ភ្នំពេញ៖ ទីបំផុតទៅ សភាស៊ើបសួរសាលាឧទ្ឋរណ៍បានសម្រេចដោះលែង ប្រធានសមាគមពង្រឹងសេដ្ឋកិច្ចក្រៅប្រព័ន្ឋប្រចាំក្រុងប៉ោយប៉ែត លោក ឌិន ពុទ្ឋី បន្ទាប់ពីបើកសវនាការនៅព្រឹកថ្ងៃទី១៣ មករា ២០១៧។ ការដោះលែងនេះតាមបណ្តឹងរបស់លោក គីម សុជាតិ មេធាវីការពារក្តីឲ្យលោក ឌិន ពុទ្ឋី។
លោក សុំ ចាន់គា មន្ត្រីសិទ្ធិមនុស្សអាដហុកប្រចាំខេត្តបន្ទាយមានជ័យ ដែលតាមដានរឿងក្ដីរបស់លោក ឌិន ពុទ្ឋី បានឱ្យវិទ្យុស្ត្រីដឹងថា លោក ឌិន ពុទ្ឋី ត្រូវបានដោះលែង ម៉ោង ៨នៅព្រឹកនៅថ្ងៃនេះប៉ុន្តែលោកថាការដោះលែងនេះគ្រាន់ជាបណ្ដោះអាសន្នប៉ុណ្ណោះ។
ប្រធានសមាគមពង្រឹងសេដ្ឋកិច្ចក្រៅប្រព័ន្ឋ ប្រចាំក្រុងប៉ោយប៉ែត រងការចោទថាបានបើករថយន្តបុកលោក វរៈសេនីយ៍ត្រី ឈាន ពិសិដ្ឋ នាយករងប៉ុស្តិ៍នគរបាល អន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត កាលពីព្រឹកថ្ងៃទី២២ធ្នូ២០១៦។
ការដោះលែងលោក ឌិន ពុទ្ឋី ក៏គាប់ជួនបណ្ដាញសង្គម និងពលរដ្ឋ តវ៉ាយ៉ាងខ្លាំង ដោយចាត់ទុក ជារឿងអយុត្តិធម៌៕
