ភ្នំពេញ៖ កូនប្រុស លោក ណៃ វង់ ដា ឈ្មោះ ណៃ សូវីលី បានផ្ដល់បទសម្ភាសឱ្យវិទ្យុស្ដ្រី ថា ប្អូនប្រុស និងម្ដាយ គឺ អ្នកស្រី ភាវ ម៉ី អង្គុយសម្រក់ទឹកភ្នែកនៅពីមុខផ្លូវចូលពន្ធនាគារព្រៃស កាលពីថ្ងៃទី ១មករា ឆ្នាំ ២០១៧ ដោយសារតែខ្វល់នឹងឱពុក ឈឺនៅក្នុងពន្ធនាគារ ។
ការលើកឡើងរបស់ ណៃ សូវីលី ដែលមានអាយុទើបតែ១៥ឆ្នាំដូចនេះ បន្ទាប់ពីគេ និងម្ដាយ បានទៅសួរសុខទុក្ខ ឪពុកនៅក្នុងពន្ធនាគារ ប៉ុន្ដែឆ្មាំគុកមិនអនុញ្ញាត។
ជាមួយគ្នានេះកុមារា ណៃ សូវីលីបានសរសេរ នៅលើហ្វេសប៊ុករបស់ប្អូនគឺ មានន័យ ដូចនេះ៖ថ្ងៃទី១មករាគឺគ្រប់ក្រុមគ្រួសារទាំងអស់ក្នុងពិភពលោកប្រារព្ធពិធីចូលឆ្នាំថ្មីប្រកបដោយសុភមង្គល និងស្នាមញញឹម ដែលខុសពីគ្រួសាររបស់ខ្លួន គឺ អាចត្រឹមតែសម្រក់ទឹកភ្នែក នៅពីមុខផ្លូវចូលពន្ធនាគារព្រៃស។ ការរៀបរាប់របស់កូនប្រុស លោកណៃវង់ដា ដូចនេះ នៅពេលដែលគេនិងម្ដាយ បានទៅសួរទុក្ខឪពុក នៅក្នុងពន្ធធនាគារព្រៃស កាលពីថ្ងៃអាទិត្យទី១មករា ហើយឆ្មាំគុកមិនអនុញ្ញាត។
ក្នុងបទសម្ភាសន៍ជាមួយវិទ្យុស្ត្រី សូវីលីនិយាយថាតុលាការគួរតែដោះឪពុករបស់ខ្លួន ឆាប់ៗទៅ ។
តទៅនេះ សូមស្ដាប់បទសម្ភាសន៍ រវាងកញ្ញាជុំជោគជាតា ជាមួយសូវីលីកូនប្រុសលោកណៃវង់ដាដូចតទៅ៖
មន្ត្រីសមាគមអាដហុកចំនួន ៤រូប រួមមាន លោកស្រី លឹម មុន្នី លោក នី សុខា លោក យី សុខសាន លោក ណៃ វង់ដា ត្រូវបានសាលាដំបូងរាជធានីភ្នំពេញសម្រេចឃុំបណ្តោះអាសន្ននៅពន្ធនាគារព្រៃស រងការចោទប្រកាន់ពីបទ សូកប៉ាន់សាក្សី ទាក់ទិននឹងសំណុំរឿងរបស់អ្នកនាង ខុម ចាន់តារ៉ាទី ហៅស្រីមុំ កាលពីថ្ងៃទី២ ខែឧសភា ឆ្នាំ២០១៦ កន្លងទៅ ។ ចំណែក លោក នី ចរិយា ត្រូវបានជាប់ឃុំជាបណ្ដោះអាសន្ននៅស្នងរដ្ឋាននគរបាលរាជធានី ក្នុងសំណុំរឿងខាងលើនេះផងដែរ ដោយចោទពីបទ សមគំនិតសូកប៉ាន់សាក្សី។ ក្រុមគ្រួសារមន្ត្រីអាដហុក និងមន្ត្រី គ.ជ.ប មានសេចក្តីរំពឹងទុកថា នឹងបានជួបក្រុមគ្រួសាររបស់ខ្លួនទ្បើងវិញនៅឆ្នាំថ្មីនេះ។
