ភ្នំពេញ ៖ ក្នុងឱកាសឆ្នាំថ្មី ឆ្នាំសកល ២០១៧ មេដឹកនាំគណបក្សប្រឆាំងគឺលោក សម រង្ស៊ី និងលោក កឹម សុខា បានអំពាវនាវឱ្យអ្នកនយោ បាយកម្ពុជា និងអ្នកដឹកនាំទាំងអស់រួបរួមគ្នាដោះស្រាយបញ្ហាដែលនៅសេសសល់ដោយសន្តិវិធី ដើម្បីធ្វើឱ្យប្រជាពលរដ្ឋខ្មែរអាចរស់នៅប្រ កបរបរចិញ្ចឹមជីវិត ដោយគ្មានការភ័យខ្លាច ការគម្រាមកំហែង និងភាពអយុត្តិធម៌ក្នុងសង្គមដើម្បីកសាងជាតិឲ្យកាន់តែរុងរឿងល្អប្រសើរឡើង។ បែបក្តីនេះលោក គឹម សុខ អ្នកវិភាគបញ្ហាសង្គមយល់ថា អ្នកនយោបាយខ្មែរឈប់ឈ្លោះគ្នាទៅបាន លុះត្រាតែអ្នកទាំងនោះគិតប្រយោជន៍ជាតិជាធំ។
ជាមួយនឹងការចង់ឱ្យអ្នកនយោបាយខ្មែររួមគ្នា លោក កឹម សុខា ក៏បានឧទ្ទិសឱ្យហេតុការណ៍អាក្រក់ទាំងឡាយដែលបានកើតឡើងនៅលើទឹកដីកម្ពុជាកន្លងមក រលាយសាបសូន្យផងដែរ។
ចំណែកលោក សម រង្ស៊ី មេបក្សប្រឆាំងកំពុងរស់នៅក្រៅប្រទេស ក៏បានសរសេរសារជូនពរប្រជាពលរដ្ឋខ្មែរផងដែរ។ ក្នុងសារជូនពរនោះ ប្រធានគណបក្សប្រឆាំងរូបនេះ បានបួងសួងដល់វត្ថុស័ក្តិសិទ្ធក្នុងលោក ព្រមជាមួយនឹងការប្តេជ្ញារបស់ខ្លួន ខិតខំធ្វើយ៉ាងណាដើម្បីឱ្យគ្រប់គណបក្ស នយោបាយ បានជានាគ្នា ស្រុះស្រួលគ្នា និងពួតដៃគ្នាជាមហាគ្រួសារខ្មែរតែមួយ ដើម្បីការពារ និងថែរក្សាជាតិមាតុភូមិឱ្យបាននៅគង់វង្សជានិរន្តិ៍។ ជាងនេះទៀតលោកថា អ្នកនយោបាយខ្មែរត្រូវរួមកម្លាំងគ្នាជាធ្លុងមួយ ដើម្បីកសាងជាតិឲ្យកាន់តែរុងរឿងល្អប្រសើរ។
ទន្ទឹមគ្នានេះដែរ លោកបានជូនពរអ្នកដែលកំពុងរងគ្រោះដោយអំពើអយុត្តិធម៌គ្រប់បែបយ៉ាង មានដូចជាការរឹបអូសយកដីធ្លី ផ្ទះសម្បែងជាដើម និងពីការធ្វើទុក្ខបុកម្នេញតាមរូបភាពផ្សេងៗ ចាប់ផ្តើមឃើញពន្លឺយុត្តិធម៌ក្នុងឆ្នាំថ្មី ឆ្នាំ ២០១៧ នេះ។
រីឯសម្តេចនាយករដ្ឋមន្ត្រី ហ៊ុន សែន មិនបានអំពាវនាវអ្វីទេ ដោយគ្រាន់តែជូនពរ ដល់ជនរួមជាតិគ្រប់ស្រទាប់វណ្ណៈ ទាំងក្នុង និងក្រៅប្រទេស កងកម្លាំងប្រដាប់អាវុធគ្រប់ប្រភេទ រាប់ទាំងកងកម្លាំងដែលកំពុងបំពេញភារកិច្ចរក្សាសន្តិភាព នៅប្រទេសនានា ក្រោមឆ័ត្រអង្គការសហប្រជាជាតិផង សូមប្រកបដោយសេចក្តីសុខ និង សេចក្តីចំរើនគ្រប់ៗគ្នា។
ជុំវិញសារជូនពររបស់មេដឹកនាំគណបក្សប្រឆាំង លោក គឹម សុខ អ្នកតាមដានស្ថានការណ៍សង្គមកម្ពុជា លើកឡើងថា អ្នកនយោបាយខ្មែរឈប់ឈ្លោះគ្នាទៅបាន លុះត្រាតែអ្នកទាំងនោះគិតប្រយោជន៍ជាតិជាធំ មានស្មារតីជាតិដូចគ្នា នោះទើបអាចឈប់ឈ្លោះគ្នា និយាយគ្នាដោយស្រួល។
តែយ៉ាងណាមិញ លោកមើលឃើញថា អ្នកនយោបាយកម្ពុជាបច្ចុប្បន្ន មិនបានគិតពីបញ្ហាជាតិនោះទេ ជាពិសេសគណបក្សកាន់អំណាច ដែលធ្វើអ្វីៗដើម្បីតែរក្សាអំណាចរបស់ខ្លួន និងបង្កើនឥទ្ធិពលបក្សពួកនិយម។ លោក គឹម សុខ៖ «ប៉ុន្តែអ្វីដែលលោកកឹម សុខាអំពាវនាវនេះ វាអត់ខុសទេ វាជាផ្លូវល្អតែមួយគត់សម្រាប់ធ្វើនយោបាយឬឈរជំហរនយោបាយឱ្យកាន់តែរឹងមាំ ហើយប្រកបដោយយុទ្ធសាស្ត្រទន់ភ្លន់នៅក្នុងការប្រកួត ប្រជែងពីព្រោះនៅក្នុងប្រទេសកម្ពុជា បើធ្វើក្តុងក្តាំងគឺអត់ទៅរួចទេ ធ្វើក្តុងក្តាំងគុក ធ្វើក្តុងក្តាំងច្រវ៉ាក់ហើយ ពីព្រោះវាស្ថិតនៅក្រោមអំណាចរបស់គេដែលគេមានឥទ្ធិពលគ្រប់គ្រាន់ពេញដៃក្នុងការបំភ្លៃច្បាប់ធ្វើបាបអ្នកប្រឆាំង ដូច្នេះអ្នកប្រឆាំងត្រូវនិយាយអំពីយុទ្ធសាសាស្ត្រនយោបាយវិញ ហើយយុទ្ធសាស្ត្រនយោបាយគឺរបៀបដែលលោកកឹម សុខាធ្វើហ្នឹងគឺអត់ខុសទេ»។
ទោះជាយ៉ាងណា អ្នកវិភាគបញ្ហាសង្គមរូបនេះ បានអំពាវនាវឱ្យអ្នកនយោបាយក្នុងប្រទេសកម្ពុជាទាំងអស់ ក្នុងឆ្នាំថ្មី ឆ្នាំ ២០១៧ ងាកមើលគិតពីការប្រកួតប្រជែងគ្នា ដោយអហឹង្សាទាំងពាក្យសម្តី និងសកម្មភាព ហើយនាំគ្នាគិតពីប្រយោជន៍ជាតិវិញ៕
