នៅមិនយូរប៉ុន្មានទេ អ្នកនឹងបានដឹងអំពីការបើកសមរភូមិមួយនៅ Gambia ក្រោមប្រតិបត្តិការកងទ័ពសហព័ន្ធអាហ្វ្រិកដែលទទួលបានការគាំទ្រពីក្រុមប្រឹក្សាសន្តិសុខអង្គការសហប្រជាតិ។ បើ មានព្រឹត្តិការណ៍ដូចនេះមែន គឺជារឿងភាគ ល្បែងឆ្មាចាប់កណ្ដុរនៅប្រទេសតូចមួយនៅអាហ្វ្រិក រវាង ជនផ្ដាច់ការ Yahya Jammeh តំណាងដោយកណ្ដុរ Jerry និងកងទ័ពសហភាពអាហ្វ្រិក តំណាងដោយ Tomy ។សូមស្ដាប់ការ ប្រែសម្រួល រឿងល្បែងឆា្មចាប់កណ្ដុរនៅGambia ដែលជាភាគបន្ត ដោយលោកនួន បូរិន ដូចតទៅ៖
លោក Marcel de Souza ប្រធានសហគមន៍សេដ្ឋកិច្ច រដ្ឋអាហ្រិ្វកបានប្រាប់បណ្ដាញផ្សាយព៏ត៌មានAljazeera ថាមិនយូរនោះទេ កងទ័ពនៃប្រទេសជាសមាជិកនឹងត្រូវបានបញ្ចូន មកចូលប្រទេស Gambia ដើម្បី បណ្ដេញ លោកJammeh ពីវិមានប្រធានាធិបតី នៅថ្ងៃទី១៨ មករា ជាឱកាសនៃការស្បថចូលកាន់តំណែង របស់លោក Adama Barrowដែលបានឈ្នះឆ្នោតកាលពីថ្ងៃទី១ធ្នូ។
លោក Marcel de Souza ៖«ឱសានវាទ គឺនៅថ្ងៃទី១៩មករា គឺការផុតអាណត្តិរបស់លោក Jammeh ហើយ បើមិនចុះចេញពីតំណែង គឺយើងនឹង បញ្ចូនកងទ័ពចូលប្រទេសនេះ ដើម្បីស្ដារ សន្តិភាព និង ស្ថានការណ៍នយោបាយឡើងវិញ»។
លោក Jammeh បានទទួលស្គាល់បរាជ័យរបស់លោកម្ដងរួចមកហើយ
ជាការពិតបុរសខ្លាំងនៅប្រទេសហ្គាំប៊ៀ លោក Jammeh បានសារភាពថា លោកពិតជាចាញ់ឆ្នោតទៅហើយ តែប៉ុន្មានថ្ងៃប៉ុណ្ណោះលោកបានកែពាក្យសម្ដីវិញ ដោយអះអាងថា ការចាញ់ឆ្នោតរបស់លោកដោយសារតែមានភាពមិនប្រក្រតីមួយចំនួនបានកើតឡើង។
ករណីនេះ លោក Jammeh សន្យាប្ដឹងទៅតុលាការកំពូលដែលគេថា ជាឧបករណ៍របស់លោកអោយបើកការស៊ើបអង្កេត ហើយជំនុំជម្រះក្ដីឡើងវិញ។ នៅពេលដែលលោកច្រានចោលលទ្ធផលបោះឆ្នោត បុរសខ្លាំងរូបនេះ ក៏បានបញ្ជាទៅកាន់កងទ័ពស្មោះត្រង់នឹងលោកឱ្យចូលទៅឡោមព័ទ្ធស្នាក់ការរៀបចំការបោះឆ្នោត ដើម្បីចាប់ខ្លួនពួកមន្ដ្រីបោះឆ្នោតមួយចំនួនធ្វើជាចំណាប់ខ្មាំង។ តែនៅជាមួយគ្នានេះ ឧត្ដមសេនីយ៍ជាន់ខ្ពស់របស់ប្រទេសនេះ បានបញ្ជា ឱ្យកងទ័ពទាំងនោះត្រឡប់ចូលបន្ទាយវិញ ដោយរង់ចាំអ្នកនយោបាយចរចារកដំណោះស្រាយ។
វិធានការរបស់ក្រុមប្រឹក្សាសន្ដិសុខអង្គការសហប្រជាជាតិ
ភ្លាមៗបន្ទាប់ពីលោក Jammeh បញ្ជាកងទ័ពដើរល្បាតគ្រប់ទីកន្លែងដែលមានរូបភាពពីការគំរាមកំហែរពីក្រុមអ្នកប្រឆាំង និងមានបំណងធ្វើរដ្ឋប្រហារលទ្ធផលបោះឆ្នោត ក្រុមប្រឹក្សាសន្ដិសុខអង្គការសហប្រជាជាតិ ដែលតំណាងដោយប្រទេសហ្សេនេហ្គាល់ បានប្រាប់ទៅលោក Jammeh ឱ្យទទួលយកលទ្ធផលបោះឆ្នោត នឹងផ្ទេរអំណាចដោយសន្តិវិធីទៅអោយអ្នកឈ្នះឆ្នោត ។
ជាមួយគ្នានេះ ទាំងលោក បាន គីមូន អគ្គលេខាធិការអង្គការសហប្រជាជាតិ និងលោក Zeid Ra'ad Al Hussein ស្នងការសិទ្ធិមនុស្សអង្គការសហប្រជាជាតិ បានប្រាប់ទៅលោក Jammeh ឱ្យបញ្ជាទ័ពត្រឡប់ចូលបន្ទាយវិញ ហើយចរចាជាមួយអ្នកឈ្នះឆ្នោត។
មេដឹកនាំអង្គការសហប្រជាជាតិទាំងពីររូបនេះ បានព្រមានថា លោក Jammeh អាចនឹងជួបគ្រោះថ្នាក់ ហើយមានទោសទៀតផង បើលោករំលោភសិទ្ធិមនុស្ស និងបង្រា្កបទៅលើក្រុមប្រឆាំង។
ល្បែងឆា្មចាប់កណ្ដុរ នៅភាគបន្តទៀត គឺជាការធ្វើសេចក្ដីសម្រេចចុងក្រោយ របស់ លោក Jammeh ថាតើលោក យល់ព្រមទទួលយកសំពាធរបស់សហគមន៍អន្តរជាតិ ឬក៍តាំងជាសត្វកណ្ដុរបន្ត សម្ងំនៅក្នុងវិមានព្រមានធានាធិបតី ដែលងាយគ្រោះថ្នាក់នេះ៕
