ភ្នំពេញ៖ គណកម្មាធិការជាតិរៀបចំការបោះឆ្នោត (គជប) បានបើកកិច្ចពិភាក្សាពិគ្រោះយោបលស្តីពីបទបញ្ជានិងនិតិវិធីថ្មីសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណតិទី៤ នៅថ្ងៃព្រហស្បត្តិ៍។ បទបញ្ជានិងនិតិវិធីថ្មីនេះបានកំណត់ព្រំដែននៃការឃោសនារបស់គណបក្សនយោបាយនិមួយៗ ក្នុងអំឡុងពេលស្វែងរកសំឡេងឆ្នោត។ កញ្ញា ឆេង ណាតារាយការព័ត៌មាននេះ៖
នេះបើយោងតាមសេចក្តីព្រាងបទបញ្ជានិងនិតិវិធីថ្មីសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណតិទី៤ ឆ្នាំ២០១៧ដែលកំពុងស្ថិតក្រោមការពិគ្រោះយោបល់រវាងគណកម្មាធិការជាតិរៀបចំការបោះឆ្នោត គជប និងអង្គការសង្គមស៊ីវិល។កិច្ចពិគ្រោះយោបល់ដែលចាប់ផ្តើមនៅថ្ងៃព្រហស្បត្តិ៍ទី៥ មករានេះ សំរាប់រយៈពេលពីរថ្ងៃ។
លោកសោម សូរីដា អគ្គលេខាធិការរងគ.ជ.ប មានប្រសាសន៍ប្រាប់ក្រុមអ្នករាយការណ៍ព័ត៌មានក្រោយពីកិច្ចប្រជុំថា គណបក្សនយោបាយដែលបានដាក់បញ្ជីបេក្ខជនគណបក្សនយោបាយឈរឈ្មោះនៅឃុំសង្កាត់ណា មានសិទ្ធិហែរក្បួនតែក្នុងឃុំសង្កាត់នោះតែប៉ុណ្ណោះ។ ផ្ទុយទៅវិញប្រសិនបើគណបក្សឬបេក្ខជនណាឃោសនាឆ្លងទៅឃុំសង្កាត់ផ្សេងនឹងត្រូវចាត់ទុកថាបានធ្វើសកម្មភាពឃោសនា ហើយនឹងត្រូវរាប់បញ្ចូលដូចបានធ្វើការឃោសនាក្នុងឃុំសង្កាត់របស់ខ្លួនដែរ។
«សកម្មភាពហែរក្បួនគឺមានពីរដងក្នុងរយៈពេល១៤ថ្ងៃហ្នឹង មានន័យថាគណបក្នយោបាយដែលចុះបញ្ជីបេក្ខជនគណបក្សនយោបាយឈរឈ្មោះបោះឆ្នោតនៅក្នុងឃុំ សង្កាត់ណា គឺគាត់អាចធ្វើសកម្មភាពឃោសនា ដោយការហែរក្បួនពីរដងនៅក្នុងរយៈពេលដែលច្បាប់កំណត់១៤ថ្ងៃ។ ..បើហែរលើសគឺរាប់ បើហែរឆ្លង ឧទាហរណ៍ថាឆ្លពីឃុំសង្កាត់មួយទៅឃុំសង្កាត់មួយ គឺឃុំសង្កាត់ដែលឆ្លងកាត់ហ្នឹងរាប់ចូលបានហែរក្បួន។»
លោក អគ្គលេខាធិការរងគ.ជ.ប បញ្ជាក់ថា ប្រសិនបើគណបក្សនយោបាយណាមួយ ហែរលើសចំនួនថ្ងៃដែលបានកំណត់ គ.ជ.ប នឹងធ្វើការពិន័យទៅតាមផ្លូវច្បាប់។ ប៉ុន្តែលោកមិនបានបញ្ជាក់ច្បាស់លាស់ពីការពិន័យនោះទេ។
សូមបញ្ជាក់ថាក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់កាលពីអាណត្តិមុន រយៈពេលឃោសនាបោះឆ្នោតមានរយៈពេលរហូតដល់៣០ថ្ងៃ។ម្យ៉ាងវិញទៀតគណបក្សនយោបាយនិមួយៗអាចហែរក្បួនឃោសនាពីឃុំសង្កាត់មួយទៅកាន់ឃុំសង្កាត់មួយទៀតបាន។
លោកសោម សូរីដា ពន្យល់ថា ចំនួនពីរដងនៃការហែរឃោសនានេះ មិនតិចពេកនោះទេសម្រាប់គណបក្សនយោបាយនីមួយៗ ពីព្រោះមិនមែនតែសកម្មភាពហែឃោសនាមួយទេ ដែលអាចឃោសនា គណបក្សនីមួយៗអាចធ្វើសកម្មភាពផ្សេងៗបានដូចជា ការប្រជុំជាមួយអ្នកគាំទ្រ ការចាក់ផ្សាយសារនយោបាយ ឬការចែកខិតប័ណ្ឌផ្សេងៗជាដើម។
លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជា បានប្រាប់វិទ្យុស្ត្រីនៅថ្ងៃនេះថា លោកគាំទ្រចំពោះការកំណត់ដូចនេះ ព្រោះការកំណត់នេះដើម្បីសន្សំសំចៃថវិកាគណបក្សនយោបាយ និងដើម្បីធ្វើឱ្យការឃោសនាមានប្រសិទ្ធិភាព ដោយផ្តោតទៅលើអ្វីដែលគណបក្សនីមួយៗចង់ផ្តល់ឱ្យប្រជាពលរដ្ឋ។
«ការឃោសនាយើងបានសង្កេតឃើញហើយថា មិនមានចំនួនភាគច្រើនពេកទេ គឺសំខាន់បំផុតគោលនយោបាយរបស់គណបក្សនិមួយៗទៅប្រជាជន»។
ចំណែក លោកស្រី ម៉េង សុភារី ប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ បានឱ្យដឹងថា គណបក្សសង្គ្រោះជាតិអាចទទួលបានយកបានចំពោះការកំណត់ការហែរក្បួនឃោសនាចំនួនពីរដងនេះ។ ប៉ុន្តែមន្ត្រីគណបក្សជំទាស់មួយនេះ មិនឯកភាពចំពោះការមិនអនុញ្ញាតឱ្យហែរក្បួនឆ្លងឃុំ សង្កាត់នោះទេ។ ហើយលោកស្រីបានស្នើទៅគ.ជ.ប ឱ្យកែប្រែចំណុចនេះ។
«ឧទាហរណ៍ថាឃុំក គាត់ធ្វើការឃោសនា ហើយមានប្រជាពលរដ្ឋចូលរួមច្រើន វាហៀរចូលទៅដល់ឃុំខ នោះការឃោសនារបស់គេសម្រាប់តែឃុំកហ្នឹងទេ ព្រោះគេមានលេខរៀងរបស់គេ គេមានគោលនយោបាយរបស់គេដោះស្រាយបញ្ហានៅក្នុងឃុំហ្នឹង ហើយចំណែកឃុំដែលហៀរចូលហ្នឹងអត់មានពាក់ព័ន្ធទេ ដូច្នេះបើសិនការគ្រាន់តែហែរឆ្លង ឬមនុស្សលើសហៀរចូលមួយទៀត ហើយរាប់ថាជាការឃោសនាមួយដងដែរសម្រាប់ដែលឆ្លងកាត់នោះ គឺវាធ្វើឱ្យខាតប្រយោជន៍ទៅដល់ឃុំមួយនោះឯង។»
ដោយឡែកលោកសួន សេរីរដ្ឋា ប្រធានគណបក្សអំណាចខ្មែរ លើកឡើងថា លោកមិនគាំទ្រអោយការហែរក្បូនឃោសនាបោះឆ្នោតនោះទេ។ លោកលើកឡើងថា ការហែរក្បួនឃោសនាបោះឆ្នោតគឺជាការបញ្ចេះកំហឹងពលរដ្ឋឈ្លោះគ្នា មិនតែប៉ុណ្ណោះក៏បង្ករឱ្យស្ទះចរាចរណ៍បង្កឱ្យមានជម្លោះរវាងគណបក្សនិងគណបក្ស និងខាតពេលវេលារបស់អ្នកចូលរួមឃោសនាជាដើម។
«ទីមួយ ចំណាយថវិកាច្រើន ទីពីរ ធ្វើឱ្យខាតពេលវេលារបស់អ្នកចេញមកដើរហែរស្រែក ទីបី ធ្វើឱ្យស្ទះផ្លូវពីបាកអ្នកធ្វើដំណើរ ទី៤.ធ្វើឱ្យអ្នកហែរបក្សផ្សេងជួបនឹងយើងទៅប៉ះពាល់ពាក្យសំដីនាំឱ្យកើតអំពើហឹង្សា អញ្ចឹងខ្ញុំណែនាំឱ្យបេក្ខជនដើរតាមផ្ទះ ចុះបង្ហាញខ្លួនឱ្យពលរដ្ឋបានស្គាល់ និងយកគោលនោយបាយទៅនិយាយ ឱ្យនៅតាមផ្ទះបានឃើញតែម្តង។»
លោកសួន សេរីរដ្ឋា អះអាងថា គណបក្សអំណាចខែ្មររបស់លោក នឹងមិនដង្ហែរក្បួនឃោសនានោះទេ៕
