នៅព្រឹកថ្ងៃទី១០ ខែមករា ឆ្នាំ២០១៧នេះ សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងអញ្ជើញជាអធិបតីនៅក្នុងពិធីសម្ពោធដាក់ឱ្យប្រើប្រាស់ជាផ្លូវការអាគារទីស្នាក់ការត្រួតពិនិត្យច្រកទ្វារអន្ដរជាតិ ត្រពាំងក្រៀង -ណងណុកខៀន នៅព្រំដែនខេត្តស្ទឹងត្រែង ប្រទេសកម្ពុជា និងខេត្តចំប៉ាសាក់ប្រទេសឡាវ។នេះបើតាមហ្វេសប៊ុករបស់សម្ដេច ហ៊ុន សែន បានឱ្យដឹងនៅមុននេះបន្ថិច។
តាមហ្វេសប៊ុករបស់សម្ដេច ហ៊ុន សែន បានឱ្យដឹងថា លោក ថងលូន ស៊ីស៊ូលីត (Thongloun SISOULITH ) នាយករដ្ឋមន្ត្រីឡាវ ក៏នឹងអញ្ជើញជាអធិបតី នៅក្នុងពិធីសម្ពោធ នេះផងដែរ។
ទាក់ទងនឹងរឿងនេះ ក្រសួងការបរទេស បានអះអាងថា ការបើកឱ្យប្រើប្រាស់ច្រកត្រួតពិនិត្យព្រំដែនជាមួយប្រទេសឡាវថ្មីនេះ បង្ហាញពីការរីកចំរើនថ្មីមួយក្នុងទំនាក់ទំនងទ្វេភាគី រវាងប្រទេសទាំងពីរ។ ការបើកឱ្យប្រើប្រាស់នេះ ក៏នឹងឆ្លើយតបផងដែរចំពោះតម្រូវការពង្រឹងចំណងមិត្តភាព និងកិច្ចសហប្រតិបត្តិការ ព្រមទាំងជួយសម្របសម្រួលបន្ថែមទៀត ដល់ពាណិជ្ជកម្មតាមព្រំដែន ទេសចរណ៍ និងការតភ្ជាប់រវាងប្រទេសទាំងពីរ៕
