ភ្នំពេញ ៖ នាយករដ្ឋមន្ត្រីសម្ដេច ហ៊ុន សែន បានរិះគន់អ្នកសារព័ត៌មានមួយចំនួនថា តាំងខ្លួនជាចៅក្រមជំនួសតុលាការ ខណៈបានធ្វើអត្ថា ធិប្បាយព្យាករណ៍ទុកហួសពីដែនសមត្ថកិច្ចតុលាការទៅទៀត។ ការថ្លែងដូចនេះធ្វើឡើងក្នុងវេទិកាជួបជុំជាមួយអ្នកសារព័ត៌មាន កាលពីល្ងាចថ្ងៃសៅរិ៍ទី១៤ មករា នៅសណ្ឋាគារសុខា ក្នុងរាជធានីភ្នំពេញ។ យ៉ាងណាអ្នកជំនាញសារព័ត៌មានមួយចំនួនយល់ស្របតាមការលើកឡើងរបស់នាយករដ្ឋមន្ត្រី តែពេលខ្លះអ្នកសារព័ត៌មានអាចសរសេរអត្តបទបែបទស្សនៈ ឬ វិភាគដោយព្យាករណ៍លទ្ធផលទុកបាន។
យ៉ាងណាក៏ដោយប្រមុខរដ្ឋាភិបាលនិងជាប្រធានគណបក្សប្រជាជនកម្ពុជារូបនេះថ្លែងថា មិនមែនជាការប្រដៅ ឬស្ដីបន្ទោសអ្វីទេ គឺ ហៅមកជួបគ្នាដើម្បីជាការលើកទឹកចិត្តវិជ្ជាជីវៈកាន់តែរឹងមាំនិងមានប្រយោជន៍។ តែជាមួយគ្នានេះ សម្ដេចនៅតែសន្យាបើកចំហសេរីភាពសារព័ត៌មានដដែល។
ជុំវិញប្រសាសន៍របស់សម្តេចនេះ អ្នកជំនាញផ្នែកសារព័ត៌មានបានបង្ហាញជំហរគ្រាំទ្រថា ពិតជាមានអ្នកសារព័ត៌មានមួយចំនួនប្រើប្រាស់តួនាទីហួសព្រំដែនជាអ្នករាយការណ៍ព័ត៌មាន។
សាស្ត្រចារ្យផ្នែកសារព័ត៌មាន លោក មឿន ឈានណារិទ្ធ ហាក់ទទួលស្គាល់ថា ក្រមសីលធម៌វិជ្ជាជីវៈអ្នកសារព័ត៌មាននៅប្រទេសកម្ពុជា នៅមានកម្រិតនៅឡើយ។ លោក ឈាន ណារិទ្ធ យល់ថា ពេលខ្លះអ្នកសារព័ត៌មានក៏តួនាទីដូចជាចៅក្រម ឬ តុលាការបានដែរ តែអ្នកសារព័ត៌មានមិនមានឆន្ទានុសិទ្ធិដូចចៅក្រម និងតុលាការឡើយ។ លោក មឿន ឈានណារិទ្ធ៖«សារព័ត៌មានជាតុលាការជម្រើសចុងក្រោយ ប្រសិនបើមានអំពើអយុត្តិធម៌ ក្រុមហ៊ុន ទៅដណ្តើប់យកដីធ្លីរបស់ប្រជាពលរដ្ឋ ខាងក្រុមហ៊ុនគេអាងគេមានមេធាវី មានលុយកាកច្រើនអញ្ចឹងគេតែងតែឈ្នះ ប៉ុន្តែប្រជាពលរដ្ឋក្រីក្រគាត់គ្មានអ្នកណាពឹងទេ មានតែអ្នកសារព័ត៌មាន…..យើងធ្វើព័ត៌មានបែបស៊ើបអង្កេតទៅ ភស្តុតាំងគ្រប់គ្រាន់បានបញ្ជាក់ថា ដីធ្លីដែលមានវិវាទជារបស់ពលរដ្ឋ ធ្វើឲ្យអាជ្ញាធរ ក៏ដូចតុលាការ គាត់ធ្វើការសម្រេចចិត្តដោយយុត្តិធម៌ សម្រេចបានយ៉ាងត្រឹមត្រូវ»។
អ្នកជំនាញផ្នែកសារព័ត៌មានម្នាក់ទៀត លោក ប៉ែន បូណា ប្រធានក្លឹមអ្នកការសែតកម្ពុជា ក៏យល់ស្របទៅប្រសាសន៍របស់សម្តេចដែរថា អ្នកសារ ព័ត៌មានមិនត្រូវដើរតួនាទីជាចៅក្រម ឬ តុលាការឡើយ។ ប៉ុន្តែលោកថា អ្នកសារព័ត៌មានអាចសរសេរអត្តបទបែបទស្សនៈ ឬ វិភាគ។ លោក ប៉ែន បូណា៖«យើងអ្នកការសែត យើងមានតួនាទីត្រឹមរាយការណ៍ព័ត៌មាន ហើយអាចផ្តលបទវិភាគផ្តល់ហេតុផល ឬ យើងគិតថា ជាផ្តល់ដំណោះ ស្រាយ ជាគំនិតរបស់យើង គំនិតរបស់អ្នកវិភាគផ្សេងៗ តែយើងមិនអាចកាត់សេចក្តី.. មានជម្លោះពីរនាក់ ស្រាប់តែ អ្នកនេះខុស អ្នកត្រូវ អញ្ចឹង វាមិនត្រឹមត្រូវតាមអាជីពវិជ្ជាជីវៈទេ»។
យ៉ាងជំនួបជាប្រវត្តិសាស្ត្ររវាងសម្តេច ហ៊ុន សែន និងអ្នកសារព័ត៌មាននេះ ប្រមុខរដ្ឋាភិបាលកម្ពុជាក៏បានណែនាំឱ្យអ្នកសារព័ត៌មានត្រូវប្រកាន់វិជ្ជាជីវៈរបស់ខ្លួនដោយមិនត្រូវលក់វិជ្ជាជីវៈជាមួយនឹងការបញ្ចប់រឿងរបស់ខ្លួនដែលកំពុងបំពេញ ហើយត្រូវហ៊ានកែតម្រូវបើមានកំហុសណាមួយនោះ៕
