ភ្នំពេញ ៖ នាយករដ្ឋមន្ត្រីកម្ពុជា សម្តេច ហ៊ុន សែន អំពាវនាវដល់អ្នកវិនិយោគទុនស្វីស មកចូលរួមវេទិកាសេដ្ឋកិច្ចពិភពលោកនៅខែឧសភា ឆ្នាំ ២០១៧ ដែលកម្ពុជាធ្វើជាម្ចាស់ផ្ទះ។ការអំពាវនាវនេះ ក្នុងគោលបំណងដើម្បីឱ្យវិនិយោគិនស្វីស មើលឃើញពីឱកាសដ៏មានតម្លៃដើម្បីមកបណ្តាក់ទុននៅក្នុងប្រទេសកម្ពុជា។ នេះបើយោងតាមគេហទំព័រហ្វេសប៊ុករបស់ សម្តេច ហ៊ុន សែន ដែលបានបង្ហោះនៅលើបណ្តាញសង្គមនៅថ្ងៃទី ១៧ ខែមករា ឆ្នាំ២០១៧ នេះ។
តាមប្រភពដដែលបានឱ្យដឹងទៀតថា វេទិកាសេដ្ឋកិច្ចនេះនឹងផ្តល់ឱកាសឱ្យអ្នកវិនិយគទុនស្វីសបានឃើញកាន់តែច្បាស់អំពីឱកាសមាស និងសក្តានុពលទាំងឡាយក្នុងការមកបណ្តាក់ទុនវិនិយោគ។ លើសពីនេះទៀតនោះ កម្ពុជាក៏ចង់បាននូវការចូលរួមជាគំនិតយោបល់ពីថ្នាក់ដឹកនាំនានា និងពីវិស័យឯកជនផ្សេងៗដែលនាំមកនូវការរីកចម្រើនរួមគ្នាសម្រាប់ពិភពលោកទាំងមូល។
ហ្វេសប៊ុករបស់ សម្តេច ហ៊ុន សែន ៖«សម្តេច នាយករដ្ឋមន្ត្រី បានស្វាគមន៍យ៉ាងកក់ក្តៅចំពោះវត្តមានអ្នកវិនិយោគទុនស្វីសទាំងអស់ដែលមានបំណងទៅបណ្តាក់ទុននៅកម្ពុជា។ សម្តេចតេជោ ក៏បានអញ្ជើញអ្នកវិនិយោគទុនស្វីសទាំងអស់ទៅចូលរួមក្នុងវេទិកាសេដ្ឋកិច្ចពិភពលោកឆ្នាំ ២០១៧ ដែលកម្ពុជាធ្វើជាម្ចាស់ផ្ទះ»។
សូមជំរាបថា ការលើកឡើងរបស់សម្តេច ហ៊ុន សែន ដូចនេះធ្វើទ្បើង នៅក្នុងពិធីទទួលទានអាហារសំណេះសំណាលជាមួយបណ្តាក្រុមហ៊ុនល្បីៗនៅប្រទេសស្វីស អំពីបញ្ហាជាច្រើនដែលទាក់ទងទៅនឹងការពង្រឹង និងពង្រីកពាណិជ្ជកម្ម សេដ្ឋកិច្ច និងការរិះរកនូវវិធីសាស្ត្រល្អៗជាច្រើន។ ពិធីនេះ ក៏សំដៅ ពង្រីកទំហំពាណិជ្ជកម្មនៃប្រទេសទាំងពីរកម្ពុជា-ស្វីសឲ្យកាន់តែមានទំហំធំឡើងថែមទៀត ផ្តល់ផលប្រយោជន៍ដល់ប្រជាជាតិនៃប្រទេសទាំងពីរ។
ប្រមុខរដ្ឋាភិបាលកម្ពុជាសម្ដេច ហ៊ុន សែន ទៅចូលរួមកិច្ចប្រជុំវេទិកាសេដ្ឋកិច្ចពិភពលោកនៅប្រទេសស្វិស នេះមានរយៈ ២ ថ្ងៃទី ១៧-១៨ មករា ឆ្នាំ ២០១៧ នេះ៕
