ភ្នំពេញ៖ ខណៈដែលគណៈកម្មាការធិការជាតិរៀបចំការបោះឆ្នោត បិទផ្សាយបញ្ជីឈ្មោះបោះឆ្នោតដំបូង ដើម្បីទុកលទ្ធភាពឱ្យប្រជាពលរដ្ឋធ្វើការប្តឹងតវ៉ា ករណីខុសប្រក្រតីមួយចំនួន នៅព្រឹកថ្ងៃទី០៦ មករានេះ សម្តេចនាយករដ្ឋមន្ត្រី ហ៊ុន សែន បានអំពាវនាវឱ្យប្រជាពលរដ្ឋខ្មែរទាំងអស់ទៅពិនិត្យឈ្មោះ ឱ្យទាន់ពេលវេលា។
សម្តេចសរសេរបន្ថែមថា ការបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃទី ៤ មិថុនាឆ្នាំ ២០១៧ក្នុងពេលដ៏ខ្លីខាងមុខនេះ គឺមានសារៈសំខាន់ខ្លាំងណាស់។ ប្រជាពលរដ្ឋទូទាំងប្រទេសចូលរួមពិនិត្យផ្ទៀងផ្ទាត់ឈ្មោះក្នុងបញ្ជីបោះឆ្នោត ដើម្បីមានសិទ្ធិស្របច្បាប់ក្នុងការបោះឆ្នោតជ្រើសរើសតំណាងដែលខ្លួនពេញចិត្ត។
ពលរដ្ឋខ្មែរដែលបានចុះឈ្មោះបោះឆ្នោតឆ្នាំ២០១៦ មានចំនួនជិត ៨លាននាក់។ ឈ្មោះរបស់ពួកគាត់ត្រូវបានបិទផ្សាយដើម្បីធ្វើការផ្ទៀងផ្ទាត់នៅតាមសាលាឃុំ សង្កាត់នៅទូទាំងប្រទេសកម្ពុជាហើយបញ្ជីឈ្មោះនេះនឹងយកទៅផ្ទៀងផ្ទាត់ថ្ងៃបោះឆ្នោតក្រុមប្រឹក្សាឃុំសង្កាត់នៅថ្ងៃទី៤មិថុនាឆ្នាំ២០១៧នេះ៕
