ភ្នំពេញ៖ ក្រសួងសុខាភិបាលបានអំពាវនាវឲ្យប្រជាពលរដ្ឋមានប្រុងប្រយ័ត្នកុំយកសត្វមាន់ ទា ឬ សត្វបក្សី ឈឺ ឬងាប់ យកមកលក់ ឬ មកចំអិនម្ហូបសម្រាប់ឱកាសពិធីចូលឆ្នាំចិន វៀតណាម ដែលនឹងប្រារព្ធធ្វើនៅចុងខែ មករា ឆ្នាំ ២០១៧នេះ។
ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល និងជាអ្នកនាំពាក្យ លោក លី សូវ៉ាន់ បានសរសេរនៅលើបណ្តាញសង្គមហ្វេសប៊ុកថា ការរីករាលដាលនៃជំងឺផ្តាសាយបក្សីនៅប្រទេសកូរ៉េខាងត្បូង និងប្រទេសជប៉ុន បានបណ្តាលឲ្យអាជ្ញាធរទាំងពីរប្រទេសនេះ បានសម្លាប់សត្វបក្សីជាង២០លានក្បាល ដើម្បីបង្ការជំងឺផ្តាសាយបក្សីឆ្លងរាតត្បាតមកមនុស្ស។
ករណីនេះ លោក លី សូវ៉ាន់ អំពាវនាវឲ្យប្រជាពលរដ្ឋសូមកុំយកមាន់ ទា ឬ សត្វបក្សីឈឺឬ ងាប់ មកធ្វើ ម្ហូប ឬ ដាក់លក់នៅលើទីផ្សារ។ លោកថា ប្រជាពលរដ្ឋត្រូវចំអិនប្រកបដោយអនាម័យជានិច្ច។
លោក លី សូវ៉ាន់៖«សូមបងប្អូនមានការប្រុងប្រយ័ត្នខ្ពស់ ក្នុងពិធីចូលឆ្នាំចិន វៀតណាម ដែលនឹងឈានមកដល់ក្នុងពេលឆាប់ៗនេះ សូមបងប្អូនប្រុងប្រយ័ត្នជានិច្ចអំពី ការចំលងជំងឺផ្តាសាយបក្សី។ សូមកុំយកមាន់ ទា ឬសត្វបក្សីឈឺឬងាប់ មករៀបចំជាអាហារ ឫលក់បន្ត ត្រូវអនុវត្តអនាម័យក្នុងការ បោចរោម និង ចំអិនជាប់ជានិច្ច»។
លោក សូវ៉ាន់ បន្ថែមថា រោគសញ្ញាគ្រុនក្តៅ លើសពី ៣៨.៥ អង្សារសេ ក្អក ឈឺ ក ដកដង្ហើម ហត់ រួមទាំងប្រវត្តិប៉ះពាល់ជាមួយបក្សីឈឺ ឬងាប់ នៅមុនពេលចេញរោគសញ្ញា ចំនួន ៧ ថ្ងៃ។ លោកថា ប្រសិនបើប្រជាពលរដ្ឋ មានអាការៈសង្ស័យដូចរាប់ខាងលើ សូមបញ្ជូនអ្នកជំងឺទៅមណ្ឌលសុខភាពឲ្យបានលឿនបំផុត ឬ ទូរស័ព្ទទាក់ទងទៅលេខ ១១៥។
លោក សូវ៉ាន់ បញ្ជាក់ថា ចាប់តាំងពីឆ្នាំ ២០១៣ រហូតដល់ ឆ្នាំ ២០១៦ ប្រទេសកម្ពុជាធ្លាប់បានឆ្លងជំងឺ ផ្តាសាយបក្សីប្រមាណ ៩១ ករណី ដោយបានបណ្តាលឲ្យស្លាប់ប្រមាណ ៥៥ នាក់៕
