ភ្នំពេញ ៖ របាយការណ៍បូកសរុបគ្រោះថ្នាក់ចរាចរណ៍ផ្លូវគោកឆ្នាំ ២០១៦ បានបង្ហាញថា ករណីគ្រោះថ្នាក់បានកើតឡើង ៣៧០០លើក បណ្តាលឲ្យស្លាប់ចំនួន ១៧១៧នាក់ និងរបួស៦៦០៧នាក់ ក្នុងនោះរបួសធ្ងន់មាន ៥៩ ភាគរយ។ នេះបើតាមរបាយការណ៍ដែលបង្ហាញក្នុងកិច្ចប្រជុំបូកសរុបលទ្ធផលត្រួតពិនិត្យការអនុវត្តច្បាប់ចរាចរណ៍ផ្លូវគោកឆ្នាំ ២០១៦ និងទិសដៅការងារឆ្នាំ ២០១៧។ កិច្ចប្រជុំនេះ ធ្វើនៅ សណ្ឋាគារសូហ្វីតែលភូគីត្រា ក្រុងភ្នំពេញ។
យោងតាមរបាយការណ៍នេះ មូលហេតុដែលបណ្តាលឲ្យគ្រោះថ្នាក់ចរាចរណ៍ គឺបណ្តាលមក ការបើកបរលើសល្បឿនកំណត់ ៤៤ភាគរយ មិនប្រកាន់ស្តាំ ១២ភាគរយ ស្រវឹង ១២ភាគរយ មិនគោរពសិទ្ធិ ៩ ភាគរយ វ៉ាជែង ១២ភាគរយ បត់ ៧ ភាគរយ កត្តាយានយន្ត ៣ ភាគរយ និងងងុយ ដេក ២ ភាគរយ។ ចំនួនគ្រោះថ្នាក់នេះ បើប្រៀបធៀបទៅនឹងឆ្នាំ ២០១៥ គ្រោះថ្នាក់ចរាចរណ៍បានថយចំនួន ៤៤៣លើក ស្មើ១១ភាគរយ អ្នកស្លាប់ថយចំនួន ២៧១នាក់ ស្មើ ១៤ ភាគរយ និងអ្នករបួសថយចំនួន ៥៤២ នាក់ស្មើ ៨ ភាគរយ។
របាយការណ៍ដដែលបង្ហាញទៀតថា ក្នុងចំណោមអ្នកស្លាប់ភាគច្រើនជាអ្នកជិះម៉ូតូដែលមានចំនួន ១២៧៤ នាក់ ស្មើ ៧៤ ភាគរយ ក្នុងនោះ មិនពាក់មួកសុវត្ថិមានចំនួន ៩៧៦នាក់ស្មើ ៥៧ ភាគរយ។
ចំណែកវិធានការណ៍រឹតបណ្តឹង និងអនុវត្តច្បាប់វិញ សមត្ថកិច្ចបានពិនិត្យយានយន្តសរុបចំនួន ៩.៦១៨.៤០៩ គ្រឿង(ម៉ូតូ៦១%)។ ពិនិត្យឃើញយានយន្តល្មើសចំនួន ១.៤៨១.៣៧៨ គ្រឿង(ម៉ូតូចំនួន៦២%)។ បានធ្វើការអប់រំចំនួន ៦១៨.៦៩១ គ្រឿងស្មើនឹង៤៤%។ បានពិន័យលើយានយន្តចំនួន ៨៦២.៦៩១គ្រឿង ក្នុងនោះម៉ូតូចំនួន ៦៨% ដោយអនុវត្តការបង់ប្រាក់ពិន័យតាមស្នាក់ការដែលបានកំណត់ទទួលបានប្រាក់ពិន័យសរុបចំនួន ២០.៤៩៦.១៩៥.០០០រៀល។
ក្នុងនោះរាជធានីភ្នំពេញ បានធ្វើការឃាត់អប់រំ និងពិន័យរថយន្តដឹកដីមិនគ្របជ្រុះរាយប៉ាយ និងដឹកទំនិញសំពីងសំពោងចំនួន ១៥១គ្រឿង។ បានត្រួតពិនិត្យរកឃើញយានយន្តល្មើសល្បឿនចំនួន ៣៥៩.៨៨១គ្រឿង និងល្មើសជាតិស្រវឹង ២៧៨.២១៨នាក់ អប់រំនិងពិន័យតាមច្បាប់ ក្នុងនោះឃាត់ខ្លួនបញ្ជូនសំណុំរឿងទៅតុលាការ៦០៤នាក់(អ្នកបើកបររងយន្ត ១៣៤នាក់ (ស្ត្រី៤នាក់) និងអ្នកបើកបរម៉ូតូ ៤៧១នាក់) ចំណែកការត្រួត ពិនិត្យសារធាតុញៀនលើអ្នកបើកបររថយន្តដឹកជញ្ជូនអ្នកដំណើរ ឬដឹកទំនិញ ចំនួន៦៦៥នាក់ រកឃើញអ្នកបើកបរយានយន្តមានសារធាតុញៀនចំនួន ១២៩នាក់ស្មើនឹង២០%៕
