ប្រទេស Lithuania ដែលធ្លាប់រស់នៅក្រោមការគ្រប់គ្រងរបស់អតីតសហភាពសូវៀត បានប្រកាសសង់របងបេតុងព្រំដែនរបស់ខ្លួនជាប់ជាមួយនិងប្រទេសរុស្ស៊ី ដែលជាផលប្រយោជន៍នៃការការពារសន្ដិសុខ នឹងទប់ស្កាត់ការលួចដីព្រំដែនពីសំណាក់ប្រទេសមហាអំណាចមួយនេះ ។
បណ្ដាញផ្សាយព័ត៌មាន BBC បានរាយការណ៍ថា ការប្រកាសរបស់ប្រទេស Lithuania ធ្វើឡើងចំពេលដែលស្ថានការណ៍តានតឹងនៅអឺរ៉ុបខាងកើត ដែលនៅទីនោះកងទ័ពអាមេរិក ក្នុងក្របខណ្ឌអង្គការណាតូបានដាក់ពង្រាយនៅតាមព្រំដែនប្រទេសមួយចំនួន ជាប់និងព្រំដែននៃប្រទេសរុស្ស៊ី មានប្រទេស Lithuania ផងដែរ។
តាមប្រភពដដែល ប្រទេស Lithuania មានព្រំដែនគោកជាមួយប្រទេសរុស្ស៊ី ប្រវែង ១៣៥ គីឡូម៉ែត្រ និងផ្នែកខ្លះមានព្រំដែនទឹកជាប់ជាមួយគ្នា ។
រដ្ឋាភិបាល Lithuania និយាយថា ខ្លួនមានបំណងដូចនេះ ដើម្បីទប់ស្កាត់ការបង្កហេតុណាមួយពីសំណាក់ប្រទេសរុស្ស៊ី ។
លោករដ្ឋមន្ដ្រីមហាផ្ទៃ Lithuania លោក Eimutis Misiunas និយាយថា ព្រំដែនរបស់ខ្លួនតែងតែរងការបង្កហេតុជាញឹកញប់ពីប្រទេសជិតខាងជាពិសេសប្រទេសរុស្ស៊ីដែលធ្លាប់ចូលលុកលុយព្រំដែនរបស់ Lithuania ជាច្រើនលើកមកហើយចាប់តាំងពីឆ្នាំ ២០១៤ រហូតមកដល់ពេលនេះ៕BBC
