម្រេចចាកចេញពីប្រទេសទៅនៅប្រទេស គីណេ បន្ទាប់ពីចុះហត្ថលេខាយល់ព្រមទៅរស់នៅប្រទេសនេះ ដែលជាផ្នែកមួយនៃការសុំសិទ្ធិជ្រកកោននាំឲ្យប្រជាជនសប្បាយរីករាយយ៉ាងខ្លាំង ដោយសារពួកគេបានឈ្នះលើអ្នកគ្រប់ គ្រងអំណាចផ្ដាច់ការ ២២ ឆ្នាំមកនេះ។
តាមសេចក្ដីរាយការណ៍ដដែល មេដឹកនាំសហភាពអាហ្វ្រិកមួយចំនួនកំពុងតែសម្របសម្រួលឲ្យប្រធានាធិបតីឈ្នះឆ្នោត អាដាម៉ាបារ៉ូ ចូលកាន់តំណែងនៅរយៈពេលដ៏ឆាប់ខាងមុខនេះ។
កាលពីថ្ងៃម្សិលមិញក្រសួងការបរទេសសហរដ្ឋអាមេរិក សហភាពអឺរ៉ុប និងអង្គការសហប្រជាជាតិបានប្រកាសគាំទ្រប្រទេស ហ្សេនេហ្គាល់ ដែលបានលើកទ័ពសហភាពអាហ្វ្រិកចូលទៅបណ្ដេញលោក ចាមេស ចេញពីអំណាច។ យ៉ាងណាក៏ដោយលោក ចាមេស ដែលសម្រេចចាកចេញពីតំណែងនេះគឺបន្ទាប់ពីកងទ័ពនៃក្រុមអង្គរក្សរបស់លោកបានទម្លាក់អាវុធរត់ចោលសមរភូមិ ដោយទុកឲ្យលោក ចាមេស ប្រឈមមុខនិងការឡោមព័ន្ធរបស់កងទ័ពសហភាពអាហ្វ្រិក។ ប្រជាជនហ្គាំប៊ី ភាគច្រើនបានមកជួបជុំគ្នានៅរដ្ឋធានី បានយ៉ុល ដើម្បីឃ្លាំមើលការដើរចូលវិមានប្រធានាធិប តីរបស់បេក្ខជនឈ្នះឆ្នោត អាដាម៉ាបារ៉ូ៕ ប្រភព FN
