ភ្នំពេញ ៖នៅព្រឹកថ្ងៃទី ៣ ខែមករា ឆ្នាំ២០១៧នេះ ពលរដ្ឋដែលធ្លាប់រស់នៅសហគមន៍បុរីកីឡា ដែលត្រូវបានអាជ្ញាធរសាលាក្រុង ជម្លៀសឱ្យទៅរស់នៅ ភ្នំបាត ខេត្តកំពង់ស្ពឺ ប្រមាណជា ៣៥គ្រួសារបាននាំគ្នាឡើងមករស់នៅលើអាគាររបស់ពួកគេវិញហើយ។ នេះបើតាមសេចក្ដីរាយការណ៍ពីអ្នកសារព័ត៌មានរបស់វិទ្យុស្ដ្រីដែលបានចុះទៅយកព័ត៌មានផ្ទាល់នៅព្រឹកនេះ។
តាមអ្នករាយការណ៍ ពលរដ្ឋដែលឡើងមកតវ៉ា ហើយត្រឡប់មករស់នៅសហគមន៍បុរីកីឡានៅពេលនេះ គឺដោយសារតែការអត់ទ្រាំមិនបាននៅតំបន់ដែលសាលាក្រុងបានជម្លៀសអោយទៅរស់នៅនោះ ដោយពួកគេនិយាយថា តំបន់នោះ គឺ ខុសប្លែក ពីបុរីកីឡា ជាទីដាច់ស្រយាល ពិបាករកកន្លែងលក់ដូរជាពិសេស គឺ ខ្វះទឹក ខ្វះភ្លើងប្រើប្រាស់និងផ្ទះនៅឆ្ងាយពីសាលាកូនរៀនជាដើម។
តាមសេចក្ដីរាយការណ៍ដដែល គឺ ពលរដ្ឋដែលឡើងមកតវ៉ានៅពេលនេះ បាននិយាយថា ពួកគេស៊ូស្លាប់ និងមិនចាកចេញពីផ្ទះដែលពួកគេធ្លាប់នៅពីមុននោះទេ។ នៅពេលអតីតបុរីកីឡា ឡើងមករស់នៅលើអាគារ របស់ពួកគេវិញ នៅព្រឹកនេះ អាជ្ញាធរ ខណ្ឌ ៧កមរា ក៏បានមករាំរាំង ដែល ដោយបង្ខំឱ្យ ចាកចេញវិញតែ ពលរដ្ឋមិនធ្វើតាម ។ សូមជម្រាបថា តំបន់ភ្នំបាតដែល អាជ្ញាធរសាលារាជធានីភ្នំពេញ ជម្លៀសឱ្យទៅរស់នៅនោះ កាលពីឆ្នាំ២០១២ គឺ ស្ថិតនៅក្នុងខេត្តកំពង់ស្ពឺ ក្បែរជើងភ្នំឧត្ដុង មានប្រវែងប្រមាណជា ៥០ ទៅ៦០ គីឡូម៉ែត្រ ពីទីក្រុងភ្នំពេញ។ ពលរដ្ឋអតីតបុរិកីឡារស់នៅទីនោះមាន១៤០គ្រួសារ៕
