ភ្នំពេញ ៖ ក្រសួងបរិស្ថានបានចេញសេចក្តីបំភ្លឺបដិសេធទៅនឹងរបាយការណ៍របស់អង្គការ NASA ចំពោះទិន្នន័យ ១៤,៤ ភាគរយថា មិនមែនជាអត្រាបាត់បង់គម្របព្រៃឈើមធ្យមប្រចាំឆ្នាំ ចាប់ពី ឆ្នាំ ២០០១ ដល់ឆ្នាំ ២០១៤នោះទេ។ ជុំវិញការបដិសេធរបស់ក្រសួងបរិស្ថាននេះ អ្នកការពារធនធានធម្មជាតិរិះគន់ថា គ្រាន់តែជាលេសឆ្លើយការពាររដ្ឋាភិបាលប៉ុណ្ណោះ។
ចេញសេចក្តីបំភ្លឺក្រសួងបរិស្ថាន៖«ក្រសួងបានបញ្ជាក់ថា ទិន្នន័យ ១៤,៤ ភាគរយ របស់អង្គការNASA នេះ គឺ បង្ហាញពីអត្រាកំណើនមធ្យមប្រចាំឆ្នាំនៃការបាត់បង់គម្រមព្រៃឈើ ដែលមិនមែនជាអត្រាបាត់បង់គម្របព្រៃឈើមធ្យមប្រចាំឆ្នាំ ចាប់ពី ឆ្នាំ ២០០១ ដល់ឆ្នាំ ២០១៤នោះទេ»។
បើយោងតាមសេចក្តីបំភ្លឺរបស់ក្រសួងបរិស្ថានបានបន្ថែមថា របាយការណ៍របស់អង្គការ NASA ស្តីពី«ព្រៃឈើកម្ពុជាកំពុងបាត់បង់» បានចុះផ្សាយម្តងរួចមកហើយកាលពីខែ កញ្ញា ឆ្នាំ ២០១៥។
ជុំវិញក្រសួងបរិស្ថានបដិសេធរបាយការណ៍អង្គការ NASAនេះ សកម្មជនព្រៃឈើ បានហៅការបដិសេធរបស់ក្រសួងថាគ្រាន់តែលេសដើម្បីឆ្លើយការពាររដ្ឋាភិបាលប៉ុណ្ណោះ។
ព្រះតេជគុណ ប៊ុត ប៊ុនទិញ ស្ថាបនិកបណ្ដាញព្រះសង្ឃឯករាជ្យ និង ជាសកម្មជនព្រៃឈើមានថេរដីកាថា រដ្ឋាភិបាលគួរតែទទួលស្គាល់អំពីការកាប់បំផ្លាញ់ព្រៃឈើយ៉ាងគំហុកនាពេលបច្ចុប្បន្ននេះ។ ព្រះតេជគុណ ប៊ុត ប៊ុនទិញ៖«ស្រុកខ្មែរមានការកាប់បំផ្លាញ់យ៉ាងគំហុក ហើយការឆ្លើយយ៉ាងដូច្នេះ គ្រាន់តែជាការពារ ហើយលាងនៅកំហុសរបស់ខ្លួនដែលអសមត្ថភាពក្នុងការទប់ស្កាត់ ការកាប់បំផ្លាញ់ព្រៃ ប្រជាជនខ្មែរមួយនរគដឹងតើថា ព្រៃឈើវាអស់ ហើយការទប់ស្កាត់បានតិចតួចបំផុត។ រដ្ឋាភិបាលបើមែនតែនតាមអត្មាគិតថាមិនគួរឆ្លើយបដិសេធ និងសម្តែងការសោក ស្តាយទេ គួរតែនិយាយពីការប្រឹងប្រែងនិងការចូលរួមទប់ស្កាត់ ហើយទទួលស្គាល់ថា ស្រុកខែ្មរមានការកាប់បំផ្លាញ់ព្រៃឈើមែន»។
លោក តឹក វណ្ណារ៉ា ប្រធានវេទិការអង្គការមិនមែនរដ្ឋាភិបាលស្តីពីកម្ពុជា ហៅថា NGOFUROM បានផ្តល់បទសម្ភាសន៍ដល់វិទ្យុស្ត្រីថា តាមរបាយការណ៍មួយសិក្សាដោយអ្នកឯករាជ្យបានបង្ហាញថា ព្រៃឈើនៅកម្ពុជាមានចំនួន ២៨ ភាគរយ លើផ្ទៃដីទូទាំំងប្រទេស។ លោកថា ចំនួននេះ ហាក់ដូចជាផ្ទុយទៅនិងរបាយការណ៍របស់រដ្ឋាភិបាលកម្ពុជាដែលរកឃើញថា ព្រៃឈើប្រទេសកម្ពុជាមានចំនួន ៦០ ភាគរយ។
ទោះបីជាយ៉ាងនេះក្តី លោក សុវណ្ណារ៉ា ថាចំនួនព្រៃឈើកម្ពុជាមានការថយចុះយ៉ាងពិតប្រាកដ។ លោក តឹក វណ្ណារ៉ា៖«ខាងរបាយការណ៍របស់រដ្ឋាភិបាលលោកថា គម្របព្រៃឈើមាន ៦០ ភាគរយ ហើយក្នុងរបាយការណ៍មួយចំនួនទៀត គម្របពញរៃឈើសល់ ៤៨ ភាគរយ។ ហើយរបាយការណ៍ចុងក្រោយ របាយការណ៍ចុងក្រោយ របាយការណ៍ទី៣ សិក្សាដោយអ្នកឯករាជ្យពីខាងក្រៅថា ព្រៃឈើ ២៨ភាគរយនៃផ្ទៃប្រទេស អញ្ចឹងរបាយការណ៍និងមានលក្ខណៈខុសគ្នាដែរទាំង៣របាយការណ៍នេះ ដោយយោងទៅតាមទំហំ វិធីសាស្ត្រ នៃការស្រាវជ្រាវ»។
តាមលោក តឹក វណ្ណារ៉ា ប្រធានវេទិការអង្គការមិនមែនរដ្ឋាភិបាលស្តីពីកម្ពុជា ហៅថា NGO FUROM បញ្ជាក់ថា បញ្ហាចម្បងជាងគេនៃការបាត់បង់ព្រៃឈើ គឺមកពីការផ្តល់ដីសម្បទានសេដ្ឋកិច្ច។ លោកថា តាមរបាយការណ៍របស់អង្គការលោកបានរកឃើញថា រដ្ឋាភិបាលបានផ្តល់សិទ្ធិវិនិ យោគដីសម្បទានសេដ្ឋកិច្ចទៅឲ្យក្រុមហ៊ុនចំនួន ២៦៧ ក្រុមហ៊ុន លើទំហំផ្ទៃដីជាង ១ លាន ៥ សែន ហិកតា ចាប់តាំងពីឆ្នាំ ១៩៩៥ រហូតមកដល់ ឆ្នាំ ២០១៥។ តែយ៉ាងណាលោកថា រដ្ឋាភិបាលបានខិតខំប្រឹងប្រែងការពារទប់ស្កាត់បទល្មើសព្រៃឈើ និងធ្វើកំណែទម្រង់ដីសម្បទានសេដ្ឋកិច្ចនៅប៉ុន្មានឆ្នាំចុងក្រោយនេះ៕
