ភ្នំពេញ ៖ ស្ត្រីក្នុងជម្លោះដីធ្លីជាច្រើនសហគមន៍បានជួបជុំគ្នាខាងមុខក្រសួងមហាផ្ទៃ ដើម្បីសុំកិច្ចអន្តរាគមន៍ពីសម្តេច ស ខេង ជួយដោះលែងមន្ត្រីសិទ្ធិមនុស្ស និងស្ត្រីបឹងកក់អ្នកស្រី ទេព វន្នី ដែលកំពុងជាប់ឃុំក្នុងពន្ធនាគារ។
ការរកសុំកិច្ចអន្តរាគមន៍ពីសម្តេច ស ខេង ដូចនេះបន្ទាប់ពីពួកគាត់ដឹងថា សម្តេច ស ខេង គ្រោងជួបមេបក្សប្រឆាំង ដើម្បីដោះស្រាយបញ្ហាមួយចំនួន។ ការស្នើសុំដូចនេះធ្វើទ្បើងនៅព្រឹកថ្ងៃទី ១០ ខែមករា ឆ្នាំ២០១៧។
ក្នុងចំណោមស្ត្រីទាំងនោះគឺកញ្ញា សុង ស្រីលាភ មកពីសហគមន៍បឹងកក់ បាននិយាយថា ពួកគាត់មកក្រសួងមហាផ្ទៃនៅថ្ងៃនេះ គឺដើម្បីយកញត្តិដាក់ជូនសម្តេច ស ខេង ឱ្យជួយអន្តរាគមន៍ដោះលែងមន្ត្រីសិទ្ធិមនុស្ស និងអ្នកស្រី ទេព វន្នី ឱ្យមានសេរីភាពទ្បើងវិញ។
កញ្ញាស្រី លាភ សង្ឃឹមថាសម្ដេច ស ខេង នឹងយកញត្តិរបស់សហគមន៍ទៅពិចារណាព្រោះសម្តេច ស ខេង ត្រូវជួបជាមួយបក្សប្រឆាំងដើម្បីដោះស្រាយរឿងសកម្មជនសិទ្ធិមនុស្ស និង អ្នកស្រី ទេព វន្នី។ កញ្ញា ស្រីលាភ៖«សម្រាប់ពួកខ្ញុំបើសិនពួកគាត់ទាំងពីរមានឆន្ទះដូចគ្នាហើយមានគោលបំណងបង្កើននូវតុលាការមួយឯករាជ្យហើយបំពេញឱ្យប្រទេសហ្នឹងប្រកាន់លទ្ធិប្រជាធិបតេយ្យពេញលេញគាត់នឹងចូលរួមក្នុងការផ្តល់យុត្តិធម៌សេរីភាពសម្រាប់អ្នកស្រីទេព វន្នីក៏ដូចជាអង្គការសង្គមស៊ីវិល នៅពេលពួកគាត់ជួបចរចា»។
ចំណែកអ្នកស្រី បូវ សោភា ដែលបានប្រគល់ញត្តិដល់ដៃមន្ត្រីក្រសួងមហាផ្ទៃលើកទ្បើងថា ការឃុំខ្លួនមន្ត្រីសិទ្ធិមនុស្ស និងអ្នកស្រី ទេព វន្នី នៅក្នុងពន្ធនាគារគឺជារឿងនយោបាយ។ អ្នកស្រី បូវ សោភា ៖«ជាធម្មតាខាងលោកឧបនាយករដ្ឋមន្ត្រី ស ខេង គាត់តែងតែមានការផ្តល់ក្តីសង្ឃឹមជូនប្រជាពលរដ្ឋរងគ្រោះ មិនថាសម្រាប់ប្រជាពលរដ្ឋរងគ្រោះនៅតំបន់បឹងកក់ឬមួយប្រជាសហគមន៍នៅកន្លែងណាទេ និយាយរួមទៅទីនេះគឺជាក្តីសង្ឃឹមយ៉ាងមុតមាំរបស់ពួកខ្ញុំលោកឧនាយករដ្ឋមន្ត្រីស ខេង គាត់នឹងផ្តល់យុត្តិធម៌អ្នកស្រីទេព វន្នី និងសង្គមស៊ីវិលឱ្យមានសេរីភាពក្នុងពេលឆាប់ៗនេះ »។
ប្រធានគ្រប់គ្រងការិយាល័យស៊ើបអង្កេតសិទ្ធិមនុ្សនៃអង្គការលីកាដូ លោក អំ សំអាត ដែលបានតាមដានឃ្លាំមើលពីការដាក់ញត្តិនេះ មានប្រ សាសន៍ថា រាជរដ្ឋាភិបាលត្រូវពន្លឿនការដោះស្រាយបញ្ហានេះឱ្យបានឆាប់តាមតែអាចធ្វើទៅបាន បើនៅតែអូសបន្លាយទៀត នោះការតវ៉ានេះនឹងនៅតែបន្តកើតមាន។ លោក អំ សំអាត ៖«ខ្ញុំគិតថានៅពេលដែលស្ថានភាពនយោបាយធូស្រាលអ្នកទាំងអស់ហ្នឹង នឹងអាចដោះលែង ខ្ញុំគិតថារឿងនយោបាយយើងត្រូវតែជជែកគ្នាបន្តនូវវប្បធម៌នៃការសន្ទនាទៅហើយចំពោះអ្នកទាំងអស់ហ្នឹងបើអាចថាយើងមើលទៅកុំឱ្យពាក់ព័ន្ធនយោ បាយដើម្បីឱ្យមានការចោទប្រកាន់គឺគួរតែមានការដោះលែង»។
បច្ចុប្បន្នអ្នកស្រី ទេព វន្នី និងមន្ត្រីសិទ្ធិមនុស្សមានលោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុនី្ន ព្រមទាំងអគ្គ លេខាធិការរង គ.ជ.ប លោក នី ចរិយា កំពុងជាប់ពន្ធនាគារ ក្នុងសំណុំរឿងដែលគេថាជារឿងនយោបាយ៕
