ភ្នំពេញ៖ កូនប្រុស លោក ណៃ វង់ ដា ឈ្មោះ ណៃ សូវីលី បាននិយាយនៅលើទំព័រហ្វេសប៊ុករបស់ឱពុករបស់ខ្លួន ថាថ្ងៃទី១មករាគឺគ្រប់ក្រុមគ្រួសារទាំងអស់ក្នុងពិភពលោកប្រារព្ធពិធីចូលឆ្នាំថ្មីប្រកបដោយសុភមង្គល និងស្នាមញញឹម ដែលខុសពីគ្រួសាររបស់ខ្លួន គឺ អាចត្រឹមតែសម្រក់ទឹកភ្នែក នៅពីមុខផ្លូវចូលពន្ធនាគារព្រៃស។ ការរៀបរាប់របស់កូនប្រុស លោកណៃវង់ដា ដូចនេះ នៅពេលដែលគេនិងម្ដាយ បានទៅសួរទុក្ខឪពុក នៅក្នុងពន្ធធនាគារព្រៃស កាលពីថ្ងៃអាទិត្យទី១មករា ហើយឆ្មាំគុកមិនអនុញ្ញាត។មន្ត្រីអះអាងថា ពេលខ្លះដែលមិនអនុញ្ញតគឺដោយសារម៉ោងសម្រាក។តែអ្នកចិត្តសាស្ត្រ សោកស្ដាយ ការដែលកេ្មងប្រុសស្វែងជួបឪពុកតែមិន បានដូចបំណង។ព័តមាននេះជូនសេចក្ដីពិស្ដារដោយកញ្ញា ជុំ ជោគជាតា៖
សាររបស់កេ្មងប្រុសណៃ សូវីលីបានរៀបរាប់ថា នៅពេលកូនលឺថាឪពុកមានជំងឺគឺនឹកពុកភ្លាម ហើយ រួតរះ ទៅជួបក្រែងបានជួប ហើយណាមួយចង់ជូនពរ ឪពុកសម្រាប់ឆ្នាំ្មថ្មីតែជាអកុសល សន្តិសុខមិនអនុញ្ញតឡើយ។ណៃ សូវីលីនិងម្ដាយត្រូវត្រឡប់មកវិញដោយក្ដីសោកស្ដាយ។
សាររបស់លោក ណៃ សូវីលី កូនប្រុស លោក ណៃ វង់ ដា បានរៀបរាប់ដូចនេះថា៖ «ម្តាយរបស់ខ្ញុំទទួលទូរសព្ទ័ពីឱពុករបស់ខ្ញុំនៅម៉ោង២រសៀល។ឱពុករបស់ខ្ញុំនិយាយថាគាត់មានជំងឺរាគចាប់តាំងពីយប់ម្សិលមិញគឺមួយថ្ងៃមុននេះ។ ហើយគាត់បានសម្រេចទូរសព្ទ័ទៅផ្ទះរហូតដល់ពេលរសៀលដោយសារតែស្ថានភាពជំងឺរបស់គាត់ធ្ងន់ធ្ងរ។ ភ្លាមៗនោះ ដោយសារទឹកចិត្តម្តាយរបស់ខ្ញុំ យើងក៏បានចេញដំណើរទៅកាន់ពន្ធនាគារព្រៃសភ្លាមដោយយកទៅជាមួយនូវថ្នាំ បបរនិងត្រីងៀតនិងភេសជ្ជៈមួយចំនួន។ ប៉ុន្តែឆ្មាំគុកមិនអនុញ្ញាតឲ្យយើងចូលក្នុងនោះទេដោយនិយាយថាគឺជាថ្ងៃអាទិត្យ។ ម្តាយរបស់ខ្ញុំមិនអាចធ្វើអ្វីបានទាំងអស់ក្រៅពីយំដោយសារគាត់មិនអាចជួយអ្វីដល់ឱពុករបស់ខ្ញុំបាន»។
ទាក់ទងនឹងរឿងនេះ អ្នកនាំពាក្យពន្ធនាគារព្រៃស លោក នុត សាវនា មានប្រសាសន៍ថា លោកក៏មិនដឹងពីមូលហេតុច្បាស់លាស់អំពីរឿងនេះដែរ ប៉ុន្ដែលោកគ្រាន់តែនិយាយបានថា ការទៅសួរសុខទុក្ខអ្នកជាប់ឃុំ គឺធ្វើទៅតាមការកំណត់របស់ពន្ធនាគារ។
លោក នុត សាវនា ៖ «ចំពោះម៉ោងពេលសួរសុខទុក្ខវាកំណត់ដោយពន្ធនាគារមួយៗ ហើយខ្ញុំអត់ដឹងយ៉ាងម៉េច ចាំមើលខ្ញុំសួរទៅសិន ហួសម៉ោងកំណត់ ឬយ៉ាងម៉េច។ព្រោះជាក់ស្ដែងថ្ងៃអាទិត្យ ម៉ោង ៣អ៊ឹងចឹង ភាគច្រើន ឆ្មាំគាត់ត្រូវការសម្រាកដែរ ...»។
មន្ត្រីអាដហុកចំនួន ៤រូប រួមមាន លោកស្រី លឹម មុន្នី លោក នី សុខា លោក យី សុខសាន លោកណៃ វង់ដា ត្រូវបានសាលាដំបូងរាជធានីភ្នំពេញសម្រេចឃុំបណ្តោះអាសន្ននៅពន្ធនាគារព្រៃស រងការចោទប្រកាន់ពីបទ សូកប៉ាន់សាក្សី ទាក់ទិននឹងសំណុំរឿងរបស់អ្នកនាង ខុម ចាន់តារ៉ាទី ហៅស្រីមុំ កាលពីថ្ងៃទី២ ខែឧសភា ឆ្នាំ២០១៦ កន្លងទៅ ។ ចំណែក លោក នី ចរិយា ត្រូវបានជាប់ឃុំជាបណ្ដោះអាសន្ននៅស្នងរដ្ឋាននគរបាលរាជធានី ក្នុងសំណុំរឿងខាងលើនេះផងដែរ ដោយចោទពីបទ «សមគំនិតសូកប៉ាន់សាក្សី។
ក្រុមគ្រួសារមន្ត្រីអាដហុក និងមន្ត្រី គ.ជ.ប មានសេចក្តីរំពឹងទុកថា នឹងបានជួបក្រុមគ្រួសាររបស់ខ្លួនទ្បើងវិញនៅឆ្នាំថ្មីនេះ។
អ្នកស្រី ភាវ ម៉ី ប្រពន្ធរបស់លោក ណៃ វ៉ង់ដា ធ្លាប់មានប្រសាសន៍ថា អ្នកស្រីមានជំនឿចិត្តថា ក្នុងឆ្នាំថ្មី ២០១៧នេះ មន្ត្រីសិទ្ធិមនុស្សនឹងត្រូវដោះលែងឱ្យមានសេរីភាពវិញ ព្រោះពួកគេមិនបានប្រព្រឹត្តិខុសច្បាប់នោះទេ។ អ្នកស្រី ភាវ ម៉ី ស្នើឱ្យថ្នាក់ដឹកនាំជាន់ខ្ពស់គណបក្សធំៗទាំងពីរនៅកម្ពុជា ស្នើឱ្យតុលាការពន្លឿននីតិវិធីក្នុងការដោះស្រាយដើម្បីឱ្យមន្ត្រីសិទ្ធិមនុស្ស ឆាប់មានសេរីភាពទ្បើងវិញ។
អ្នកស្រី ភាវ ម៉ី ៖ «សំណូមពរឱ្យភាគីទាំងពីរទាំងខាងរដ្ឋាភិបាល ទាំងគណបក្សប្រឆាំងហ្នឹងសូមឱ្យលោកទាំងពីរហ្នឹងចចារគ្នា ហើយពន្លឿនការដោះលែងខាងមន្ត្រីសិទ្ធិមនុស្សហ្នឹងឱ្យបានឆាប់ព្រោះគ្រួសារម្នាក់ៗរង់ចាំទន្ទឹងទាំងអន្ទះសារខាតុលាការក៏ត្រូវពន្លឿននីតិវិធីរបស់ខ្លួនដែរព្រោះក្រុមគ្រួសារកំពុងរង់ចាំ ឪពុកម្តាយ ប្តីដែលជាជំហរគ្រួសារនិងជាអ្នកមើលការខុសត្រូវក្នុងគ្រួសារ»។
ជុំវិញរឿងនេះដែរ លោកស្រី ធីតា ឃិះ នាយិការអង្គការសីលការមានប្រសាសន៍ថា លោកស្រីយល់ច្បាស់អំពីអ្វីដែលជាការលើកឡើងរបស់កូនប្រុសលោកណៃវង់ដា ហើយលោកស្រី ក៏យល់ច្បាស់ពីអារម្មណ៍ភរិយារបស់លោកណៃវង់ដាផងដែរ អំពីការព្រាត់ប្រាស់លោកណៃ វង់ ដា ។
លោកស្រី ធីតា ឃិះ ៖ «ខ្ញុំយល់ពីអារម្មណ៍អំពីអារម្មណ៍របៀបនេះរបស់ប្រពន្ធកូនគាត់ណាស់ ព្រោះប្រពន្ធព្រាត់ប្រាស់និងប្ដី កូនព្រាត់ប្រាស់និងឱពុក …»។
ទាក់ទងនឹងអារម្មណ៍ដែលកូនប្រុស និងភរិយាលោក ណៃ វង់ដា កំពុងមាន គឺ លោកស្រី ធីតាឃិះ មានតែការជូនពរ សុំអោយក្រុមគ្រួសារលោក ណៃ វង់ ដា ឆាប់បានវិលត្រឡប់ទៅជួបជុំគ្រួសារវិញក្នុងពេលឆាប់ៗ ហើយក៏សុំអោយភរិយា និងកូនរបស់លោក ណៃ វង់ដា មានភាពរឹងមាំ ដើម្បីផ្ដល់ជាកំលាំងចិត្តទៅដល់លោក ណៃ វង់ដា ។
លោកស្រី ធីតា ឃិះ ៖ «ចំពោះខ្លួនខ្ញុំ បានផ្ញើសារជូនពរ ដើម្បីអោយបានជួបអំពើយុត្ដិធម៌នៅក្នុងឆ្នាំថ្មីនេះ ជូនទៅដល់ក្រុមគ្រួសារគាត់ សូមអោយគាត់ទទួលបាននូវសេរីភាពឡើងវិញ ហើយដោះស្រាយនូវបញ្ហាដែលបានមានការជ្រុលជ្រួលទៅលើខ្លួនគាត់ ដែលគាត់អត់បានដឹងខ្លួនអី ។ចឹងទេសូមផ្ញើក្ដីនឹករលឹក ជូនពរសូមឲ្យគាត់ឆាប់បានរួចខ្លួន ហើយនឹងសុំឱ្យប្រពន្ធ នឹងកូនរបស់គាត់មានភាពរឹងមាំឡើងដើម្បីផ្ដល់ជាកំលាំងចិត្តដល់ប្ដីរបស់គាត់»។
ករណីគម្រោងនៃការដោះលែងមន្ដ្រីការពារសិទ្ធិមនុស្សសមាគមអាដហុក ៤រូប និងអគ្គលេខាធិការរងគ.ជ.ប នៅតែស្ថិតនៅក្នុងស្ថានភាពមិនច្បាស់លាស់ ដែលមកដល់ពេលនេះ បក្សកាន់អំណាច ហាក់ស្ទាក់ស្ទើរគ្រាន់តែអះអាងថា រងចាំនីតិវិធីរបស់តុលាការ ។ តែអ្នកសង្កេតការណ៍យល់ឃើញថា បក្សកាន់អំណាចអាចកំពុងតែប្រើល្បិចមួយទៀតលើបក្សប្រឆាំង ទើបមានដំណោះស្រាយជុំវិញការដោះលែង ឬលែងទោសអ្នកជាប់ឃុំទាំង ៥រូបនេះ៕
