ភ្នំពេញ ៖ លោក សម រង្ស៊ី ប្រធានគណបក្សប្រឆាំង បានបង្ហាញ គោលនយោបាយរបស់បក្ស ដែលលោកសន្យា ចោលរាល់ដីសម្បទានសេដ្ឋ កិច្ចរបស់ឧកញ៉ា ឬក្រុមហ៊ុនបរទេសខិលខូចមួយចំនួន ដើម្បីប្រគល់ជូនប្រជាកសិកររវិញនៅពេលលោកកាន់អំណាច។ ការថ្លែងបែបនេះធ្វើឡើងនៅក្នុងបទអន្តរាគមន៍របស់លោក សម រង្ស៊ី នៅទីក្រុង ប៉ារីស កាលពីថ្ងៃទី១៤ មករា ឆ្នាំ ២០១៧ ដែលបានបង្ហោះក្នុងទំព័រហ្វេសប៊ុករបស់លោកនៅយប់ថ្ងៃទី១៥ មករា ម្សិលមិញ។ យ៉ាងណាមន្ត្រីបក្សកាន់អំណាចថា រដ្ឋាភិបាលបច្ចុប្បន្នបានលុបចោលជាបណ្តើរៗហើយដីសម្ប ទានសេដ្ខកិច្ចរបស់ក្រុមហ៊ុនមួយចំនួន។
លោកថា រដ្ឋាភិបាលថ្មីត្រូវរៀបចំគោលនយោបាយកសិកម្មជូនពលរដ្ឋ តាមរយៈការផ្តស់ជំនួយបច្ចេកទេស រកទីផ្សារកសិផល និងសិក្សាគំរូកសិកម្មពីប្រទេសជិតខាង។ លោក សម រង្ស៊ី៖«យើងត្រូវតែលុបចោលដីសម្បទានដីធ្លី ៩៩ ឆ្នាំដែលដែលរដ្ឋាភិបាលសព្វថ្ងៃឱ្យក្រុមហ៊ុនឯកជន ក្រុមហ៊ុនបរទេស វាតទី រឹបអូស ប្លន់ដីធ្លីប្រជាពលរដ្ឋ។ ជម្រើសខាងគណបក្សកាន់អំណាចគឺពឹងផ្អែកលើក្រុមហ៊ុនឯកជន មានក្រុមហ៊ុនបរទេសជាច្រើនគឺឱ្យក្រុមហ៊ុនទាំងនោះមកគ្រប់គ្រងទឹកដីប្រទេសកម្ពុជា កសិកម្មប្រទេសកម្ពុជា សេដ្ឋកិច្ចប្រទេសកម្ពុជា ធ្វើអញ្ចឹងខុសឆ្គងធ្ងន់ណាស់។ ចង់ប្តូរត្រូវប្តូរនយោបាយហ្នឹង ត្រូវតែប្រគល់សងប្រជារាស្ត្រខ្មែរ ទឹកដីរបស់ខ្មែរមកឱ្យជនជាតិខ្មែរយើងជាម្ចាស់ទឹកម្ចាស់ដីតែមួយគត់»។
អ្វីដែលលោក សម រង្ស៊ី បានគំរាមនេះក៏សម្តេច ហ៊ុន សែន ធ្លាប់បានប្រតិកម្មផងដែរ ដែលសម្តេចព្រមានថា ដកហូតដីសម្បទានសេដ្ឋកិច្ចពីឧក ញ៉ា ឬក្រុមហ៊ុនមកវិញ អាចបង្កឱ្យមានសង្គ្រាមកើតឡើងពីសំណាក់ក្រុមឧកញ៉ា ឬម្ចាស់កក្រុមហ៊ុនទាំងនោះ ក្រោមហេតុផលការពារដីធ្លីរបស់ពួកគេ។
លោក សុខ ឥសាន្ត៖«គឺរដ្ឋាភិបាលបានដំណើរការលុបហើយតើ មិនបាច់ចាំ សម រង្ស៊ី ជាប់ឆ្នោតអី គេលុបបន្តបន្ទាប់ហើយ លុបក្រុមហ៊ុនរាប់សិបដែលមិនបានគោរពកិច្ចព្រមព្រៀងវិនិយោគជាមួយរដ្ឋាភិបាល អាចហ្នឹងគាត់ថាក្រោយទេ»។
នៅកម្ពុជាបញ្ហាដីសម្បទាន បានក្លាយជារឿង អាក្រក់មួយ ព្រោះ តែងតែធ្វើឱ្យពលរដ្ឋរងទុក្ខវេទនា ហើយ បានជាក្លាយជា ល្បែងនយោបាយមួយរបស់បក្សប្រឆាំងឃោសនា រកសំឡេងឆ្នោត ហើយជាល្បែងប្រកបដោយគ្រោះថ្នាក់ទៀតផង បើមិនដោះស្រាយទាន់ពេលវេលានិង មានការសិក្សាត្រឹមត្រូវ។
លោក សូ ចន្ថា សាស្ត្រាចារ្យវិទ្យាសាស្ត្រនយោបាយ លើកឡើងថា ដើម្បីធ្វើការដកហូតដីសម្បទានពីក្រុមហ៊ុន ឬឧកញ៉ា ដោយបញ្ជៀសសង្គ្រាមមិនឱ្យកើតឡើងនោះ គឺត្រូវសិក្សាឱ្យបានច្បាស់លាស់ត្រឹមត្រូវ ដោយដកហូតដីពីក្រុមហ៊ុនណាដែលទន្ទ្រានយកដីរដ្ឋ និងដីពលរដ្ឋដោយអំពើខុស ច្បាប់។ លោក សូ ចន្ថា មើលឃើញថា បច្ចុប្បន្នរដ្ឋាភិបាលបានផ្តល់ដីសម្បទានដល់ក្រុមឯកជនច្រើនហួសហេតុ ខណៈពលរដ្ឋម្ចាស់ស្រុកបែរជាខ្វះខាតដីធ្លីបង្កបង្កើនផលទៅវិញ។ លោក សូ ចន្ថា ៖«គោលនយោបាយនៃការដកហូតដីធ្លីនេះ ខ្ញុំគាំទ្រការដកហូតដីពីក្រុមហ៊ុនមិនសុចរិត ពីអ្នក មានអំណាចដែលតែងតែកាត់យកដីរាស្ត្រ ឬក៏ដីរបស់រដ្ឋយកទៅធ្វើជាកម្មសិទ្ធិឯកជនដើម្បីភាពមានបានដើម្បីក្លាយជាមហាសេដ្ឋីនោះ។ ប៉ុន្តែខ្ញុំមិនគាំទ្រការដកហូតដោយមិនមានមូលហេតុនោះទេបាទ!»។
អ្នកនាំពាក្យក្រសួងកសិកម្មលោក ចាន់ ហេង បានឱ្យដឹងថា ផ្ទៃដីសម្បទានសេដ្ឋកិច្ចដែលរដ្ឋាភិបាលបានផ្តល់ឱ្យក្រុមហ៊ុនវិនិយោគក្នុងឆ្នាំ ២០១៦ មានចំនួន១ ៥៥៣ ០០០ ហិកតា សរុបមាន២០៩ក្រុមហ៊ុន។ ក្នុងនោះក្រុមហ៊ុនដែលទទួលបានដីសម្បទានសេដ្ឋកិច្ចចាប់ពីទំហំធំជាង ១ ពាន់ហិកតាមានសរុប ១៨៨ ក្រុមហ៊ុន ក្នុងនោះមាន ៧៣ ក្រុមហ៊ុនផ្ទេរពីក្រសួងបរិស្ថាន សរុបផ្ទៃដីមាន ១ ៤៨១ ៤៦៨ ហិកតា។ ចំណែកក្រុមហ៊ុនដែលទទួលបានដីសម្បទានសេដ្ឋកិច្ចទំហំតូចជាង ១ ពាន់ហិកតា មាន ៣៤ ក្រុមហ៊ុន មានផ្ទៃដីសរុប ២៤៦៤០ ហិកតា ។ រីឯក្រុមហ៊ុនកំពុងដំណើរចុះបញ្ជីចំនួន ៧ ទៀត បានទទួលដីសម្បទានសេដ្ឋកិច្ច ចំនួន ៤៦៤៧៩ ហិកតា៕
