ភ្នំពេញ ៖ ក្រុមគ្រួសារមន្ត្រីអាដហុក និងក្រុមគ្រួសារមន្ត្រី គ.ជ.ប កំពុងតែទន្ទឹងរង់ចាំពេលវេលាជួបក្រុមគ្រួសារវិញក្នុងឆ្នាំ ២០១៧ នេះ ខណៈស្ថានភាពនយោបាយមានភាពធូរស្បោយទ្បើងវិញ បន្ទាប់ពីគណបក្សសង្គ្រោះជាតិ សម្រេចចូលប្រជុំក្នុងសភាវិញ។ ជាងនេះទៀត ក្រុមគ្រួសារមន្ត្រីអាដហុក និងក្រុមគ្រួសារមន្ត្រី គ.ជ.ប ក៏ស្នើឱ្យគណបក្សនយោបាយធំៗទាំងពីរឆាប់ជួបចរចាគ្នា ដើម្បីពន្លឿនលទ្ធភាពដោះលែងស្វាមី និងម្តាយរបស់ពួកគេឱ្យបានជួបជុំក្រុមគ្រួសារវិញនៅឆ្នាំថ្មីនេះ។
អ្នកស្រី ភាវ ម៉ី ប្រពន្ធរបស់លោក ណៃ វ៉ង់ដា មានប្រសាសន៍ថា អ្នកស្រីមានជំនឿចិត្តថា ក្នុងឆ្នាំថ្មី ២០១៧នេះ មន្ត្រីសិទ្ធិមនុស្សនឹងត្រូវដោះលែង ឱ្យមានសេរីភាពវិញ ព្រោះពួកគេមិនបានប្រព្រឹត្តិខុសច្បាប់នោះទេ។ មានជំនឿចិត្តដូចនេះ ក៏ព្រោះតែអ្នកស្រីមើលឃើញថា សម្តេច ស ខេង បានបញ្ជាក់កាលពីពាក់កណ្តាលខែធ្នូកន្លងមកនេះថា នឹងស្វែងរកលទ្ធភាពពិភាក្សាដោះលែងមន្ត្រីសិទ្ធិមនុស្ស និងមន្ត្រី គ.ជ.ប ឱ្យមានសេរីភាពទ្បើងវិញ។ អ្នកស្រី ភាវ ម៉ី ស្នើឱ្យថ្នាក់ដឹកនាំជាន់ខ្ពស់គណបក្សធំៗទាំងពីរនៅកម្ពុជា និងស្នើឱ្យតុលាការពន្លឿននីតិវិធីក្នុងការដោះស្រាយដើម្បីឱ្យមន្ត្រីសិទ្ធិមនុស្ស ឆាប់មានសេរីភាពទ្បើងវិញ។ អ្នកស្រី ភាវ ម៉ី៖ «សំណូមពរឱ្យភាគីទាំងពីរទាំងខាងរដ្ឋាភិបាល ទាំងគណបក្សប្រឆាំងហ្នឹងសូមឱ្យលោកទាំងពីរហ្នឹងចចារគ្នា ហើយពន្លឿនការដោះលែងខាងមន្ត្រីសិទ្ធិមនុស្សហ្នឹងឱ្យបានឆាប់ព្រោះគ្រួសារម្នាក់ៗរង់ចាំទន្ទឹងទាំងអន្ទះសារខាតុលា ការក៏ត្រូវពន្លឿននីតិវិធីរបស់ខ្លួនដែរព្រោះក្រុមគ្រួសារកំពុងរង់ចាំ ឪពុក ម្តាយ ប្តីដែលជាជំហរគ្រួសារនិងជាអ្នកមើលការខុសត្រូវក្នុងគ្រួសារ»។
អ្នកស្រីលើកទ្បើងថា កន្លងមកអ្នកស្រីទទួលបានព័ត៌មានថា នៅចុងខែធ្នូ ឆ្នាំ២០១៦ អ្នកជាប់ឃុំអាចនឹងត្រូវដោះលែងឱ្យមានសេរីភាពទ្បើងវិញ ប៉ុន្តែរហូតមកពេលនេះ អ្នកស្រីមិនទាន់ទទួលបានសញ្ញាណថ្មីនៅទ្បើយនោះទេ។ តែយ៉ាងណាអ្នកស្រីរំពឹងថា នៅក្នុងឆ្នាំ ២០១៧នេះ ថ្នាក់ដឹកនាំជាន់ខ្ពស់គណបក្សធំៗទាំងពីរនៅកម្ពុជា នឹងឆាប់ជួបពិភាក្សាគ្នាដើម្បីរកលទ្ធភាពឱ្យមន្ត្រីសិទ្ធិមនុស្ស និងមន្ត្រី គ.ជ.ប មានសេរីភាពទ្បើងវិញ។អ្នកស្រី យ៉ែមចន្ថា៖«ចាំមើលសិនទៅ បើសិនជាគេចចារគ្នាត្រូវគ្នាអី គេដោះលែងអាហ្នឹងឃើញហើយ ខ្ញុំលេងហ៊ានសង្ឃឹម លេងហ៊ានអរអី ខ្ញុំខក ចិត្តខ្លាំង ខ្ញុំសំណូមពរសូមឱ្យគាត់ធ្វើម៉េចជួយដោះស្រាយអារឿងបញ្ហាឱ្យប្តីពួកខ្ញុំ ឱ្យបងប្អូនខ្ញុំសង្គមស៊ីវិលហ្នឹងឆាប់បានមានមានសេរីភាពទ្បើងវិញមកទុកគាត់ធ្វើអីយូពេកគាត់ឈឺផងអីផង ហើយឆ្នាំថ្មីគេជួបជុំគ្រួសារគ្រប់គ្នាហើយគ្រួសារពួកខ្ញុំត្រូវការជួបជុំដែរ យើងចង់ជួបជុំដូចគេដូចគេដែរតាសរស់នៅព្រាត់ប្រាសគ្នារាប់ឆ្នាំរស់នៅពិបាកប៉ុណ្ណា»។
ទាក់ទងនឹងបញ្ហានេះដែរ កញ្ញា អ៊ុន ប៊ុនណារី ជាកូនស្រីរបស់លោកស្រី លឹម មុន្នី និយាយថា កញ្ញាមិនទាន់មានជំនឿចិត្ត ១០០% ថាម្តាយរបស់ខ្លួនក៏ដូចជាមន្ត្រីសិទ្ធិមនុស្សផ្សេងៗទៀត អាចត្រូវដោះលែងបាននៅទ្បើយទេ ព្រោះអ្វីគ្រប់យ៉ាងស្ថិតនៅកណ្តាប់ដៃតុលាការនៅទ្បើយ។ កញ្ញា ប៊ុនណារី ស្នើឱ្យតុលាការឆាប់ដោះលែងមន្ត្រីសិទ្ធិមនុស្ស និងមន្ត្រី គ.ជ.ប ឱ្យមានសេរីភាពទ្បើងវិញ ព្រោះពួកគាត់មានវ័យកាន់ចំណាស់ទៅហើយ ជាពិសេស កញ្ញា ថាពួកគាត់មិនបានធ្វើខុសនោះទេ។ អ៊ុន ប៊ុនណារី «គ្រាន់តែសំណូមពរឱ្យគាត់ឆាប់ដោះលែងពួកគាត់ទាំងអស់គ្នាអញ្ចឹងព្រោះពួកគាត់ជាមនុស្សល្អ គាត់មិបានធ្វើអីខុសឆ្គងអញ្ចឹង ហើយព្រោះពួកគាត់រស់នៅបែកបាក់គ្រួសារ គាត់ក៏អត់បានធ្វើការងារគាត់ក៏ចាស់ៗអស់ ហើយ យកគាត់ទៅដាក់នៅក្នុងហ្នឹងអញ្ចឹងធម្មតានៅក្នុងពន្ធនាគារមនុស្សមិនល្អ មនុស្សឆបោក អ្នកជក់គ្រឿងញៀន ហើយយកពួកគាត់ទៅធ្វើអញ្ចឹងធ្វើបាបគាត់ខ្លាំងទាំងផ្លូវកាយ ផ្លូវចិត្តគាត់»។
ជុំវិញនឹងការលើកទ្បើងនេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន្ត បានផ្តល់បទសម្ភាសន៍ឱ្យវិទ្យុស្ត្រីនៅថ្ងៃនេះដែរថា ថ្នាក់ដឹក នាំគណបក្សប្រជាជនកម្ពុជា និងថ្នាក់ដឹកនាំគណបក្សសង្គ្រោះជាតិ មិនទាន់អាចកំណត់ពេលជួបជជែកគ្នាដើម្បីដោះលែងអ្នកទោសទាំងនោះបាននៅឡើយនោះទេ ។ យ៉ាងណាលោក សុខ ឥសាន្ត សង្កត់ធ្ងន់ថា ទាល់តែតុលាការបញ្ចប់នីតិវិធីជាមុនសិន ទើបបក្សទាំងពីរអាចពិនិត្យលទ្ធ ភាពតាមក្រោយ។ លោក សុខ ឥសាន្ត៖«ទុកឱ្យតុលាការដំណើរការនីតិវិធីចប់សិនចាំយើងពិនិត្យតាមក្រោយបាន បាន បើអញ្ចឹងគេចោទយើងថាយើងរំលោភលើសមត្ថកិច្ចតុលាការហើយវាមានវប្បធម៌និទណ្ឌភាពទៀតហើយ តាមខ្ញុំមានមតិយូរហើយគឺថាយើងមិនអាចជជែកគ្នារវាងគណ បក្ស និងគណបក្ស ដើម្បីដោះលែងអ្នកទោសរំលោភលើសមត្ថកិច្ចតុលាការបានទេ ដូចឯកឧត្តមកឹម សុខាយើងឃើញថាតុលាការគេកាត់សេចក្តីចប់សពគ្រប់ហើយគាត់អត់ប្តឹងឧទ្ធរណ៍អាហ្នឹងបានចប់បើកាលណាមិនទាន់កាត់ក្តីទេអ្នកជាប់ឃុំទាំងអស់ហ្នឹងមិនទាន់ក្លាយជាអ្នកទោសទេ បើមិនទាន់ក្លាយជាអ្នកទោសទៅលើកលែងទោសមិចបើគេមិនទាន់មានទោសផង»។
គួរបញ្ជាក់ថា មន្ត្រីអាដហុកចំនួន ៤រូប និងមន្ត្រី គ.ជ.ប ១ រូប ដែលកំពុងឃុំខ្លួនបណ្តោះអាសន្ននៅក្នុងពន្ធនាគារ។ មន្ត្រីសិទ្ធិមនុស្សទាំងបួនរូបនោះរួមមាន លោកស្រី លឹម មុន្នី លោក នី សុខា លោក យី សុខសាន លោក ណៃ វង់ដា ត្រូវបានសាលាដំបូងរាជធានីភ្នំពេញសម្រេចឃុំបណ្តោះអាសន្ននៅពន្ធនាគារព្រៃស រងការចោទប្រកាន់ពីបទ «សូកប៉ាន់សាក្សី» ទាក់ទិននឹងសំណុំរឿងរបស់អ្នកនាង ខុម ចាន់តារ៉ាទី ហៅស្រីមុំ កាលពីថ្ងៃទី២ ខែឧសភា ឆ្នាំ២០១៦ កន្លងទៅ ។ ចំណែក លោក នី ចរិយា ត្រូវបានចោទពីបទ «សមគំនិតសូកប៉ាន់សាក្សី»ក្នុងសំណុំរឿងខាងលើនេះដែរ៕
