ភ្នំពេញ ៖ មេបក្សប្រឆាំងកំពុងរស់នៅក្រៅប្រទេសលោក សម រង្ស៊ី នៅថ្ងៃទី ២៦ ធ្នូ នេះ បានសរសេរលើទំព័រហ្វេសប៊ុករបស់លោក ដោយលើកឡើងថា ការនិរទេសខ្លួនលោក និងឥស្សរជននយោបាយជាន់ខ្ពស់ផ្សេងទៀត សុទ្ធសឹងតែត្រូវបានធ្វើឡើងដោយរបបគ្រប់គ្រងផ្តាច់ការក្នុងសម័យនីមួយៗនោះ។
តែយ៉ាងណាអ្នកនាំពាក្យបក្សកាន់អំណាចថា សំណេរវោហារសាស្ត្ររបស់លោក សម រង្ស៊ី ដែលប្រៀបធៀបខ្លួនឯងជាមួយឥស្សរជនដដៃទៀតនេះ គឺគ្រាន់តែដើម្បីលើកតម្កើងមោទកភាពខ្លួនឯងតែប៉ុណ្ណោះ។
នៅថ្ងៃទី ២៦ ខែធ្នូ នេះ លោក សម រង្ស៊ី បច្ចុប្បន្នកំពុងរស់នៅនិរទេសខ្លួន គេចពីដែនសមត្ថកិច្ចរបស់តុលាការនោះ បានផ្សព្វផ្សាយសារមួយលើទំព័រហ្វេសប៊ុក អបដោយរូបថតឥស្សរជននយោបាយជាន់ខ្ពស់កម្ពុជាមួយចំនួន ដូចជាលោក សឺង ង៉ុកថាញ់ លោក ប៉ែន សុវណ្ណ និងព្រះបាទសម្ដេចនរោត្តមសីហនុ ដោយលើកឡើងថា លោកនិងតួអង្គនយោបាយទាំងនោះ សុទ្ធតែត្រូវបាននិរទេសខ្លួនក្នុងរបបគ្រប់គ្រងបែបផ្តាច់ការ។
មេបក្សប្រឆាំងរូបនេះបន្តថា ក្នុងប្រវត្តិសាស្ត្រកម្ពុជា មានតួអង្គនយោបាយយ៉ាងតិច ៤ រូប ដែលត្រូវរដ្ឋអំណាចក្នុងសម័យនីមួយៗនោះ បាននិរ ទេសមិនឲ្យមានវត្តមាននៅលើទឹកដីកម្ពុជា ដោយសារតែរដ្ឋអំណាចសម័យនោះ ភ័យខ្លាចប្រជាប្រិយភាពឥស្សរជនប្រឆាំងរូបនោះ ដែលអាចផ្តួលរំលំរបបគ្រប់គ្រង់សម័យនោះបាន។
ឥស្សរជននិរទេសខ្លួន ដែលលោក សម រង្ស៊ី លើកឡើងក្នុងទំព័រហ្វេសប៊ុកនោះ មានលោក សឺង ង៉ុកថាញ់ ត្រូវបានអាជ្ញាធរអាណា និគមនិយមបារាំង និរទេសចេញពីប្រទេសកម្ពុជា ពីឆ្នាំ ១៩៤៦ ដល់ឆ្នាំ ១៩ ៥១។ ទី២ គឺលោក ប៉ែន សុវណ្ណ ត្រូវបានអាជ្ញាធរអាណានិគមនិយមវៀតណាម និរទេសចេញពីប្រទេសកម្ពុជា ពីឆ្នាំ ១៩៨១ ដល់ឆ្នាំ ១៩៩១។ ទី៣ គឺសម្តេចព្រះនរោត្តម សីហនុ ត្រូវបានរបបសាធារណរដ្ឋរបស់លោក លន់ នល់ និរទេសព្រះអង្គ ឲ្យគង់នៅក្រៅប្រទេស ពីឆ្នាំ ១៩៧០ ដល់ឆ្នាំ ១៩៧៥។ បន្ទាប់មកទៀត ព្រះអង្គត្រូវបានរបបសាធារណរដ្ឋប្រជាមានិតកម្ពុជា ដឹកនាំដោយ សម្តេច ជា ស៊ីម សម្តេច ហេង សំរិន សម្តេច ហ៊ុន សែន ក្រោមអាណានិគមនិយមវៀតណាម និរទេសព្រះអង្គ ឲ្យគង់នៅក្រៅ ប្រ ទេស ពីឆ្នាំ ១៩៧៩ ដល់ឆ្នាំ ១៩៩១។ លោក សម រង្ស៊ីសរសេរថា រូបលោកផ្ទាល់ត្រូវបានរបបផ្តាច់ការរបស់សម្ដេច ហ៊ុន សែន និរទេស ឲ្យនៅក្រៅប្រទេស ៣ ដងជាបន្តបន្ទាប់ គឺលើកទី ១ ពីឆ្នាំ ២០០៥ ដល់ឆ្នាំ ២០០៦ លើកទី ២ ពីឆ្នាំ ២០០៩ ដល់ឆ្នាំ ២០១៣ និងលើកទី ៣ ពីឆ្នាំ ២០១៥ មកដល់បច្ចុប្បន្ន។
យ៉ាងណាក្តី លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា ដែលជាគណបក្សកាន់អំណាចលើកឡើងថា សំនួនវោហារសាស្ត្ររបស់មេបក្សប្រឆាំងជាប់ក្តីក្តាំនៅតុលាការ គឺគ្រាន់តែដើម្បីលើកកម្ពស់មោទនភាពឱ្យខ្លួនឯង ដើម្បីតែប្រជាប្រិយភាពតែប៉ុណ្ណោះ។ អ្នកនាំពាក្យបក្សកាន់អំណាចរូបនេះបន្តថា ការដែលលោក សម រង្ស៊ី ធ្វើការប្រៀបធៀបខ្លួនឯងទៅនឹងឥស្សរជនផ្សេងទៀតនេះ គឺមិនសមទំនងនោះទេ ដោយហេតុថា ការយាងចេញទៅក្រៅប្រទេសរបស់ព្រះបាទសីហនុ គឺដោយសាររបប លន់ នល់ ធ្វើរដ្ឋប្រហារ។ ចំណែកការនិរទេសខ្លួនរបស់លោក ប៉ែន សុវ ណ្ណ វិញគឺជាប់ពាក់ព័ន្ធនឹងការប្រឆាំងកិច្ចអន្តគមន៍របស់កងទ័ពវៀតណាមដែលមកជួយផ្តួលរំលំរបបខ្មែរក្រហមដែលកាប់សម្លាប់ប្រជាជនខ្មែរ។
ទាក់ទិនការនិរទេសខ្លួនលោក សម រង្ស៊ី វិញលោក សុខ ឥសាន្ត លើកឡើងយ៉ាងដូច្នេះថា៖«រដ្ឋាភិបាលលោកចេញក្រដាសមិនឱ្យចូលកន្លងមកថ្មីៗនេះ ដោយសារថា គាត់ចង់មកដើម្បីបង្កើតការអុកឡុកនៅក្នុងសង្គម អញ្ចឹងរដ្ឋាភិបាល គឺញ្ហាថាចង់រក្សានូវស្ថេរភាពសណ្តាប់ធ្នាប់សាធារណៈ ទើបលោក[រដ្ឋាភិបាល]មិនឱ្យចូល ដោយសារតែ សម រង្ស៊ី មិនចង់ចូលខ្លួនឯងហើយចង់មកបង្កើតប»។
សូមរំលឹកថា បញ្ហាដែលនាំឱ្យលោកសមរង្ស៊ី ស្ថិតនៅក្រៅប្រទេសនោះ គឺដោយសារលោកជាប់ក្នុងសំណុំរឿង ដីកាតាមចាប់ខ្លួន ដែលធ្វើឡើងដោយសាលាឧទ្ធរណ៏ ករណីលោកហោណាំហុងប្ដឹង លោកពីបទបរិហាកេរ្ត៍ ។ តែសំណុំរឿងនេះ ត្រូវបាន អ្នកតាមដានសង្គមថា បានរលត់ជាសា្ថពរទៅហើយ ដោយសារលោកទទួលបានការលើកលែងទោសពី ព្រះមហាក្សត្រនៅឆ្នាំ២០១៣។ យ៉ាងគេរំពឹងថាមេបក្សប្រឆាំងនេះ អាចមានលទ្ធ ភាពវិលប្រទេសវិញ នៅមុនការបោះឆ្នោតសភា ឆ្នាំ២០១៨៕
