ខេត្តបន្ទាយមានជ័យ ៖ លោកស័ក្តិ៤ ឈាន ពិសិដ្ឋ ដែលចោទប្រកាន់លោក ឌិន ពុទ្ធី បានបើករថយន្តបង្កឱ្យរងរបួសនោះ គ្រោងផ្លាស់ប្តូរចេញពីច្រកទ្វារប៉ោយប៉ែត ដើម្បីឱ្យប្រជាពលរដ្ឋស្ងប់អារម្មណ៍។ នេះបើតាមការបញ្ជាក់ពីអភិបាលខេត្តបន្ទាយមានជ័យ ប្រាប់ឱ្យដឹងនៅក្នុងកិច្ចប្រជុំគណៈបញ្ជាការឯកភាព កាលពីរសៀលថ្ងៃទី០៩ មករា ២០១៧ នៅសាលប្រជុំសាលាខេត្តបន្ទាយមានជ័យ ដែលត្រូវបានកាសែតកោះសន្តិភាពចុះផ្សាយនៅថ្ងៃទី១០ មករានេះ។
កាលពីថ្ងៃទី២២ ធ្នូ លោកវរសេនីយ៍ត្រី ឈាន ពិសិដ្ឋ នាយរងប៉ុស្តិ៍នគរបាលអន្តរប្រវេសន៍ប្រចាំច្រកទ្វារអន្តរជាតិប៉ោយប៉ែត បានប្តឹងចោទ ប្រកាន់លោក ឌិន ពុទ្ធី ប្រធានសមាគមន៍សេដ្ឋកិច្ចក្រៅប្រព័ន្ធ ថាបានបើករថយន្តបុកបណ្តាលឱ្យរងរបួសភ្លៅស្តាំរហូតដួលសន្លប់។ បន្ទាប់ពីកើតហេតុ លោកវរសេនីយ៍ត្រី ឈាន ពិសិដ្ឋ ត្រូវបានបញ្ជូនទៅព្យាបាលនៅមន្ទីរពេទ្យក្នុងប្រទេសថៃ។
ចំណែកលោក ឌិន ពុទ្ធី ត្រូវបានកម្លាំងនគបាលអន្តប្រវេសន៍ឃាត់ខ្លួនភ្លាម និងប្រគល់ជូនទៅកម្លាំងនគរបាលខេត្ត បញ្ជូនទៅតុលាការ នឹងបានចោទប្រកាន់ពីបទបង្កហិង្សាដោយចេតនា មានស្ថានទម្ងន់ទោស។ រហូតដល់ថ្ងៃទី២៩ ធ្នូ ឆ្នាំ២០១៦ សាច់ញាតិ និងប្រជាពលរដ្ឋបាននាំគ្នាតវ៉ានៅច្រកទ្វារអន្តរជាតិប៉ោយប៉ែត ដែលប៉ះពាល់សណ្តាប់ធ្នាប់ និងសន្តិសុខនៅច្រកទ្វារអន្តរជាតិប៉ោយប៉ែត។
យ៉ាងណា អ្នកលេងបណ្តាញហ្វេសប៊ុកបានវាយប្រហារតគ្នាថា ករណីនេះគឺជាការធ្វើពុតរបស់លោកស័ក្តិ៤ ឈាន ពិសិដ្ឋ តែប៉ុណ្ណោះ៕
