ភ្នំពេញ៖ ភ្នាក់ងារអង្កេតការណ៍ចុះឈ្មោះបោះឆ្នោតរបស់គណបក្សសង្គ្រោះជាតិ នៅការិយាល័យបោះឆ្នោតសង្កាត់អូរឫស្សីទី ១ បានសម្រេចប្តឹងទៅគណៈកម្មាធិការរៀបចំការបោះឆ្នោតរាជធានី ករណីមិនលុបឈ្មោះជនបរទេសនៅក្នុងបញ្ជីបោះឆ្នោតក្រុមប្រឹក្សាឃុំសង្កាត់ឆ្នាំ ២០១៧។ យ៉ាងណា ចៅសង្កាត់បានបើកឱ្យប្ដឹងរឿងនេះថែមទៀតទៅថ្នាក់លើ។
យ៉ាងតិចជនបរទេសចំនួន ៧១នាក់ ដែលសង្ស័យថា ជាពលរដ្ឋវៀតណាម ត្រូវបានភ្នាក់ងារអង្កេតការចុះឈ្មោះបោះឆ្នោតរបស់បក្សប្រឆាំងនេះ បានប្ដឹងសុំលុបឈ្មោះចេញពីបញ្ជីឈ្មោះបោះឆ្នោត។
លោក ជី សុខល ភ្នាក់ងារអង្កេតការបោះឆ្នោតរបស់គណបក្សសង្គ្រោះជាតិ បានឲ្យដឹងនៅថ្ងៃទី ១៣ ខែ មករានេះថា ចៅសង្កាត់អូរឫស្សីទី ១ បានបដិសេធមិនលុបឈ្មោះជនបរទេសចំនួន ៤៨នាក់ នៅក្នុងចំណោមជនបរទេស ៧១ នាក់។
ករណីមិនលុបឈ្មោះនាំឲ្យលោក ជី សុខល ភ្នាក់ងារអង្កេតការបោះឆ្នោតគណបក្សប្រឆាំងសម្រេចប្តឹងបន្តទៅគណៈកម្មាធិការរៀបចំការបោះឆ្នោតរាជធានី។ លោក ជី សុខល៖«ខ្ញុំរក្សា និងតម្កល់ពាក្យបណ្តឹងខ្ញុំ បញ្ជូនបន្តទៅទៀត ដោយខ្ញុំ ប្រហែលជាធ្វើលិខិតផ្ទេរសិទ្ធិជូនទៅមេធាវី»។
ទោះបីយ៉ាង លោក សុខល បានសម្រេចដកពាក្យចំនួន ២៣ នាក់ ស្ថិតនៅក្នុងចំណោមមនុស្ស ៧១ នាក់ ព្រោះពួកគេជាពលរដ្ឋខ្មែរកម្ពុជាក្រោម។
ក្នុងសវនាការនេះ ចៅសង្កាត់អូរឫស្សីទី១ សម្រេចមិនលុបឈ្មោះដែលគេសង្ស័យ ដោយសំអាងថា អ្នកទាំំងនោះ មានឯកសារត្រឹមត្រូវស្របតាមលក្ខខ័ណ្ឌរបស់គណៈកម្មាធិជាតិរៀបចំការបោះឆ្នោត(គ.ជ.ប) អាចរក្សាឈ្មោះពួកគេនៅក្នុងបញ្ជីឈ្មោះបោះឆ្នោតថ្មី។ លោកស្រី ភួង លក្ខិណា ចៅសង្កាត់រងទីមួយ លើកឡើងថា ក្នុងសំណុំរឿងនេះច្បាប់ មិនបានបើកសិទ្ធិទូលំទូលាយនោះ ទេ។ លោកស្រី ភួង លក្ខិណា៖«សង្កាត់ខ្ញុំគ្រាន់តែបំភ្លឺថា ការចុះឈ្មោះបោះឆ្នោតមានអ្វីខ្លះ ឯកសារ ភស្តុតាង អ្វីខ្លះ បើមានគ្រប់គ្រាន់វាចប់ ហើយបើលោកចង់សួរដេញដោលជននិងអន្តោប្រវេសន៍ ឬជនបរទេស បញ្ហានិងពេលចប់សវនាការគឺ លោកអញ្ជើញឡើងទៅលើទៀត ព្រោះនេះជាថ្នាក់លើ ហួសដែនសមត្ថិកិច្ចសង្កាត់ហើយ»។
ការដោះស្រាយបណ្ដឹងចុះឈ្មោះបោះឆ្នោតគឺជាផ្នែកមួយនៃការជួយបន្ថយវិវាទការបោះឆ្នោតខាងមុខ ។ បើបណ្ដឹងមានភស្តុតាងគ្រប់គ្រាន់ហើយបែរជាទាត់ចោល គឺជាបញ្ហាចាស់ដដែលៗ។
លោក សំ គន្ធាមី សវនាការក្រុមប្រឹក្សាឃុំសង្កាត់ធ្វើឡើង ទាំងនៅរាជធានីភ្នំពេញ និងតាមខេត្តមួយចំនួនកាលពីថ្ងៃព្រហស្បតិ៍ទី ១២ មករា ឃើញថា ឈ្មោះជនបរទេសមានក្នុងបញ្ជីឈ្មោះបោះឆ្នោត ដែលអ្នកសង្កេតការណ៍បក្សប្រឆាំងសុំលុបនៅតែរក្សាទុកដដែល។
ពលរដ្ឋខ្មែរដែលបានចុះឈ្មោះបោះឆ្នោត លើប្រព័ន្ធទិន្នន័យកុំព្យូទ័រ សម្រាប់ការបោះឆ្នោតក្រុមប្រឹក្សាឃុំសង្កាត់ នៅថ្ងៃទី៤ មិថុនាឆ្នាំ ២០១៧ មានជិត ៨ លាននាក់៕
