ភ្នំពេញ៖ប្រធានស្តីទីគណបក្សសង្គ្រោះជាតិ លោក កឹម សុខា អាចនឹងចុះធ្វើវេទិកាសារធារណៈជួបសំណេះសំណាលជាមួយប្រជាពលរដ្ឋនៅតាមមូលដ្ឋានជាថ្មីទៀត ខណៈគណបក្សប្រជាជនកម្ពុជាប្រកាសរំលាយតំណែងតំណាងរាស្ត្រសំឡេងមតិភាគតិចក្នុងរដ្ឋសភា។
លោក កឹម សុខា ប្រធានស្តីទីគណបក្សសង្គ្រោះជាតិ លើកឡើងដូចនេះ នៅក្នុងកិច្ចប្រជុំថ្នាក់ដឹកនាំគណបក្សរាជធានី ខេត្ត ទូទាំងប្រទេសនៅទីស្នាក់ការកណ្តាលគណបក្សនៅសៀលថ្ងៃទី ២០ ខែ មករា ឆ្នាំ ២០១៧នេះ។ នេះបើតាមទំព័រហ្វេសប៊ុករបស់ លោក អេង ឆៃអ៊ាង។
មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង បានសរសេរនៅលើបណ្តាញសង្គមហ្វេសប៊ុកនៅរសៀលថ្ងៃសុក្រនេះថា បើគណបក្សប្រជាជនកម្ពុជា មិនត្រូវការជួបចរចា ជាមួយគណបក្សសង្គ្រោះជាតិនោះទេ គណបក្សប្រឆាំងនឹងនាំចុះទៅជួបប្រជាពលរដ្ឋនៅតាមមូលដ្ឋាន ដើម្បីរឿងរ៉ាវជាតិប្រាប់រាស្ត្រជាម្ចាស់ឆ្នោត។
លោក ងអេង ឆៃអ៊ាង៖«បើគណបក្សកាន់អំណាច គេមិនត្រូវការជួបចរចា ជាមួយយើង យើងត្រូវនាំគ្នាទៅនិយាយជាមួយប្រជាពលរដ្ឋនៅតាមមូលដ្ឋាន។នេះជាការថ្លែងរបស់លោកប្រធានស្តីទី កឹម សុខា នៅក្នុងកិច្ចប្រជុំថ្នាក់ដឹកនាំគណបក្សរាជធានី ខេត្ត ទូទាំងប្រទេសនៅទីស្នាក់ការកណ្តាលគណបក្សនារសៀលនេះ»។
ការប្រកាសរបស់លោក អេង ឆៃអ៊ាង ធ្វើឡើងស្របពេលដែលសភា នៃគណបក្សប្រជាជនកម្ពុជា និងបើកកិច្ចប្រជុំរបស់ខ្លួននៅថ្ងៃច័ន្ទ សប្ដាហ៍ក្រោយនេះ ដើម្បីពិភាក្សាទៅលើវិសោធនកម្មប្រការ ៤៨ថ្មី(៣)នៃបទបញ្ជាផ្ទៃក្នុងរដ្ឋសភា នៅថ្ងៃចន្ទ សប្តាហ៍នេះ។
ប្រសិបបើគណបក្សកាន់អំណាចធ្វើវិសោធនកម្មប្រការ ៤៨ថ្មី(៣)នៃបទបញ្ជាផ្ទៃក្នុងរដ្ឋសភា មែននោះ លោកកឹម សុខា ដែលមានតំណែងជាតំណាងរាស្ត្រសំឡេងភាគតិចក្នុងរដ្ឋសភានឹងរលាយភ្លាមៗមួយ រំពេច៕
