សេចក្ដីរាយការណ៍ព័ត៌មានក្នុងស្រុកនៃប្រទេស Gambia បានឱ្យដឹងថា មានឧត្ដមសេនីយ៍ជាច្រើនបានភៀសខ្លួនទៅនៅក្រៅប្រទេសដោយសារតែមិនគាំទ្រ ការបន្ដក្រាញអំណាចរបស់លោក Jammeh ក្នុងនោះមានមេបញ្ជាការកងទ័ពជើងទឹក ឧត្ដមសេនីយ៍ទោល Fara Jobe ម្នាក់ដែរ ។
សារព័ត៌មាន Freedom Newspaper របស់ប្រទេសនេះបានចុះផ្សាយថា រយៈពេលមួយសប្ដាហ៍ចុងក្រោយនេះ យ៉ាងតិចឧត្ដមសេនីយ៍ ៥រូបបានគេខ្លួន ហើយភាគច្រើនពួកគេទៅនៅប្រទេសជិតខាង។
ប្រភពដដែលបញ្ជាក់ថា ចំពោះឧត្ដមសេនីយ៍ Fara Jobe ដែលរត់ភៀសខ្លួនទៅនៅក្រៅប្រទេសនោះ គឺ លោក មានជម្លោះពាក្យសម្ដីជាមួយលោក Jammeh ដោយសារតែលោកមិនគាំទ្រការដែលលោក Jammeh បង្ខំអោយកងទ័ពនៅពីក្រោយលោកដើម្បីទប់ទល់ការលុកលុយណាមួយពីកងទ័ពបរទេស ដើម្បីបណ្ដេញលោកពីអំណាច។
លោក Jammeh បានចាញ់ឆ្នោត លោក Adama Barrow នៅក្នុងការបោះឆ្នោតថ្ងៃទី១ធ្នូ ប៉ុន្ដែលោកមិនព្រមទទួលស្គាល់លទ្ធផលបោះឆ្នោតហើយសន្យាបន្ដកាន់អំណាចទៅទៀតខណៈលោកបានកាន់អំណាច ២២ឆ្នាំមកហើយ ។យ៉ាងនេះក្ដី លោក Adama Barrow ព្រមានថា លោកនឹងធ្វើដំណើរទៅកាន់វិមានប្រធានាធិបតីនៅថ្ងៃទី៨មករា ស្របតាមការកំណត់ដោយរដ្ឋធម្មនុញ្ញ៕ ប្រភព: Freedom Newspaper
