ភ្នំពេញ៖ ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក William Heidt មានប្រសាសន៍ថា សហរដ្ឋអាមេរិកបានចំណាយទឹកប្រាក់ជាង ១១៤ លានដុល្លារអាមេរិកក្នុងរយៈពេល ២០ ឆ្នាំចុងក្រោយនេះ នៅក្នុងគម្រោងមនុស្សធម៌ ដើម្បីធ្វើការបោសសំអាតមីន និងយុទ្ធភណ្ឌមិនទាន់ផ្ទុះ ដែលនៅសេសសល់កាលពីសម័យសង្គ្រាមនៅកម្ពុជា។ នេះបើតាមសេចក្តីប្រកាសព័ត៌មានរបស់ស្ថានទូតសហរដ្ឋអាមេរិក ចេញផ្សាយនៅថ្ងៃ ព្រហស្បត្តិ័ ទី៥នេះ។
ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក William Heidt ថ្លែងដូចនេះ នៅពេលលោកទៅទស្សនកិច្ចប្រតិបត្តិការលុបបំបាត់គ្រាប់មីន និងយុទ្ធភណ្ឌមិនទាន់ផ្ទុះ នៅមូលដ្ឋានរបស់អង្គការ Norwegian People’s Aid (NPA) នៅខេត្តរតនគីរីនៅខេត្តរតនគីរី នៅថ្ងៃទី ០៥ ខែ មករា ឆ្នាំ ២០១៧។
លោកឯកអគ្គរដ្ឋទូត Heidt៖«សហរដ្ឋអាមេរិកមានប្រវត្តិយូរមកហើយក្នុងការធ្វើការជាមួយដៃគូ របស់យើងក្នុងរដ្ឋាភិបាល សហគមន៍ អង្គការមិនមែនរដ្ឋាភិបាល ដើម្បីដោះស្រាយបញ្ហាគ្រាប់មីន និងយុទ្ធភណ្ឌមិនទាន់ផ្ទុះ។ អ្វីដែលខ្ញុំឃើញនៅថ្ងៃនេះ ក្នុងខេត្តរតនគីរី បង្ហាញអោយឃើញពីការយកចិត្តទុកដាក់របស់អ្នកជំនាញជាច្រើន ដែលហ៊ានប្រថុយជីវិតរបស់គេ ដើម្បីធ្វើអោយប្រទេសកម្ពុជាមានសុវត្ថិភាព សំរាប់រស់នៅ»។
ទោះបីជាអាមេរិកបានលើកឡើងពីគុណសម្បត្តិ លើការចំណាយទឹកប្រាក់ជាង ១១៤ លានដុល្លារអាមេរិកក្នុងរយៈពេល ២០ឆ្នាំ ចុងក្រោយនេះ ដើម្បីបោសសំអាតមីន និងយុទ្ធភណ្ឌមិនទាន់ផ្ទុះក៏ដោយ កាលពីយប់ថ្ងៃទី ២៤ ខែធ្នូ ឆ្នាំ ២០១៦ សម្តេចនាយករដ្ឋមន្ត្រី ហ៊ុន សែន បានបន្ទោសសហរដ្ឋអាមេរិកករណី ទម្លាក់សម្តេចព្រះបាទ នរោត្តមសីហនុ នៅឆ្នាំ១៩៧០ ដែលអាមេរិកបាននាំឱ្យមានសង្គ្រាមស៊ីវិលនៅ ប្រទេសកម្ពុជា ជាហេតុនាំឲ្យកាកសំណល់គ្រាប់មីន និងមិនទាន់ផ្ទុះរាប់លានគ្រាប់។
មិនត្រឹមតែប៉ុណ្ណោះ សម្តេច ហ៊ុន សែន បានអំពាវនាវដល់រដ្ឋាភិបាលថ្មីរបស់សហរដ្ឋអាមេរិក ពិចារណាលុបបំណុលដែលកម្ពុជាជំពាក់កាល ពីសម័យសង្គ្រាមស៊ីវិលនៃរបប លន់ នល់ ដែលបំណុលកម្ពុជាជំពាក់អាមេរិកក្នុងសម័យសង្គ្រាម ដែលលោកថាភាគច្រើនបំណុលអាមេរិកនៅពេលនោះដោយសារទិញសព្វាវុធពីអាមេរិក៕
