ភ្នំពេញ៖មន្ត្រីម្នាក់នៃគណៈកម្មាធិការជាតិរៀបចំការបោះឆ្នោតអំពាវនាវសុំឱ្យគណបក្សនយោបាយដែលបានចុះបញ្ជីគណបក្សរួចហើយត្រូវពន្លឿនការរៀបចំបញ្ជីឈ្មោះបេក្ខជនសម្រាប់ឈរឈ្មោះជាក្រុមប្រឹក្សាឃុំ សង្កាត់ ឱ្យទាន់ពេលវេលាខណៈការទទួលពាក្យសុំចុះឈ្មោះបេក្ខជនមានតែរយៈពេលបីថ្ងៃប៉ុណ្ណោះគឺថ្ងៃទី០៣ ដល់ថ្ងៃទី០៥ ខែមីនា ឆ្នាំ២០១៧។
លោក កែវ ផល្លា ថ្លែងដូចនេះធ្វើឡើងនៅក្នុងកិច្ចប្រជុំ ផ្សព្វផ្សាយជាមួយភាគីពាក់ព័ន្ធនៅទីស្តីការគណៈកម្មាធិការជាតិរៀបចំការបោះឆ្នោតកាលព្រឹកថ្ងៃទី២៨ ខែកញ្ញា ឆ្នាំ២០១៦។ តែយ៉ាងនេះក្ដីគណបក្សនយោបាយមួយចំនួនបានលើកឡើងថាពួកគេបានត្រៀមខ្លួនរួចហើយ។
លោក កែវ ផល្លា ទីប្រឹក្សា គ.ជ.ប និងជាប្រធាននាយកដ្ឋានសវនកម្មច្បាប់និងវិវាទកម្ម នៃគណៈកម្មា ធិការជាតិរៀបចំការបោះឆ្នោត ក្រោយពីបញ្ចប់ការបិទបញ្ជីឈ្មោះបោះឆ្នោតដំបូង និងបញ្ជីបោះឆ្នោត ផ្លូវការរួចរាល់សម្រាប់បេក្ខជនត្រៀមឈរឈ្មោះជាក្រុមប្រឹក្សាឃុំ សង្កាត់ គឺបេក្ខជនម្នាក់ៗត្រូវទៅបញ្ជាក់ថាខ្លួនពិតជាមានឈ្មោះក្នុងបញ្ជីបោះឆ្នោតក្នុងឃុំសង្កាត់ណាមួយ។
លោកបានឱ្យដឹងថា តាមច្បាប់បោះឆ្នោតបានកំណត់ថា បេក្ខជនឈរឈ្មោះរបស់គណបក្សនីមួយៗ ត្រូវមានពីរដង នៃចំនួនអសនៈនៅតាមឃុំ សង្កាត់នីមួយៗ លោកសុំឱ្យគណបក្សទាំងអស់ពន្លឿនការរៀបចំបេក្ខជនដើម្បីឱ្យការដាក់ពាក្យបានទាន់ពេលវេលា។ លោក កែវ ផល្លា៖«ការរៀបចំវាយូរប៉ុន្តែឱ្យដាក់នោះវាមានតែបីថ្ងៃទេបើដាក់ក្រោយបីថ្ងៃមានន័យថាគណបក្សបោះបង់ចោល ក្នុងការប្រកួត ប្រជែ ងការបោះឆ្នោតជ្រើសរើសក្រុមប្រឹក្សាឃុំសង្កាត់»។
ទាក់ទិនរឿងនេះលោក សុខ ឥសាន អ្នកនាំពាក្យគណបក្សប្រជាជនកម្ពុជាបានប្រាប់វិទ្យុស្ត្រីថា គណបក្សប្រជាជនកម្ពុជា មានពេលវេលាគ្រប់គ្រាន់សម្រាប់រៀបចំសំណុំបែបបទផ្សេង។ លោកបន្ថែមថាសម្រាប់គណបក្សប្រជាជនកម្ពុជា ការជ្រើសរើសបេក្ខជនឱ្យឈរឈ្មោះ គឺអាស្រ័យទៅលើការបោះឆ្នោតជាសម្ងាត់របស់សមាជិក ដោយគណបក្សមិនធ្វើការជ្រើសរើសនោះទេ។ លោកសុខ ឥសាន ៖«វាអាស្រ័យទៅលើសន្លឹកឆ្នោតរបស់សមាជិកគណៈកម្មការបក្សនៅមូលដ្ឋាននោះអ្នកបោះឆ្នោតជាសម្ងាត់ វាអាស្រ័យទៅលើការសម្រេចចិត្តទៅសន្និបាតរបស់គណបក្សឃុំ នីមួយៗ»។
ចំណែកគណបក្សសង្គ្រោះជាតិ ដែលជាគណបក្សប្រឆាំងធំជាងគេនៅកម្ពុជា បានដំណើរក្នុងការរៀបចំជ្រើសរើសបេក្ខជាបណ្តើរៗហើយ។
លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិប្រាប់ឱ្យដឹងថា បច្ចុប្បន្ននេះមន្ត្រីថ្នាក់មូលដ្ឋានរបស់គណបក្សកំពុងដំណើរក្នុងការបោះឆ្នោតជ្រើសរើសបេក្ខជនសម្រាប់ឈរឈ្មោះជាក្រុមប្រឹក្សាឃុំសង្កាត់នៅឆ្នាំ២០១៧ខាងមុខនេះ។
ដោយឡែកគណបក្សប្រជាធិបតេយ្យមូលដ្ឋានដែលជាគណបក្សទើបបង្កើតថ្មីក្រោយការបោះឆ្នោតឆ្នាំ២០១៣ សម្រេចជ្រើសរើសបេក្ខជនឱ្យឈរឈ្មោះជាប្រឹក្សាឃុំ តែជាង២០ឃុំ ប៉ុណ្ណោះ។
លោក សាម អ៊ីន អ្នកនាំពាក្យគណបក្សប្រជាធិបតេយ្យមូលដ្ឋានបានឱ្យដឹងថា មូលហេតុដែលគណប ក្សចូលរួមប្រកួតតែជាង២០ឃុំនេះ ដោយសាគណបក្សចង់ចម្រាញ់យកគុណភាព ។
លោកបានឱ្យដឹងបន្ថែមថា បច្ចុប្បន្ននេះគណបក្សបានដាក់ផែនទៅឃុំទាំងជាង២០ដែលគណបក្សបានជ្រើសរើស ដើម្បីធ្វើសមាជ ឃុំ បោះឆ្នោតជ្រើសរើសលេខរៀងបេក្ខជនសម្រាប់ឈរឈ្មោះ។ លោកសាម អ៊ីន ៖«អញ្ចឹងយើងគិតថា យើងធ្វើកិច្ចនេះទាន់បច្ចុប្បន្ននេះយើងបានរៀបចំធ្វើសមាជឃុំ ធ្វើការជាមួយឃុំដែលយើងធ្វើការជាមួយគាត់បាន២៤ឃុំហើយ យើងគិតថាប្រហាក់ប្រហែលជាប្រមាណ២០ឃុំហ្នឹង យើងនឹងអាចត្រៀមខ្លួនដើម្បីចូលរួមការបោះឆ្នោត»។
យោងតាមប្រតិទិនរបស់គណកម្មាធិការជាតិរៀបចំការបោះឆ្នោត គ.ឃ.ស.ប នឹងចាប់ផ្តើមទទួលពាក្យសុំចុះបញ្ជីបេក្ខជននៃគណបក្សនយោបាយរយៈពេលបីថ្ងៃ គឺពីថ្ងៃទី០៣ ដល់ថ្ងៃទី០៥ ខែមីនា ឆ្នាំ២០១៧។
ថ្ងៃបិទផ្សាយបញ្ជីឈ្មោះបេក្ខជននៅ គ.ឃ.ស.ប នឹងធ្វើឡើងរយៈពេល៧ថ្ងៃ ដែលថ្ងៃចុងក្រោយគឺនៅថ្ងៃទី១៨ ខែមេសា ឆ្នាំ២០១៧។ សូមជម្របផងដែរថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ នឹងធ្វើឡើងនៅ០៤ ខែមិថុនា ឆ្នាំ២០១៧៕
