ភ្នំពេញ៖ របាយការណ៍ស្រាវជ្រាវជាសកលមួយរបស់អង្គការអាមេរិក Nasa បានរកឃើញថា ប្រទេសកម្ពុជា មានអត្រាលឿនបំផុតនៃការបាត់បង់ព្រៃឈើ ក្នុងចំណោមប្រទេសដែលបាត់បង់ព្រៃឈើនៅលើពិភពលោក។
ការរកឃើញនេះ បន្ទាប់ពីក្រុមអ្នកវិទ្យាសាស្ដ្រមកពីសាកលវិទ្យាល័យ Maryland និង អ្នកឃ្លាំមើលជាសកលនៃព្រៃឈើរបស់វិទ្យាស្ថានធនធានពិភពលោកដែលត្រូវបានគេប្រើប្រាស់ទិន្នន័យផ្កាយរណប ដើម្បីតាមដាននៃអត្រាបាត់បង់ព្រៃឈើ នៅលើមាត្រដ្ឋានពិភពលោក។
តាមរបាយការណ៍ដដែលនោះ បើទោះបីជាប្រទេសផ្សេងទៀតបានបាត់បង់ព្រៃឈើច្រើនហិចតាបន្ថែមទៀតនៅក្នុងប៉ុន្មានឆ្នាំចុងក្រោយនេះ ប៉ុន្ដែប្រទេសកម្ពុជាបានឈរនៅលំដាប់ដែលបាត់បង់ព្រៃឈើលឿនជាងគេនៅក្នុងពិភពលោក ដោយសារការកាប់បំផ្លាញរបស់មនុស្ស។
ផ្អែកលើរបាយការណ៍របស់អង្គការអន្ដរជាតិ Nasa ដែលចេញផ្សាយនៅថ្ងៃទី១០មករា ឆ្នាំ ២០១៧ ដដែល រវាងឆ្នាំ 2001 និងឆ្នាំ 2014 អត្រានៃការបាត់បង់ព្រៃឈើប្រចាំឆ្នាំក្នុងប្រទេសកម្ពុជាបានកើនឡើង 14,4 ភាគរយ។ បើគិតជាតួលេខ ប្រទេសនេះបានបាត់បង់ព្រៃឈើសរុបចំនួន 1,44 លានហិកតាឬ 5560 ម៉ែត្រការ៉េ។
ប្រទេសផ្សេងទៀតដែល បាត់បង់ព្រៃឈើ មានតួលេខច្រើន បន្ទាប់ពីប្រទេសកម្ពុជា រួមមានសៀរ៉ាឡេអូន (12,6 ភាគរយ), ម៉ាដាហ្គាស្ការ (8,3 ភាគរយ), អ៊ុយរូហ្គាយ (8,1 ភាគរយ) និងប៉ារ៉ាហ្គាយ (7,7 ភាគរយ) ។
តាមការរកឃើញរបស់អង្គការ Nasa មូលហេតុនៃការបាត់បង់ព្រៃឈើយ៉ាងរហ័សរបស់កម្ពុជា គឺ ដោយសារការសម្បទានដី ដែលត្រូវបានជួលដោយរដ្ឋាភិបាលកម្ពុជាដល់វិនិយោគិនក្នុងស្រុកនិងបរទេសសម្រាប់កសិកម្ម ផលិតកម្មឈើដោយខុសច្បាប់និងស្របច្បាប់ ហើយការកាប់ព្រៃ យកដីដាំកៅស៊ូក៏ជាផ្នែកមួយនាំអោយកម្ពុជាបាត់បង់ព្រៃឈើយ៉ាងឆាប់រហ័សផងដែរ៕
