ភ្នំពេញ៖ អ្នកស្រី ទេព វន្នី សកម្មជនដីធ្លីសហគមន៍បឹងកក់ប្រាប់អ្នកសារព័ត៌មាន ខណៈត្រូវនាំខ្លួនចូលតុលាការកំពូលព្រឹកនៅថ្ងៃទី១៨ មករា នេះថា ក្ដីសង្ឃឹមអ្នកស្រីមានតែមួយគត់នាពេលនេះ គឺការចរចារវាងគណបក្សកាន់អំណាចនិងបក្សសង្គ្រោះជាតិដើម្បីផ្ដល់សេរីភាពដល់អ្នកស្រីនិងសកម្មជនការពារសិទ្ធិមនុស្សផ្សេងៗទៀត។
ករណីនេះអ្នកវិភាគយល់ថា បើបក្សកាន់អំណាចមិនទាន់រកចំណុចឈ្នះបក្សប្រឆាំងឃើញ នោះក្ដីរំពឹងពីសេរីភាពសកម្មជនសិទ្ធិមនុស្ស មន្ដ្រីគ.ជ.ប និងអ្នកផ្សេងៗ គ្មានសង្ឃឹមនោះទេ។ តែបក្សកាន់អំណាចអះអាងថា រដ្ឋអំណាចធ្វើការដោយមិនបំពានច្បាប់នោះឡើយ។
ខណៈតុលាការកំពូល សម្រេចលើកពេលប្រកាសសាលដីកាលើសំណុំរឿងបណ្ដឹងសុំនៅក្រៅឃុំ ស្ដ្រីឆ្នើមចេញមុខតវ៉ារឿងជម្លោះដីធ្លីដ៏រ៉ាំរ៉ៃនៅសហគមន៍បឹងកក់បានប្រាប់អ្នកសារព័ត៌មានថា អ្នកស្រីគ្មានជំនឿលើតុលាការកម្ពុជានោះទេ ព្រោះតុលាការនេះធ្វើការទៅតាមតែការចង់បានររបស់បក្សនយោបាយតែប៉ុណ្ណោះ។
អ្នកស្ត្រីបន្ដថា អ្វីដែលអាចនៅមានសង្ឃឹមគឺមានតែការជួបចរចាគ្នារវាងគណបក្សដែលមានអាសនៈនៅក្នុងរដ្ឋសភាប៉ុណ្ណោះ ដើម្បីឲ្យមានការដោះលែងអ្នកស្រី សកម្មជនសិទ្ធិមនុស្ស មន្ដ្រី គ.ជ.ប និងអ្នកទោសមនសិការដទៃទៀត។
អ្នកស្រី ទេព វន្នី ៖«អ្វីដែលយើងខ្ញុំសង្ឃឹមគឺសង្ឃឹមទៅលើគណបក្សទាំងពីរដែលគាត់ជំនួបគ្នានឹងធ្វើការចរចាយកប្រជាពលរដ្ឋនិងប្រទេសជាតិជាធំនោះទើបពួកខ្ញុំមានសង្ឃឹមមានសេរីភាព»។
តែសម្រាប់អ្នកវិភាគមើលឃើញថា ទំនងមិនអាចនឹងទៅរួចទេ បើគណបក្សកាន់អំណាចមិនទាន់រកចំណុចដែលសម្លាប់ជីវិតនយោបាយរបស់បក្សប្រឆាំងឃើញនោះ។
លោក គឹម សុខ អ្នកឃ្លាំមើលការអភិវឌ្ឍសង្គមនិងនយោបាយមានប្រសាសន៍ថា បញ្ហានយោបាយនៅកម្ពុជា គ្មានជម្រើសអ្វី ដែលល្អប្រសើរជាងការជជែកគ្នានោះទេ ប៉ុន្ដែលោកថា ការអង្គុយជជែកគ្នាប្រព្រឹត្ដទៅបានលុះត្រាបក្សនយោបាយទាំង២ មិនយកផលប្រយោជន៍បក្សពួកខ្លួនមកបាំងមុខ ហើយយកបញ្ហាជាតិជាធំ។
លោកសង្កត់ធ្ងន់ថា បញ្ហាមន្ត្រី សិទ្ធិមនុស្សដែលកំពុងជាប់ពន្ធនាគារ មើលមិនឃើញពីអនាគតនៃសេរីភាពដូចនេះ លោកថា បក្សកាន់អំណាចគ្មានបានផលចំណេញអ្វីទេ ផ្ទុយទៅវិញគឺបានត្រឹមតែការថ្កោលទោសនិងអស់ជំនឿ ពីពលរដ្ឋក៏ដូចជាសហគមអន្ដរជាតិប៉ុណ្ណោះ។ លោក គឹម សុខ ៖«មានន័យថា គាត់រកមិនទាន់ឃើញគន្លឹះណាឈ្នះដោយសុវត្ថិភាព ឬគណបក្សសង្គ្រោះជាតិកាន់តែចុះខ្សោយបើទោះជាមិនបែកបាក់ក៏ដោយ បើគាត់រកមិនឃើញគន្លឹះបែបហ្នឹង គាត់នឹងមិនជជែកដែលគេហៅថា ដើម្បីដោះស្រាយការទាស់ទែងគ្នានិងនាំអ្នកជាប់ឃុំឲ្យមានសេរីភាពបានទេ»។
អ្នកឃ្លាំមើលការអភិវឌ្ឍសង្គមបន្ដថា ប្រសិនបើបក្សកាន់អំណាចនៅតែបន្ដភាពរឹងរូសរបស់ខ្លួនដែលមិនព្រមចរចាគ្នាដើម្បីផ្ដល់យុត្តិធម៌ជូនអ្នកទោសមនសិការទាំងអស់នោះទេ គឺជាការបង្ហាញកាន់តែច្បាស់ថា គណបក្សដឹកនាំប្រទេស មិនបានផ្ដល់តម្លៃដល់ពលរដ្ឋរបស់ខ្លួននិងគោរពគោលការណ៍លទ្ធិប្រជាធិបតេយ្យនោះទេ។
បញ្ហានេះគណបក្សកាន់អំណាចនៅតែប្រកាន់ជំហរថា ខ្លួនធ្វើការគឺយកច្បាប់ជាធំមិនធ្វើអ្វីដែលជ្រុលហួសដែនសមត្ថកិច្ចរបស់ខ្លួនឡើយ។
លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជាមានប្រសាសន៍ថា ការជួបចរចាគ្នារវាងអ្នកនយោបាយ បក្សកាន់អំណាចនៅតែគោរពនិងផ្ដល់តម្លៃជានិច្ច។ ក៏ប៉ុន្ដែគណបក្សនេះមិនព្រមឲ្យកិច្ចសន្ទនា ស្ថិតក្រោមល្បិចរបស់គណបក្សសង្គ្រោះជាតិ ដែលចង់បង្គាប់បញ្ជាបក្សកាន់អំណាចធ្វើអ្វីរំលោភបំពានឯករាជ្យភាពរបស់តុលាការនោះឡើយ។ លោក ឈឹម ផលវរុណ ៖«ដូច្នេះការអំពាវនាវរបស់ប្រជាពលរដ្ឋឬអ្នកនយោបាយណាមួយ ដែលចង់ឲ្យគណបក្សជួបជជែកគ្នាក្នុងគោលដៅចង់ឲ្យដោះលែងទណ្ឌិតឬក៏ដោះលែងពិរុទ្ធជនដែលកំពុងឃុំឃាំងនៅពន្ធនាគារគឺជាសិទ្ធិរបស់អ្នកប៉ុន្ដែសិទ្ធិនេះកំពុងតែស្ថាប័នរដ្ឋបំពាននូវគោលការណ៍ច្បាប់ហើយដូច្នេះមិនបាច់សង្ឃឹមទេ»។
អ្នកស្រី ទេព វន្នី ត្រូវបានអាជ្ញាធរចាប់ដាក់ពន្ធនាគារចំនួន ៣លើកមកហើយ។ ការចាប់ខ្លួនរបស់អ្នកស្រីគឺធ្វើឡើងលើកទីមួយនៅក្នុងឆ្នាំ២០១២ គឺត្រូវឃុំខ្លួនអស់រយៈពេល ១ខែ ៣ថ្ងៃ។ លើកទី២ គឺនៅឆ្នាំ២០១៤ ដែលកាលនោះត្រូវឃុំខ្លួនអស់រយៈពេល ៥ខែ ១ថ្ងៃ និងការឃុំខ្លួនលើកនេះគឺជាលើកទី៣ ដែលរហូតមកដល់ពេលនេះគឺមានរយៈពេលជាង ៤ខែហើយ បើគិតដល់ថ្ងៃទី ១៨ ខែមករា ២០១៧នេះ។
អ្នកស្រី ទេព វន្នី ធ្លាប់បានទទួលពានរង្វាន់ជាច្រើនកន្លងមក ដែលក្នុងនោះក៏មាន ពានរង្វាន់ដ៏ធំមួយពីសហរដ្ឋអាមេរិកផងដែរ គឺជាពានរង្វាន់ស្ត្រីក្នុងភាពជាមេដឹកនាំ៕
