ចិន៖ ស្ថិតិទេសចរណ៍មួយរបស់ប្រទេសចិនបានឲ្យដឹងថា ស្ដ្រីជនជាតិចិនបានធ្វើដំណើរកំសាន្ដទៅក្រៅប្រទេសច្រើនជាងបុរស រហូតដល់ទៅ ៦២%។ ស្ថិតិរបស់គេហទំព័រក្រសួងទេសចរណ៍ចិនដែលស្រង់មកចុះផ្សាយដោយគេហទំព័រ Tuniu បានបន្ដថា ស្ដ្រីចិនបានធ្វើដំណើរកំសាន្ដច្រើនជាងបុរសគឺនៅរយៈពេលប៉ុន្មានឆ្នាំចុងក្រោយនេះ ជាពិសេសកើនឡើងខ្ពស់បំផុតនៅឆ្នាំ២០១៦។
តាមគេហទំព័រដដែលប្រទេសដែលស្ដ្រីចិនចូលចិត្ដទៅលេងកំសាន្ដគឺ ថៃ ជប៉ុន កូរ៉េខាងត្បូង បារាំង អ៊ីតាលី ឥណ្ឌូនេស៊ី ញូវហ្សេឡេន អាមេរិក អាល្លឺម៉ង់ និងអូស្ដ្រាលី។
ស្ដ្រីចិនដែលដើរកំសាន្ដក្រៅប្រទេសច្រើនជាងគេគឺមកពីទីក្រុងប៉េកាំង និងទីក្រុងសៀងហៃ ដែលទីក្រុងទាំងពីរនេះពោរពេញដោយអ្នកមានទ្រព្យសម្បត្ដិ។ តាមគេហទំព័រដដែលស្ដ្រីទាំងនោះបានចំណាយប្រាក់ជាច្រើនក្នុងពេលធ្វើដំណើរម្ដងៗគឺច្រើនជាងបុរស៕
