រដ្ឋមន្ត្រីក្រសួងការពារជាតិកម្ពុជា លោក ទៀ បាញ់ និងសមភាគីវៀតណាមលោក Ngo Xuan Lich បានចុះហត្ថលេខារួមគ្នា លើគំរោងសហប្រតិបត្តិការវិស័យការពារជាតិ សម្រាប់ឆ្នាំ២០១៧។
តាមសារព័ត៌មាន កងទ័ពប្រជាជន នៃប្រទេសវៀតណាម ការចុះហត្ថលេខារួមគ្នានេះ ធ្វើឡើង នៅទីក្រុងហាណូយ ដែលសារព័ត៌មាននេះបានចុះផ្សាយ កាលពីថ្ងៃពុធ ទី១១ ខែមករា ឆ្នាំ២០១៧។
តាមប្រភព ជំនួបនេះបានធ្វើឡើងនៅទីស្នាក់ការនៃទីបញ្ជាការយោធាជាន់ខ្ពស់ភូមិភាគ០៥ ទីដែលលោក ទៀ បាញ់ និងគណៈប្រតិភូកម្ពុជាបានទៅធ្វើទស្សនកិច្ចដើម្បីរឹតចំណងសាមគ្គីភាព ទ្វេភាគី។
ក្នុងឱកាសនោះលោក ទៀ បាញ់ បានអរគុណ ចំពោះការជួយជ្រោមជ្រែងរបស់ភាគីវៀតណាម នៅអំឡុងគ្រាលំបាករបស់កម្ពុជាប្រឆាំងនឹងរបបប្រល័យពូជសាសន៍ ប៉ុល ពត និងបុព្វហេតុនៃការកសាងជាតិ។
នៅពេលនោះដែរ រដ្ឋមន្ត្រីក្រសួងការពារជាតិវៀតណាម លោក Ngo Xuan Lich ក៏បានអរគុណ កម្ពុជា ក្នុងការបញ្ជូនសាកសព ទាហានស្ម័គ្រចិត្ត និងក្រុមអ្នកជំនាញការវៀតណាមទៅ ប្រទេសពួកគេវិញ។
ក្នុងការពង្រឹង ចំណងទាក់ទងទ្វេភាគីនេះ គឺចាប់តាំងពីឆ្នាំ ១៩៨០មក ប្រទេសវៀតណាម បាន ទទួលហ្វឹកហ្វឺន កងទ័ពកម្ពុជា បាន ១៥០០០នាក់ នៅលើទឹកដីវៀតណាម៕ប្រភព:People Army News Paper
