ភ្នំពេញ៖ គណៈកម្មាការទី៣ នៃរដ្ឋសភានៅព្រឹកថ្ងៃទី០៤ មករា ឆ្នាំ២០១៧នេះ បានចោទសួរដេញដោល លោក សាយ សំអាល់ រដ្ឋមន្ត្រីក្រសួងបរិស្ថាន អំពីគំនរសំរាមពាសវាលពាលកាលក្នុងទីក្រុងភ្នំពេញ។ លោករដ្ឋមន្ត្រីក្រសួងបរិស្ថានបានសន្យាថា នឹងគ្រប់គ្រងបញ្ហាសំរាមនៅរាជធានីភ្នំឱ្យបានកាន់តែល្អប្រសើរជាងមុន។ កញ្ញា ឆេង ណាតា រាយការព័ត៌មាននេះ៖
នៅថ្ងៃពុធទី ៤មករានេះ ប្រធានគណៈកម្មាការផែនការ វិនិយោគ កសិកម្ម អភិវឌ្ឍន៍ជនបទនិងធនធានទឹកនៃរដ្ឋសភា លោក ប៉ុល ហំម បានចោទសួរលោក សាយ សំអាល់ រដ្ឋមន្ត្រីក្រសួងបរិស្ថាន អំពីការគ្រប់គ្រងសំរាមដែលជាផ្នែកមួយនៃការបំពុលបរិដ្ឋានដែលកំពុងកើតមាននៅក្នុងប្រទេសកម្ពុជា ជាពិសេសនៅក្នុងរាជធានីភ្នំពេញ។
លោក ប៉ុល ហំម បានប្រាប់ក្រុមអ្នកសារព័ត៌មានក្រោយពីបញ្ចប់កិច្ចសួរដេញដោលជាមួយលោកលោក សាយ សំអាល់ ថាមិនទាន់មានការគ្រប់គ្រងសំរាមនៅក្នុងរាជធានីបានល្អនៅឡើយទេ។តំណាងរាស្ត្រគណបក្សប្រឆាំងដដែលបន្ថែមថាមានការគរសំរាមដោយគ្មានសណ្តាប់ធ្នាប់ ជាពិសេសសំរាមដែលជាសំណល់ពីមន្ទីរពេទ្យ ដែលជាបច្ច័យអាចបង្កផលប៉ះពាល់ធ្ងន់ធ្ងរដល់សុខភាពប្រជាពលរដ្ឋ។
«នៅតាមដងផ្លូវខ្លះ ឃើញមានសំរាម មិនមែនសំរាមធម្មតាទេ សំរាមវេជ្ជសាស្ត្រទៀត កាកសំណល់ជាវេជ្ជសាស្ត្រទៀត»។
ខណៈដែលការប្រមូលសំរាមក្នុងរាជធានីភ្នំពេញក្នុងមួយថ្ងៃប្រមាណជាដប់តោន ជាញឹកញាប់គេនៅតែប្រទះឃើញគំនរសំរាមធំៗនៅជាប់មាត់ផ្លូវ ជាពិសេសនៅតំបន់ក្បែរទីប្រជុំជន និងតំបន់ផ្សារ។ គំនរសំរាមខ្លះត្រូវគេគរចោលយ៉ាងយូរ សាយក្លិនរលួយភាយដោយមិនមានអន្តរាគមដោះស្រាយឡើយ។
លោកប៉ុល ហំម ចង់ឱ្យមានការគ្រប់គ្រងឱ្យបានល្អជាងនេះ។
ឆ្លើយនឹងបញ្ហានេះ លោក សាយ សំអាល់ រដ្ឋមន្ត្រីក្រសួងបរិស្ថាន មានប្រសាសន៍ថា ការគ្រប់គ្រងសំរាមនឹងដោះស្រាយបានក្នុងពេលឆាប់នេះៗ។ លោកបន្តថា ក្រសួងនឹងខិតខំធ្វើការងារជាមួយសាលារាជធានី បណ្តាខណ្ឌផ្សេងៗ និងក្រុមហ៊ុនស៊ិនទ្រី ដើម្បីដោះស្រាយបញ្ហាប្រមូល និងគ្រប់គ្រងសំរាមឱ្យមានបានប្រសើរជាងមុន។ ប៉ុន្តែ លោកបានស្នើសុំឲ្យក្រុមប្រជាពលរដ្ឋផងដែរ។
«ប្រជាជនរបស់យើងក៏ត្រូវចូលរួមដែរ មិនមែនបានសេចក្តីថា គាត់យកមកបោះចោលហ្នឹងហើយគិតថារដ្ឋនឹងតាមប្រមូលតាមក្រោយគាត់នោះទេ ត្រូវមានការវេចខ្ចប់ឱ្យបានត្រឹមត្រូវអញ្ចឹងដែរ ធ្វើការជាមួយគ្នា។ខ្ញុំសង្ឃឹមថាវាមិនយូទេ»។
លោក សាយ សំអាល់ បន្ថែមថា ការគ្រប់គ្រងសំរាមបច្ចុប្បន្ននេះបានល្អប្រសើរខ្លះហើយ បន្ទាប់ពីរដ្ឋាភិបាលបានផ្ទេរកិច្ចការគ្រប់គ្រងសំរាមទៅឱ្យរដ្ឋបាល រាជធានី ខេត្ត ជាអ្នកគ្រប់គ្រងដោយខ្លួនឯង។ ប៉ុន្តែលោកយល់ឃើញថាថាដើម្បីឱ្យការគ្រប់គ្រងសំរាមបានល្អជាងមុន រដ្ឋាភិបាលត្រូវផ្តល់ថវិកាបន្ថែមទៀតដល់រដ្ឋបាលថ្នាក់ក្រោម៕
