ភ្នំពេញ៖ ចាប់ពីថ្ងៃទី១៤ ដល់ថ្ងៃទី១៦ ខែមករា គ.ជ.ប ទទួលបានពាក្យបណ្តឹងចំនួន ១៤១២ករណី ក្នុងនោះបណ្តឹងតវ៉ាចំនួន ៦៥១ករណី និងបណ្តឹងជំទាស់៧៦១ករណី។
លោក ហង្ស ពុទ្ធា បញ្ជាក់ថា ក្នុងចំណោមបណ្ដឹងដែលទទួលបាននោះ មាន១១៨៩បណ្ដឹង ដែលស្នើសុំឲ្យលុបឈ្មោះ ហើយបណ្ដឹងទាំងនេះ ភាគច្រើនបំផុតចេញពី គណបក្សសង្គ្រោះជាតិ។
ចំណែកគណបក្សប្រជាជនកម្ពុជា មានតែ១បណ្ដឹងទេ គឺនៅស្រុកពាមរក៍ ខេត្តព្រៃវែង ដែលបណ្ដឹងនោះគឺសុំរក្សាឈ្មោះអ្នកបោះឆ្នោតចំនួន ១៤នាក់ ដែលគណបក្សសង្គ្រោះបានស្នើឱ្យលុបចេញ។
អ្នកនាំពាក្យរូបនេះបានប្រាប់បន្ដថា ថ្ងៃទី១៧មករានេះ គ.ជ.ប នឹងដោះស្រាយបណ្ដឹង១៦ករណី ថ្ងៃទី១៨ នឹងដោះស្រាយ ១៦ករណី និងថ្ងៃទី១៩ នឹងដោះស្រាយ ២៣ករណី ព្រមទាំងថ្ងៃបន្ដបន្ទាប់ទៀត ដើម្បីបញ្ចប់បណ្ដឹង។បែបនេះក្តី គ.ជ.ប មិនមានពេលវេលាគ្រប់គ្រាន់ ដូចតុលាការនោះទេ ព្រោះ គ.ជ.ប ត្រូវពន្លឿងការងារទៅតាមប្រតិទិន ដែលបានគ្រោងទុក។
ការចុះឈ្មោះបោះឆ្នោតតាមប្រព័ន្ធថ្មីដោយប្រើទិន្នន័យកុំព្យូទ័រ ត្រូវបានមើលឃើញថាមានតម្លាភាពជាង ប្រព័ន្ធចុះឈ្មោះបោះឆ្នោតចាស់ ហើយបញ្ជីឈ្មោះអ្នកបោះឆ្នោតមានបិទរូបថត ទៀតផង។ ការចុះឈ្មោះបោះឆ្នោតថ្មីនេះ ពលរដ្ឋបានទៅចុះឈ្មោះ មានចំនួនជិត៨លានាក់។ ការបោះឆ្នោតលើកនេះផ្អែកលើ ស្នាមមេដៃនិង រូបថត របស់អ្នកបោះឆ្នោត។ អ្នកជំនាញការមកពីប្រទេសជប៉ុន និងអឺរ៉ុប ជាអ្នកជួយ បង្កើត ប្រព័ន្ធទិន្នន័យថ្មីនេះ៕
