ភ្នំពេញ៖ ព្រះសពសម្ដេច ស៊ីសុវត្ថិ ជីវ័នមុនីរក្ស ត្រូវបានបូជានៅព្រឹកថ្ងៃ ពុធ ទី០៤ មករា នេះនៅខាងមុខវត្តបុទុមវតីដោយមានសែរាជវង្ស និងមន្ត្រីជាន់ខ្ពស់កម្ពុជាច្រើននាក់ចូលរួម។
សម្តេច ស៊ីសុវត្ថិ ជីវ័នមុនីរក្ស គឺជាបុត្រាចុងក្រោយរបស់អតីតព្រះមហាក្សត្រ ស៊ីសុវត្ថិ មុនីវង្ស ហើយព្រះអង្គក៏ជាឧត្តមទីប្រឹក្សាព្រះមហាក្សត្រ ផងដែរ។
សម្ដេច ស៊ីសុវត្ថិ ជីវ័នមុនីរក្ស បានសោយទិវង្គតនៅវេលាម៉ោង ១០ និង៤៥ នាទីព្រឹក កាលពីថ្ងៃពុធ ទី២៨ ខែធ្នូ ឆ្នាំ ២០១៦ ក្នុងព្រះជន្មាយុ ៨០ព្រះវស្សាដោយរោគាពាធ នៅរាជធានីភ្នំពេញ។ គួរបញ្ជាក់ថា សម្តេច ស៊ីសុវត្ថិ ជីវន្តមុនីរក្ស គឺជាអតីតអនុប្រធានទី១ ព្រឹទ្ធសភាជាតិនីតិកាលទី១ និងទី២ ហើយព្រះអង្គជាព្រះរាជបុត្រារបស់ព្រះករុណាព្រះបាទសម្តេច ស៊ីសុវត្ថិ មុនីវង្ស ដែល ជាព្រះរាជបុត្រាចុងក្រោយបង្អស់ដែលនៅរស់រានមានជីវិតដល់សព្វថ្ងៃ។ ព្រះអង្គក៏ត្រូវជាព្រះបិតុលាបង្កើត (ឪពុកមារ) ព្រះករុណាព្រះបាទសម្តេចព្រះនរោត្តម សីហនុ ព្រះបរមរតនកោដ្ឋផងដែរ៕
