ភ្នំពេញ៖ គណបក្សសង្គ្រោះជាតិបានដាក់សំណើមួយទៅសម្តេច ស ខេង ដើម្បីកំណត់ពេលវេលានៃការជួបប្រជុំរវាងថ្នាក់ដឹកនាំតំណាងរាស្ត្រ នៃគណបក្សប្រជាជនកម្ពុជាក្នុងគោលបំណងដោះស្រាយ បញ្ហាមួយចំនួនទៀត។
លិខិតរបស់លោក កឹម សុខា ផ្ញើជូនសម្ដេច ស ខេង ប្រធានថ្នាក់ដឹកនាំតំណាងរាស្ត្រនៃគណបក្សប្រជាជនកម្ពុជា បាន ឱ្យដឹងថា ចាប់តាំងពីសមាសភាពថ្នាក់ដឹកនាំតំណាងរាស្ត្រនៃគណបក្សសង្គ្រោះជាតិ ធ្វើការកែសម្រួលរួចមក ថ្នាក់ដឹកនាំតំណាងរាស្ត្រនៃគណបក្សទាំងពីរ ដែលមានអាសនៈនៅក្នុងរដ្ឋសភា គឺគណបក្សប្រជាជនកម្ពុជា និងគណបក្សសង្គ្រោះជាតិមិនទាន់បានជួបគ្នានៅឡើយទេ។
លិខិតបន្តថាថ្នាក់ ដឹកនាំតំណាងរាស្ត្រនៃគណបក្សសង្គ្រោះជាតិ ចង់ឱ្យមានការជួបប្រជុំរវាងថ្នាក់ដឹកនាំតំណាងរាស្ត្រ នៃគណបក្សទាំងពីរ ដើម្បីពិភាក្សាការងារមួយចំនួននៅពេលវេលាណាមួយក្នុងខែមករានៃឆ្នាំថ្មីនេះ។
លោក កឹម សុខា សង្ឃឹមថាថ្នាក់ដឹកនាំតំណាងរាស្ត្រនៃគណបក្សប្រជាជនកម្ពុជា នឹងផ្តល់សារៈសំខាន់នៃជួបសន្ទនាគ្នារវាងគណបក្សទាំងពីរ ដើម្បីរួមគ្នាដោះស្រាយបញ្ហារបស់ប្រទេសជាតិ និងប្រជាពលរដ្ឋខ្មែរដោយសន្តិវិធីស្របតាមបំណងប្រាថ្នា របស់សាធារណៈជនដែលចង់ឃើញ។
តាមគម្រោងគណបក្សទាំងនេះត្រូវជួបគ្នាដើម្បីដោះលែង មន្ត្រីការពារសិទ្ធិមនុស្ស និងមន្ត្រីគ.ជ.ប ឱ្យបានមុនដំណាច់ឆ្នាំ២០១៦ ប៉ុន្តែរហូតមដល់ពេលនេះនៅតែខកខាន៕
