ភ្នំពេញ៖ជំនាញក្នុងវិស័យព័ត៌មានវិទ្យានៅកម្ពុជាមានគម្លាតយ៉ាងធំដែលបណ្តាលឲ្យការអភិវឌ្ឍវិស័យឧស្សាហកម្មមានការយឺតយ៉ាវ ធ្វើឲ្យតម្លៃពាណិជ្ជកម្មកើនខ្ពស់និងប៉ះពាល់ដល់ការប្រកួត ប្រជែង។ នេះបើយោងតាមរបាយការណ៍ឧស្សាហកម្មព័ត៌មានវិទ្យាកម្ពុជាស្តីពីជំនាញសេដ្ឋកិច្ចឌីជីថល។
របាយការណ៍ដែលត្រូវផ្សព្វផ្សាយជាសាធារណៈកាលពីថ្ងៃអង្គារ ទី១៧ ខែមករា។ របាយការណ៍ដែលបានធ្វើការអង្កេតទៅលើអាជីវកម្មដែលដំណើរការតាមប្រព័ន្ធព័ត៌មានវិទ្យាចំនួន២១ និងបានជួបសម្ភាសន៍ជាមួយនិស្សិតផ្នែកព័ត៌មានវិទ្យាចំនួន៦៣នាក់។
របាយការណ៍ដដែលបញ្ជាក់ថា ៧៥ភាគរយនៃអាជីវកម្មមិនអាចជួលបុគ្គលិកដែលចេះព័ត៌មានវិទ្យាមានសមត្ថភាពទេ ហើយជំរុញឲ្យពួកគេផ្តល់ការបណ្តុះបណ្តាលពួកគេដែលជាហេតុនាំឲ្យមានការបង្កើនចំណាយលើបញ្ហានេះ។ លើសពីនោះមានអ្នកដាក់ពាក្យសុំចូលធ្វើការជាច្រើនដែលជំនាញរបស់ពួកគេទាបមែនទែន។
របាយការណ៍បន្ថែមថា «៧២ភាគរយនៃនិយោជកនិយាយថា អាទិភាពដែលត្រូវជ្រើសរើសសំខាន់បំផុតគឺទេពកោសល្យ ធៀបទៅនឹង ២២ភាគរយដែលជាតម្រូវការជំនាញបច្ចេកទេសជាជាងជំនាញផ្សេងទៀត»។
