ភ្នំពេញ៖ប្រធានគណៈមេធាវីនៃព្រះរាជាណាចក្រកម្ពុជា បានប្តេជ្ញាធ្វើការពង្រឹងសមត្ថភាពមេធាវីបន្ថែមទៀត ដើម្បីជំរុញឲ្យមានការគោរពក្រមសីលធម៌ វិជ្ជាជីវៈ មេធាវីឲ្យបានប្រសើរឡើង។ តែមេធាវីការពារក្ដីឱ្យបក្សប្រឆាំងថា គេត្រូវជួយឱ្យមេធាវីមានសិទ្ធិ ក្នុងការឡើងតទល់ក្ដី ជាពិសេស ក្នុងសំណុំរឿងនយោបាយ ។ លោក ធូ វិរៈ រាយការណ៍៖
លោក សួន វិសាល៖«ដើម្បីពង្រឹងមេធាវីយើងត្រូវជម្រុញឲ្យចៅក្រម គោរពច្បាប់ឲ្យបានច្រើនបំផុត អញ្ចឹងយើងបង្កើតវិធីសាស្ត្រតាមរយៈចំនុចទី១ យើងពង្រឹងសមត្ថភាពមេធាវីឲ្យបានល្អប្រសើរ ចេះច្រើន ទី២គឺយើងជម្រុញឲ្យមេធាវីប្រើប្រាស់សិទ្ធិ ឲ្យបានពេញលេញ ប្រសិនបើបញ្ហាអ្វីគណៈមេធាវីនឹងជួយការពារដល់គេ ធ្វើរបៀបនេះគឺថា គេអាចឲ្យអ្នកអនុវត្តន៍ច្បាប់អនុវត្តន៍បានល្អប្រសើរ»។
ចំណែកមន្ត្រីការពារសិទ្ធិមនុស្សធ្វើការផ្នែកច្បាប់ លោក អំ សំអាត បានសម្តែងការគាំទ្រចំពោះ ការប្តេជ្ញាចិត្តរបស់លោកសួនវិសាលក្នុងការពង្រឹងសមត្ថភាពក្រមសីលធម៌វិជ្ជាជីវៈមេធាវី។ លោក អំ សំអាត សង្កេតឃើញថា ក្រមសីលធម៌វិជ្ជា ជីវៈមេធាវីនៅមានកម្រិត និងមានបញ្ហាប្រឈមខ្លះក្នុងពេលបំពេញការងារការពារក្តី។ ទោះបីយ៉ាងនេះក្តីលោក អំ សំអាត រំពឹងថា ប្រធានគណៈមេធាវីថី្មនឹងអាចពង្រឹងសមត្ថភាពក្រមសីលធម៌វិជ្ជាជីវៈមេធាវីកាន់តែល្អប្រសើរឡើងថែមមួយកម្រិតទៀត។
លោក អំ សំអាត៖«ខ្ញុំគិតថា ប្រធានគណៈមេធាវីថ្មី លោក សួន វិសាល នឹងអាចជួយសម្រួល និងកែប្រែ នៅការប្រកបវិជ្ជាជីវៈ ឲ្យកាន់តែមានប្រសិទ្ធភាពខ្ពស់ថែមទៀត ដើម្បីជួយទៅដល់កូនក្តីរបស់ខ្លួន»។
ដូចគ្នានេះដែរលោក ហុង គឹមសួន មេធាវីសាលាក្តីខ្មែរក្រហម ក៏បានគាំទ្រ វិធីសាស្ត្ររបស់ប្រធានគណៈមេធាវីថ្មី លោក សួន វិសាល ដែលមានបំណងចង់ពង្រឹងសមត្ថភាពក្រមសីលធម៌វីជ្ជាជិវៈរបស់មេធាវី។លោកថា មេធាវី ត្រូវតែគោរពក្រមសីលធម៌វីជ្ជាជិវៈឲ្យបានត្រឹមត្រូវ។
លោក ហុង គឹមសួន៖«ពាក្យថាពង្រឹងសមត្ថភាពគឺមេធាវីត្រូវតែមានចំណេះដឹងផ្លូវច្បាប់ឲ្យបានខ្លាំង ឲ្យច្រើនបញ្ហានិងការប្តេជ្ញារបស់គាត់គឺត្រឹមត្រូវហើយ ព្រោះកាលណាមេធាវីធ្វើរបៀបអាងខ្សែរមិនមែនទៅតាមផ្លូវច្បាប់ទេ»។
ដោយឡែកលោក សំ សុគង់ មេធាវីការពារក្តីឲ្យគណបក្សប្រឆាំង សង្កេតឃើញថា គណៈមេធាវីនៃព្រះរាជាណាចក្រកម្ពុជា បានជួយសម្រួលដល់កិច្ចការមេធាវីបានខ្លះដូចជា ការផ្តល់មេធាវីជួយការពារមេធាវីនៅពេលមានរឿងក្តីក្តាំង និងផ្តល់ប្រឹក្សាផ្លូវច្បាប់ជាដើម។ ក៏ប៉ុន្តែលោកថា បញ្ហាមួយចំនួនគណៈមេធាវីមិនទាន់បានជួយសម្រួលដល់កិច្ចការមេធាវី ក្នុងការ ការពារក្តីមិនបានពេញលេញនៅឡើយទេ។ លោកបន្តថារឿងក្ដីពាក់ព័ន្ធរឿងនយោបាយ គឺមេធាវីពុំសូវមានសិទ្ធិច្រើនឡើយ។
លោក សំ សុគង់៖«ឃើញថា ទាក់ទងទៅរឿងធំៗ រឿងទាក់ទងទៅនិងនយោបាយ យើងឃើញថា នីតិវិធីមានការដើរទៅរលូន ក៏ប៉ុន្តែនៅពេលយើងចូលរួមសវនាការ ឬមានការសួរដេញដោលទៅពេលខ្លះក៏មានការលំបាកដែរ ដោយសារមេធាវីការពារមិនសូវមានសិទ្ធិគ្រប់គ្រាន់តតាំង ឬក៏ក្នុងការពារ និងចំនុចមួយទៀតនៅពេលមេធាវីដាក់ភស្តុតាំង គ្រប់ទាំងអស់ហើយ ប៉ុន្តែសេចក្តីសម្រេចមិនមានការយោងភស្តុតាំងរបស់មេធាវីការពារទេ ទៅជាចំណុចផ្សេងទៅវិញ»។
គណៈមេធាវីនៃព្រះរាជាណាចក្រកម្ពុជា ត្រូវបានបង្កើតឡើងនៅ ដើមទសវត្ស១៩៩០។ បច្ចុប្បន្ននេះ គណៈមេធាវីកម្ពុជាមានមេធាវីសរុប ជាង១០០០នាក់។ ក្នុងចំណោមនេះ មានមេធាវី ខ្លះមានតែឈ្មោះ។ មេធាវីនេះ មិនបំពេញវិជ្ជាជីវៈខ្លួនទេ ៕
