ភ្នំពេញ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេច ស ខេង ស្នើឱ្យគណៈកម្មាធិការជាតិសុវត្ថិភាពចរាចរណ៏ផ្លុវគោកបញ្ចូលក្រមសីលធម៌ចំនួន១០ចំនុចក្នុងការរួមចំណែកកាត់បន្ថយចំនួនអ្នកស្លាប់ ខណៈក្រសួងសាធារណការ និងដឹកជញ្ជូនមានទិសដៅមួយចំនួនក្នុងឆ្នាំ២០១៧ដើម្បីកាត់បន្ថយអត្រាអ្នកស្លាប់បង្ករដោយគ្រោះថ្នាក់ចរាចរណ៏។
តាមរបាយការណ៍បូកសរុបលទ្ធផលអនុវត្តច្បាប់ចរាចរណ៍ផ្លូវគោកថ្មី ឆ្នាំ២០១៦ និងទិសដៅការងារឆ្នាំ២០១៧ គណៈកម្មាធិការជាតិសុវត្ថិភាពចរាចរណ៏ផ្លូវគោក បានឱ្យដឹងថា ផ្អែកលើបទពិសោធន៍ក្នុងឆ្នាំ២០១៦ គ្រប់អង្គភាពចំណុះគណៈកម្មាធិការជាតិសុវត្ថិភាពចរាចរណ៏ផ្លូវគោក (គ.ស.ច.គ) ត្រូវប្រឹងប្រែងថែមទៀតឱ្យអស់ពីស្មារតីទទួលខុសត្រូវបំពេញភារកិច្ចឱ្យទទួលបានកាន់តែល្អប្រសើរក្នុងឆ្នាំ២០១៧។
ក្នុងន័យនេះសំដៅកាត់បន្ថយចំនួនអ្នកស្លាប់ឱ្យបាន៥០% នាឆ្នាំ២០២០ តាមផែនការ ទសវត្សអង្គការសហប្រជាជាតិ យ៉ាងហោចណាស់ក្នុងមួយឆ្នាំឱ្យបាន៩%ដោយអនុវត្តទិសដៅមួយចំនួនដូចជា៖ ធ្វើការគ្រប់គ្រងសុវត្ថិភាពចរាចរណ៏មានប្រសិទ្ធិភាព បង្កើនសុវត្ថិភាពហេដ្ឋារចនាសម្ព័ន្ធផ្លូវថ្នល់ បង្កើនសុវត្ថិភាពយានយន្ត វិសោធនកម្មនិងពង្រឹងការអនុវត្តច្បាប់ បន្តជំរុញការផ្សព្វផ្សាយអប់រំច្បាប់ បន្តជំរុញការរឹតបន្តឹងត្រួតពិនិត្យការអនុវត្តច្បាប់ ជាដើម។
ឆ្លើយតបទិសដៅរបស់គណៈកម្មាធិការជាតិសុវត្ថិភាពចរាចរណ៏ផ្លូវគោកនេះដែរ សម្តេច ស ខេង ស្នើឱ្យបញ្ចូលក្រមសីលធម៌១០ចំនុចបន្ថែមទៀតសម្រាប់សុវត្ថិភាពចរាចរណ៏ឆ្នាំ២០១៧មានដូចជា៖ ពេលបើកបរមិនត្រូវបើកបរលើសល្បឿនកំណត់ជាដាច់ខាត មិនត្រូវស្ថិតនៅក្រោមឥទ្ធិពលគ្រឿងស្រវឹងជាដាច់ខាត មិនត្រូវស្ថិតនៅក្រោមឥទ្ធិពលគ្រឿងញៀនជាដាច់ខាត មិនត្រូវស្ថិតក្នុងស្ថានភាពងងុយដេក។ ពេលបើកបរត្រូវ ពាក់មួកសុវត្ថិភាពជាដាច់ខាត ត្រូវពាក់ខ្សែសុវត្ថិភាពជាដាច់ខាតសម្រាប់រថយន្ត ត្រូវប្រកាន់ស្តាំជាដាច់ខាត ត្រូវត្រួតពិនិត្យបច្ចេកទេសយានយន្តជាដាច់ខាត ត្រូវចេះបើកបរជាដាច់ខាត និងចំនុចចុងក្រោយត្រូវតែប្រុងប្រយ័ត្នជានិច្ច។
បើតាមរបាយការណ៏របស់គណៈកម្មាធិការជាតិសុវត្ថិភាពចរាចរណ៏ផ្លូវគោក គ្រោះថ្នាក់ចរាចរណ៏ឆ្នាំ២០១៦ បានកើតទ្បើងចំនួន ៣.៧០០លើក បណ្តាលឱ្យស្លាប់ចំនួន ១.៧១៧នាក់ និងរបួស ៦.៦០៧ នាក់ (ធ្ងន់៥៩%)៕
