គណបក្សប្រជាជនកម្ពុជា នៅព្រឹកថ្ងៃទី០៧ ខែមករា ឆ្នាំ២០១៧ បានប្រារព្ធពិធីអបអរសាទរថ្ងៃជ័យជម្នះ ៧ មករា លើកទី៣៨។ ពិធីនេះ ធ្វើឡើងក្រោមអធិបភាព សម្តេច ហ៊ុន សែន ប្រធានគណបក្សប្រជាជនកម្ពុជា ។
ប៉ុន្តែ ក្នុងពិធីនេះ គេឃើញ អ្នកគាំទ្រ ម្នាក់ដែលឡើងអានសុន្ទរកថា បន្ទាប់ពីសម្ដេចហ៊ុនសែន បានថ្លែងរូចគឺ បុរសនេះបានវាយប្រហារខ្លាំងៗ លើ ជនណាមិនឱ្យតម្លៃថ្ងៃ៧មករា ដោយប្រើពាក្យសម្ដីថា បើអ្នកមិនបានដឹងគុណ៧ មករាសូម កុំបំភ្លៃប្រវត្តិសាស្ត្រ»។ តែស្របពេលនេះ លោកសមរង្ស៊ីក៏បានហៅ ៧ មករា ១៩៧៩ គឺជាឆាកល្ខោនដែលយួនបានរៀបចំទាំងអស់។
អ្នកថ្លែងសុន្ទរកថា អបអរសាទរថ្ងៃ៧មករា បានវាយប្រហារខ្លាំងៗ ថាជនអគតិទាំងឡាយបើមិនបានដឹងគុណទេ សូមកុំបំភ្លៃ កុំបំភ័ន្ធ ពីសច្ចៈធម៌នៃថ្ងៃ៧ មករា ឆ្នាំ១៩៧៩។ តាមការប្រកាសរបស់អ្នករៀបចំកម្មវិធីបុរសថ្លែងសុន្ទកថានេះ គឺ លោកជា ពិសី ជាអភិបាលនៃគណៈអភិបាលខណ្ឌឬស្សីកែវ ។
មន្ត្រីគណបក្សកាន់អំណាចថ្លែងដូចនេះ បន្ទាប់ពីលោកសង្កេតឃើញថាមានបុគ្គលមួយចំនួន មិនសប្បាយចិត្ត និងរិះគន់ ថ្ងៃ៧ មករា។
លោកជា ពិសី ថ្លែងបន្តថា បុគ្គលដែលមិនសប្បាយចិត្តនឹងថ្ងៃនេះ ដោយសារហេតុផលនយោបាយ និងការច្រណែនឈ្នានីស។ បែបនេះក្តីលោកថា បុគ្គលទាំងនោះត្រូវតែទទួលស្គាល់ថា បើគ្មាន៧ មករា ឆ្នាំ១៩៧៩ ក៏គ្មានរូបអ្នកនៅផែនដីនេះដែរ។
លោកបានព្រមានថា ប្រសិនបើអ្នកណាចង់បំផ្លាញថ្ងៃ៧មករា លោកនឹងមិនអត់អោនឡើយ។
គណបក្សប្រជាជនកម្ពុជា ដែលដឹកនាំដោយសម្តេចនាយករដ្ឋមន្ត្រីហ៊ុន សែន បានធ្វើពីធីរម្លឹក ៧មករា ជារៀងរាល់ឆ្នាំ ដោយគណបក្សនេះចាត់ទុកថា ថ្ងៃ៧ មករា ឆ្នាំ១៩៧៩ គឺជាថ្ងៃកំណើតទី២របស់ប្រជាពលរដ្ឋខ្មែរ។
ថ្លែងទៅកាន់អ្នកចូលរួមប្រមាណ២ម៉ឺននាក់នៅព្រឹកនេះ សម្តេចនាយករដ្ឋមន្ត្រីហ៊ុន សែន បានបញ្ជាក់ថា បើគ្មានការជួយសង្គ្រោះឲ្យទាន់ពេលវេលា ម្លេះប្រជាជនកម្ពុជានឹងត្រូវបន្តកម្ទេចដោយ គ្មានទីបញ្ចប់ក្រោមស្នាដៃរបស់របបប៉ុលពត។
សម្តេចបន្តថា សោកនាដកម្មដ៏ធំធេងមកលើប្រជាជនកម្ពុជានេះ គឺផ្តើមចេញដោយរដ្ឋប្រហារថ្ងៃ១៨ មីនា ឆ្នាំ១៩៧០ តាមខ្សែញាក់របស់បរទេស ដែលបង្កជាភ្លើងសង្គ្រាមឆាបឆេះយ៉ាងសន្ធោរសន្ធៅ ដុតបំផ្លាញទឹកដីមាតុភូមិកម្ពុជា។
ខណៈដែលគណបក្សប្រជានកម្ពុជា កម្ពុជា កំពុងប្រារព្ធ ថ្ងៃជ័យជម្នះ៧មករា ប្រធានគណបក្សប្រឆាំងលោកសម រង្ស៊ីបានសរសេរនៅលើ ទំព័រហ្វេសប៊ុករបស់លោកថា ថ្ងៃ ៧ មករា ១៩៧៩ គឺជាឆាកល្ខោនដែលយួនបានរៀបចំទាំងអស់។
ប្រធានគណបក្សប្រឆាំងដែលរដ្ឋាភិបាលកម្ពុជាឃាឃាំងមិនឱ្យចូលស្រុក បានសរសេរថា៖ «បើគ្មានយួនកម្មុយនីស្ដពីដើមទី ក៏អត់មានខ្មែរក្រហមដែរ។ ឥឡូវនេះគេថា បើគ្មានថ្ងៃ ៧ មករា ១៩៧៩ ក៏គ្មានអ្វីៗដែលយើងមានសព្វថ្ងៃដែរ។ តែបើគ្មានថ្ងៃ ១៧ មេសា ១៩៧៥ ក៏គ្មានថ្ងៃ ៧ មករា ១៩៧៩ ដែរ»។
លោកសរសេរបន្តថា មួយផ្នែកធំនៃរឿងរ៉ាវទាំងអស់ ក្នុងរយៈពេលជិត ៥០ ឆ្នាំកន្លងមកនេះ គឺមានការរៀបចំយ៉ាងសកម្មដោយយួនកម្មុយនីស្ដ ដើម្បីលេបត្របាក់ទឹកដី និងបំភ័ន្ដភ្នែកប្រជារាស្ត្រខ្មែរ។
លោកបន្ថែមថា ៖«យើងត្រូវចងចាំជានិច្ចថា យួនបង្កប់បានញុះញង់ ឲ្យខ្មែរកាប់សម្លាប់ខ្មែរគ្នាឯង ក្រោមរបបខ្មែរក្រហម (១៩៧៥-១៩៧៩)។ មកដល់ពេលនេះទៀត (ឆ្នាំ ២០១៧) ពួកអ្នកបម្រើផលប្រយោជន៍បរទេសឈ្លានពាន ក៏នៅតែរករឿងខ្មែរគ្នាឯង ឥតឈប់ឈរ រហូតដល់លួចសម្លាប់ និងចាប់ដាក់គុក ដើម្បីធ្វើឲ្យប្រទេសជាតិយើង បែកបាក់គ្នា ហើយកាន់តែទន់ខ្សោយ»។
៧មករា ឆ្នាំ១៩៧៩ ជាថ្ងៃដែលកម្ពុជាត្រូវបានរំដោះពីរបបខ្មែរក្រហម ដោយមានកងទ័ពវៀតណាមជួយសហការជួយសង្គ្រោះ។ បែបនេះក្តី ថ្ងៃ៧មករានេះ ត្រូវបានមតិសាធារណៈជនមួយចំនួនរិះគន់ថា ជាថ្ងៃដែលនាំជនជាតិវៀតណាមជាច្រើនមករស់នៅលើទឹកដីកម្ពុជារហូតមកដល់ថ្ងៃនេះ ហើយមតិមួយចំនួនទៀតលើកឡើងថា ជាថ្ងៃដែលវៀតណាមឈ្លានពានទឹកដីកម្ពុជា។
លោកសាស្ត្រាចារ្យវិទ្យាសាស្ត្រនយោបាយ ឯមសុវណ្ណារ៉ា បង្ហាញពីគុណប្រយោជន៍គឺមានមួយតែ គុណវិបត្តិ មានច្រើន ចំពោះថ្ងៃ៧មករានេះ ។ លោកមើលឃើញថាដោយរឿងនេះហើយ បានជាវៀតំណាមនៅតែចិញ្ចឹមចិត្តប្រើឥទ្ធិពលលើកម្ពុជា មិនចេះចប់។ លោកថាជាការពិតកម្ពុជាក៏ធ្លាប់មានគុណលើវៀតណាមដែរ គឺអំឡុងសង្គ្រាម អាមេរិក-វៀតណាម។
លោកឯម សុវណ្ណរ៉ា ៖ «បច្ចុប្បន្នរដ្ឋាភិបាលគេលើកឡើងអំពីគុណបំណាច់ដែលជួយរំដោះជីវិតពលរដ្ឋកម្ពុជា ក៏ប៉ុន្ដែគុណសម្បត្តិមួយទៀត វាពាក់ព័ន្ធទៅនឹងការលើកតម្លៃ ឬការដឹងគុណប្រទេសវៀតណាម ប៉ុន្ដែទស្សនៈទីពីរនេះ លើកឡើងវាប៉ះពាល់ទៅនិង ប្រឈម ទៅនិងទស្សនៈមួយទៀតដែលថាវៀតណាមឈ្លានពាន ពីព្រោះជាទូទៅវៀតណាមចូលរំដោះកម្ពុជាតាំងពីឆ្នាំ ១៩៧៩ ហើយវៀតណាមអត់មានការដងទ័ពចេញទេ រហូតដល់មានការដកហ៊ុំមព័ទ្ធពាណិជ្ជកម្មពីលោកខាងលិចទើបវៀតណាមដងកងទ័ពចេញពីកម្ពុជា»។
រឿងគុណបំណាច់ ៧មករា គឺជា រឿងរ៉ាវប្រវត្តិសាស្ត្រ។ សម្ដេចឪនរោត្តមសីហនុកាលព្រះអង្គជាប្រធានចលនាតស៊ូនៃរដ្ឋាភិបាលត្រីភាគី ក៏ព្រះអង្គមិនបាន ទទួលស្គាល់ ថ្ងៃ៧មករាជាទីវារំដោះខ្មែរពីរបបខ្មែរក្រហមនោះដែរ ។ ព្រះអង្គចាត់ទុកជាការ ឈ្លានពានរបស់ប្រទេសវៀតំណាម។ តែយ៉ាងណា អ្នកគាំទ្របក្សប្រជាជនកម្ពុជា នៅតែចាត់ទុកជាថ្ងៃកំណើតទី២របស់ខ្លួន៕
