ភ្នំពេញ ៖ ក្រសួងអប់រំ យុវជននិងកីឡា បានសម្រេចដាក់សាលាបឋមសិក្សាចំនួនបីរបស់ខេត្តសៀមរាបឲ្យបង្រៀនសិស្សរយៈពេលពេញមួយថ្ងៃ ចាប់ពីខែ មករា នេះតទៅ ដោយនឹងផ្តល់អាហារពេលថ្ងៃត្រង់សម្រាប់សិស្សានុសិស្សទៀតផង។ នេះបើផ្អែកតាមសេចក្តីជូនដំណឹងរបស់ក្រសួងអប់រំ យុវជន និង កីឡា ដែលចុះហត្ថលេខាដោយលោករដ្ឋមន្ត្រី ហង់ ជួនណារ៉ុន កាលពីថ្ងៃទី ២ មករា ដែលត្រូវផ្សព្វផ្សាយឲ្យដឹងនៅរសៀលថ្ងៃពុធនេះ។
សាលារៀនទាំងនោះរួមមាន សាលាបឋមសិក្សាដូនឱ សាលាបឋមសិក្សា ត្រពាំងស្វាយ និងសាលាបឋមសិក្សាគោកគ្រើល ដែលស្ថិតក្នុងស្រុកអង្គរធំ ក្បែរទីប្រជុំជនខេត្តសៀមរាប។
លោកហង់ ជួន ណារ៉ុន បញ្ជាក់ក្នុងសេចក្តីប្រកាសនោះថា ការបង្កើនម៉ោងសិក្សាដល់សិស្សានុសិស្សនៃសាលាបឋមសិក្សាទាំងបី គឺដើម្បីសាកល្បងបង្កើនគុណភាពសិក្សាឲ្យដល់«កម្រិតស្តង់ដារនៃបណ្តាប្រទេសក្នុងតំបន់និងដើម្បីបង្កើនគុណភាពលទ្ធផលសិក្សា»នៅតាមបណ្តាសាលាបឋមសិក្សា៕
