ភ្នំពេញ៖ក្នុងជំនួបរវាង មេដឹកនាំកម្ពុជា ជាមួយលោក Stefan Löfven នាយករដ្ឋ មន្ត្រីនៃប្រទេសស៊ុយអ៊ែត សម្ដេច ហ៊ុន សែន បានស្នើដល់លោកនាយករដ្ឋមន្ត្រីស៊ុយអ៊ែត គាំទ្រនូវបេក្ខភាពរប ស់ប្រទេសកម្ពុជា ជាសមាជិកមិនអចិន្រៃ្តយ៍របស់ក្រុមប្រឹក្សាសន្តិសុខ អង្គការសហប្រជាជាតិ។
ជំហររបស់សម្ដេចនាយករដ្ឋមន្ត្រី ត្រូវបានអ្នកវិភាគ រិះគន់ថា មិនគួរចង់ប្រកួតប្រជែងជាមួយប្រទេសគេទេ ព្រោះកម្ពុជា បាក់មុខមាត់លើឆាកអន្តរជាតិយ៉ាងខ្លាំងណាស់ទៅហើយរឿងរំលោភសិទ្ធិមនុស្ស។
ក្នុងឱកាសដែលលោក Stefan Löfven បានថ្លែងអំណរគុណចំពោះសម្តេច ហ៊ុន សែន និងរាជរដ្ឋាភិ បា លកម្ពុជាដែលបានគាំទ្រចំពោះគំនិតផ្តួចផ្តើមរបស់លោក ក៏ដូចជារដ្ឋាភិបាលស៊ុយអ៊ែត ស្តីពីការសន្ទនាកម្រិតសង្គម និង Global Deal Initiative សម្ដេច ហ៊ុន សែន បានស្នើដល់នាយករដ្ឋមន្ដ្រី ស៊ុយអ៊ែត ជួយគាំទ្របេក្ខភាពកម្ពុជា ជាសមាជិកមិនអចិន្ត្រៃយ៍របស់ក្រុមប្រឹក្សាសន្ដិសុខអង្គការសហប្រជាជាតិ។
ការស្នើរបស់សម្ដេចនាយករដ្ឋមន្ដ្រី បន្ទាប់ពីសម្ដេចស្នើភាគី ស៊ុយអ៊ែត ពិនិត្យលទ្ធភាពក្នុងការនាំអង្ករពីកម្ពុជា បូករួមនឹងការលើកទឹកចិត្ដដល់អ្នកវិនិយោគ ស៊ុយអ៊ែត មកដាក់ទុកវិនិយោគនៅក្នុងប្រទេសកម្ពុជា។ នេះបើយោងតាមទំព័រហ្វេសប៊ុក របស់សម្ដេច ហ៊ុន សែន ដែលបានបង្ហោះនៅថ្ងៃទី១៩ មករា នេះ។ សម្ដេចបានសរសេរដូចនេះថា ៖«សម្តេចតេជោ ក៏បានស្នើដល់លោកនាយករដ្ឋមន្ត្រី ស៊ុយអ៊ែត គាំទ្រនូវបេក្ខភាពរបស់ប្រទេសកម្ពុជា ជាសមាជិកមិនអចិន្រៃ្តយ៍របស់ក្រុមប្រឹក្សាសន្តិសុខ អង្គការស ហប្រជាជាតិ»។
សមាជិកមិនអចិន្ត្រៃយ៍របស់ក្រុមប្រឹក្សាសន្ដិសុខអង្គការសហប្រជាជាតិគឺមានចំនួន ១០ប្រទេស ដែលត្រូវផ្លាស់ប្ដូររៀងរាល់ ពីរឆ្នាំម្ដង។ ប្រទេសដែលជាប់ជាសមាជិកមិនអចិន្ត្រៃយ៍ទៅបាន លុះណា តែប្រទេ សនោះ ជាប្រទេសដែលកសាងខ្លួនបានល្អប្រសើរ ពោពេញទៅដោយការអភិវឌ្ឍនិងប្រកាន់ខ្ជាប់យ៉ាងខ្លាំងនូវគោការណ៍លទ្ធិប្រជាធិបតេយ្យ ពោលគឺការគោរពសិទ្ធិមនុស្សដោយត្រឹមត្រូវ។
សំណើរបស់សម្ដេច ហ៊ុន សែន ដូចនេះ ត្រូវបានអ្នកវិភាគមើលឃើញដូចគ្នាៗថា មិនអាចទៅរួចនោះទេ ព្រោះកម្ពុជាខ្វះលក្ខខណ្ឌជាច្រើន ដែលមិនអនុឡោមទៅតាមគោលការណ៍របស់អង្គការអន្ដរជាតិ។
លោក គឹម សុខ អ្នកឃ្លាំមើលការអភិវឌ្ឍសង្គមនិងនយោបាយ មានប្រសាសន៍ ថា ព្រោះតែកម្ពុជាបច្ចុ ប្បន្នកំពុងមានរូបភាពមិនល្អជាច្រើន ជុំវិញការរំលោភសិទ្ធិមនុស្ស ដែលត្រូវបានសហគមអន្ដរជាតិថ្កោលទោសនិងដឹងលឺជាសកលផង ហើយបើចង់ក្លាយជាសមាជិកមិនអចិន្ទ្រៃរបស់ក្រុមប្រឹក្សា សន្ដិ សុខអង្គការសហប្រជាជាតិ គឺមិនអាចទៅរួចនោះទេ។ លោកបញ្ជាក់ថា ប្រទេសដែលគេមានកេរ្ដិ៍ ឈ្មោះល្អប្រសើរ ចំពោះការគោរពសិទ្ធិមនុស្ស គេនឹងមិនចាប់អារម្មណ៍ពីសំណើរបស់ប្រទេសដែលជាប់ឈ្មោះថា មានការរំលោភសិទ្ធិមនុស្សធ្ងន់ធ្ងរនាំឲ្យប៉ះពាល់ដល់ប្រទេសគេនោះទេ។
កាលពីឆ្នាំ២០១២ ប្រទេសកម្ពុជាក៏ធ្លាប់បានចូលរួមប្រកួតតំណែងជាសមាជិកមិនអចិន្ត្រៃយ៍ក្រុម ប្រឹក្សា សន្ដិសុខអង្គការសហប្រជាជាតិម្ដងផងដែរ ក៏ប៉ុន្ដែកាលនោះ កម្ពុជាមិនបានជាប់តាមក្ដីរំពឹងរបស់ខ្លួនឡើយ។
ទាក់ទិនរឿងនេះអ្នកវិភាគមួយរូបទៀតបង្ហាញការយល់ឃើញថា បើដៃម្ខាងកំពុងធ្វើបាបរាស្ដ្រខ្លួនឯង ឲ្យលំបាកវេទនាស្រែកយំស្ទើរាល់ថ្ងៃ ហើយដៃម្ខាងទៀតទៅសុំការគាំទ្រពីអន្ដរជាតិ ប្រការនេះមិនថែមទាំងមិនបានការគាំទ្រទេ ផ្ទុយទៅវិញវាបានត្រឹមតែការសើចំអកពីបរទេសប៉ុណ្ណោះ។
លោកបណ្ឌិត មាស នី អ្នកតាមដានពីការអភិវឌ្ឍសង្គមមានប្រសាសន៍ថា រដ្ឋាភិបាលគួរពិចារណាទង្វើរបស់ខ្លួនដែលធ្វើដាក់ពលរដ្ឋ មុននឹងហ៊ាននិយាយ ទៅកាន់អន្ដរជាតិឲ្យផ្ដល់ទំនុកចិត្ដនិងដាក់ការគាំទ្រមកលើខ្លួន។ លោកបន្ដថា មិនមែនប្រទេសទាំងអស់សុទ្ធតែអាចជាប់ ជាប្រទេសមួយ ក្នុងឋានៈជាសមាជិកក្រុមប្រឹ ក្សាសន្ដិសុខមិនអចិន្ទ្រៃយ៍របស់អង្គការសហប្រជាជាតិបានទេ បើប្រទេសនោះកំពុងធ្វើទុក្ខបុកម្នេញពលរដ្ឋ គាបសង្កត់សង្គមស៊ីវិលនិងបំបិទសម្លេងក្រុមប្រឆាំង។
លោកបន្ដទៀតថា កម្ពុជាបើចង់ទទួលតំណែងនេះ រដ្ឋាភិបាលត្រូវកែប្រែខ្លួនជាថ្មី ដោយបញ្ឈប់ការរំ លោភសិទ្ធិមនុស្ស ការធ្វើបាបពលរដ្ឋ ការគាប់សង្កត់សង្គមស៊ីវិល និងអ្នកសិទ្ធិមនុស្សជាបន្ដទៀត។ លើពីសនេះលោកបន្ថែមថា បើរដ្ឋាភិបាលនៅតែធ្វើសកម្មភាពដូចសព្វថ្ងៃទៅលើពលរដ្ឋដដែល កុំថាឡើយការគាំទ្រពីអន្ដរជាតិ សូម្បីការស្វាគមន៍ក៏គ្មានដែរ។
ជុំវិញរឿងនេះ គ្មានអ្នកនាំពាក្យរដ្ឋាភិបាលរូបណាលើកទូរស័ព្ទនោះទេ នៅពេលដែលវិទ្យុស្ដ្រីសុំការឆ្លើយតបចំពោះការរិះគន់របស់អ្នកវិភាគ។ ដោយឡែក លោក ជុំ សន្ទរី អ្នកនាំពាក្យក្រសួងការបរទេស បានត្រឹមស្ដាប់ សំណួររបស់អ្នកព័ត៌មានតែប៉ុណ្ណោះ ស្រាប់តែបិទទូរស័ព្ទ។
គួរជម្រាបថា សមាជិករបស់អង្គការសហប្រជាជាតិត្រូវបានបែងចែកជាពីរ ទី១ គឺជាសមាជិកអចិន្ទ្រៃយ៍របស់ក្រុមប្រឹក្សាសន្ដិសុខអង្គការសហប្រជាជាតិ ដែលមិនកំណត់អាណត្ដិនោះទេ មានសមាជិកចំនួន ៥ប្រទេស គឺប្រទេសបារាំង សហរដ្ឋអាមេរិក ចិន រុស្ស៊ី និងចក្រភពអង់គ្លេស។
ចំណែកទី២ គឺជាសមាជិកមិនអចិន្ត្រៃយ៍របស់ក្រុមប្រឹក្សាសន្ដិសុខអង្គការសហប្រជាជាតិ ដែលមានអាណត្ដិ ២ឆ្នាំ ហើយមានចំនួន ១០ប្រទេស ដែលត្រូវបានបែងចែកនិងជ្រើសរើសយកពីតំបន់ អាស៊ីអាគ្នេយ៍និងអាហ្វ្រិក ចំនួន ៥ប្រទេស ជ្រើរើសពីតំបន់អឺរ៉ុបខាងកើត ១ប្រទេស ពីអាមេរិកឡាទីន ២ប្រទេស និង ២ប្រទេសចុងក្រោយ ត្រូវជ្រើសរើពីអឺរ៉ុបខាងលិច និងប្រទេសផ្សេងៗទៀត ដែលមានលក្ខខណ្ឌសមស្របត្រឹមត្រូវតាមការកំណត់៕
