ភ្នំពេញ៖លោក សម រង្ស៊ី មេបក្សប្រឆាំងនៅតែបន្តវាយមកលើបក្សកាន់អំណាច។ កាលពីថ្ងៃពុធ ទី៤ មករា ប្រធានគណបក្សសង្គ្រោះជាតិ រូបនេះបានសរសេរលើហ្វេសប៊ុករបស់លោក ដោយមានសារវាយប្រហារមួយថ្មីទៀតថារដ្ឋាភិបាល “ ដៃភ្លើងជើងមាន់ ”។
សាររបស់លោកចង់និយាយថា រដ្ឋាភិបាលបក្សប្រជាជនកម្ពុជា គ្រប់គ្រងអ្វីខ្ទេចហ្នឹង។ តែបែបនេះក្ដី អ្នកនាំពាក្យបក្សកាន់អំណាច ក៏បានហៅលោក សម រង្ស៊ី ថា ជាមនុស្សឥតបានការ ដែលចូលចិត្តវាយប្រហារជាតិសាសន៍ឯង។
លោក សម រង្ស៊ី ប្រធានគណបក្សសង្គ្រោះជាតិ បានបង្ហាញសារបែបចំអកថ្មីមួយទៀតទៅរដ្ឋាភិបាលមួយដែលទំនងលោកវាយប្រហារ គណបក្សប្រជាជនកម្ពុជាថា ជារដ្ឋាភិបាល "ដៃភ្លើង ជើងមាន់ ប៉ះអ្វីឆេះហ្នឹង កាយគាស់អ្វីៗទាំងអស់ឲ្យវិនាសហិនហោច”។
លោក សម រង្ស៊ី បានសរសេរលើទំព័រហ្វេសប៊ុករបស់លោកទៀតថា ៖ “ដីក៏ប្លន់ ផ្ទះក៏ដុត ព្រៃក៏កាប់ ដំណាំក៏ឈូស បឹងក៏លុប ភ្នំក៏វ៉ៃ ថ្មក៏ជីក ខ្សាច់ក៏កាយ ប្រទេសជាតិអន្ដរាយ រាស្ដ្រវេទនា ឲ្យតែពួកគេបានធ្វើមហាសេដ្ឋី”។
សាររបស់មេបក្សប្រឆាំងដែលរដ្ឋាភិបាលឃាឃាំងមិនឱ្យចូលប្រទេសដូចនេះ គឺធ្វើឡើងបន្ទាប់ពីលោក ខកចិត្តការដែលបក្សកាន់អំណាចមិន បានដោះលែងសកម្មជន មន្ត្រីការពារសិទ្ធិមនុស្ស និងមន្ត្រី គ.ជ.ប តាមការគ្រោងទុក។
ទាក់ទិនរឿងនេះអ្នកនាំពាក្យគណបក្សប្រជាជនកម្ពុជាលោក សុខ ឥសាន្ត បានចំអកទៅលោក សម រង្ស៊ី វិញថា មេបក្សប្រឆាំងរូបនេះកំពុងធ្វើនយោបាយអត្តឃាតខ្លូនឯង។ លោកបញ្ជាក់ថា ការលើកទ្បើងរបស់មេបក្សប្រឆាំងរូបនេះ មិនមានប្រសិទ្ធភាពនោះទេ ព្រោះការលើកទ្បើងនេះគឺជាការញុះញង់ឱ្យខ្មែរបែកបាក់គ្នាតែប៉ុណ្ណោះ។ លោក សុខ ឥសាន្ត ៖ “ចង់គាត់លើកទ្បើង ម៉េចទៅអាហ្នឹងជារឿងគាត់។ អាងគាត់នៅក្រៅមានអាណាទៅចាប់ចងគាត់ទៀត។ អាហ្នឹងគឺថា គាត់អាចថាម៉ាសេរីហើយនៅខាងក្រៅ ហើយគាត់ជាចារឹកតាំងពីឳពុកគាត់មកមិនដែលចង់ឱ្យជាតិរីកចម្រើនរុងរឿងទេ។ សកម្មភាពទាំងអស់ធ្វើសុទ្ធតែក្នុងន័យញុះញង់បំបែកបំបាក់រើសអើងជាតិសាសន៍ រើសអើងវណ្ណៈនៅក្នុងសង្គមអ្នកមានអ្នកក្រ ”។
ចំណែកសាស្ត្រាចារ្យវិទ្យាសាស្ត្រនយោបាយលោក សូ ចន្ថា ពុំមានជំនឿចិត្តលើអ្នកនយោបាយនៅកម្ពុជាថា នឹងមានវប្បធម៌នយោបាយបែបប្រជាធិបតេយ្យ ទទួលយកការរិះគន់ដើម្បីស្ថាបនានោះទេ ដែលលោកថា ការរិះគន់ឬក៏ការចំអករបស់មេបក្សប្រឆាំងនាពេលនេះហាក់បីដូចមិនទាន់មានប្រសិទ្ធិភាពនោះទេ។
តែលោក សូ ចន្ថា ថាការលើកទ្បើងរបស់លោក សម រង្ស៊ី ពិតជាស្របតាមទិដ្ឋភាពសង្គមកម្ពុជានាពេលបច្ចុប្បន្ន ដែលនាំឱ្យមតិសាធារណៈជន នឹងគិតពិចារណាថាតើការលើកទ្បើងនោះគឺជារឿងត្រឹមត្រូវឬយ៉ាងណា។ ទោះបីយ៉ាងនេះក្តីលោក សូ ចន្ថា យល់ឃើញថា អ្នកនយោបាយគួរតែយកការរិះគន់ដើម្បីស្ថាបនា ហើយទន្ទឹមនឹងការរិះគន់នេះ ក៏ត្រូវបង្ហាញពីដំណោះស្រាយផងដែរ។ “ក៏ប៉ុន្តែអ្វីដែលខ្ញុំចង់ឃើ ញអ្នកនយោបាយនៅកម្ពុជាធ្វើការរិះគន់ហើយបង្ហាញអំពីដំណោះស្រាយឬក៏ជាគោលនយោបាយរប ស់គណបក្សនយោបាយនីមួយៗជាជាងគ្រាន់តែរិះគន់តែមិនបានបង្ហាញពីអនុសាសន៏ឬក៏អ្វីដែលជាដំណោះស្រាយដើម្បី ដោះស្រាយបញ្ហាទាំងអស់នោះអាហ្នឹងចំនុចទី០១ ហើយចំនុចទី០២ខ្ញុំស្វាគមន៏ចំពោះការលើកទ្បើងរិះគន់ដើម្បីស្ថាបនាបែបនេះតែត្រូវមានការសិក្សាស្រាវជ្រាវឬក៏ការសិក្សាជាក់ លាក់ណាមួយដើម្បីឱ្យមានលក្ខណៈវិទ្យាសាស្ត្រជាជាងរិះគន់តាមបែបនយោបាយ "។
“ ដៃភ្លើងជើងមាន់ “ ជាគ្រាមភាសាមួយ ដែលគេនិយមប្រើ នៅពេលគេប្រដៅកូនចៅ ឬ ក្រុមណាមួយកុំ ប្រព្រឹត្តអំពើអ្វីដែលនាំឱ្យអន្តរាយដល់ខ្លួន ឬសហគមន៍។ នៅពេលអ្វីមួយខូចខាតខ្ទេចខ្ទាំ គេបន្ទោសថា ក្រុមនេះពិតជា “ ដៃភ្លើងជើងមាន់ “ ព្រោះ ប៉ះអ្វីឆេះហ្នឹង៕
